ناديت بإسم اللي يلبـي نـدا الـداع

القصيدة اهدا من الشاعر عزيز الروقي
الي الشيخ فارس بن عبدالله بن ماجد بن جزا ابا العلا


ناديت بإسم اللي يلبـي نـدا الـداع
للمستجير ابواب عفـوه اوساعـي

تسجد له الروس العزيـزه تخضـاع
في حاجته حتى الغنـي والشجاعـي

متكفلن بالـرزق ماشالـت القـاع
لولاه كل النـاس عـري وجياعـي

وهاضن هجوسي وأستعدن للإبـداع
لشيخ فارس يكشفـن إنطبـاعـي

عن طبع محمود السجايا والاطبـاع
ربيـع جـلاب الثنـي والربـاعـي

بغيت ازوره لكـن الوقـت ماطـاع
ماهي برغبـة صدتـي وأمتناعـي

وجهزت جيـب للمسافـات قطـاع
يطوي خرايم نجد طـوي الشراعـي

آخر موديل ولونه أبيـض ولمـاع
مثل القزاز اللي يعكـس الشعاعـي

فيه الغرايـب والعجايـب بالانـواع
لعيون راع الـذوق قمـة متاعـي

سواقه اللي من سنيـن الترعـراع
ماتاه مع درب الجهـل والضياعـي

ماذاق شي مـن التـرف والتـدلاع
على التعب والهـم يرقـد وياعـي

وضعه مع الدنيا معانـاة وصـراع
وقسوة ماهو بحوار عشب ورضاعي

نومه الليـا منـه نوالـه بمرمـاع
غفوات شـاوي ٍ تحفـوه سباعـي

يكفيه نصف اليوم روحه ومرجـاع
روحه ومرجاع وسـلام ووداعـي

يوصل سلامي وافي الشبر والبـاع
اباالعلا فارس طويـل الذراعـي

بالمنزل اللي من نشد عنه ماضـاع
مثل الجبل متبينـن بالرفاعـي

عالي وبيبانه على الطـرق شـراع
ملفا الحمايل من جميـع البقاعـي

طبيعتـه ماهـي نفـاق وتصنـاع
ولاهي جديده مبتدعهـا إبتداعـي

نبت بها نبـت الاظافـر بالاصبـاع
ورثه وزودهـا الطمـوح أندفاعـي

ماسام في سوق الخسـارة ولابـاع
ماهو بعير ٍ كـل ماسيـق طاعـي

ولاهو بغصن ٍ كل ماهـب ذعـذاع
من يوم يوميبه سريـع انهزاعـي

بالمعرفـة وافـي وبالـراي بتـاع
كل المراجل فيـه حسـب اطلاعـي

وسمعه لعذبـات التماثيـل ينصـاع
رجل يحـب المرجلـه وأجتماعـي

والليا نخي راعي حميـة ومفـزاع
ماهو بـراع إماطلـة وأنجضاعـي

ماهو بثلج ٍ كل ماجا الضحى مـاع
ولاهو سراب ٍ يطـرد لـه بقاعـي

أقولهـا ماهـي محابـاه وخـداع
والشك مايلحـق حميـد المساعـي

حفيـد شيخانـن يفكـون الاقطـاع
يثنون دون اللـي جنبهـا زعاعـي

الليا تناخم واسرجـم كـل مطـواع
ارواحهـم بالسـوم الاول تبـاعـي

يخضبون اللي مضاربهـن وسـاع
من دم شرسين اللغـا والصراعـي

يفـرح بهـم ذود ٍ تقفـاه طـمـاع
في خلوتن ماعندهـا غيـر راعـي

الليا اقبلوا قلبه من الخـوف ينـلاع
ويصير هوشه دون نفسـه دفاعـي

بالوقت الاول قبل تغييـر الاوضـاع
وقت العـداوة والشقـا والنزاعـي

استدركـوه مغمـدة كـل قـضـاع
السيـف بـدل بالقلـم واليراعـي

وتعادلت روس المناكـب والاكـواع
في ظلهم حتـى الثعالـب شباعـي

وختامها صلوا علـى خيـر شفـاع
وأخير من نـادى للاسـلام داعـي

باخر بيوت من ورى حدب الاضلاع
راجن وماجن وأرجلـن بإندلاعـي

وانا الليا غنيـت متعـت الاسمـاع
وخليت راع الصنف يشعاه شاعـي