قلت اتقاعد واطوي الهم وارتاح

قلت اتقاعد واطوي الهم وارتاح
واثر التقاعد جايب الهم كله

لاني مع اللي يجني المال وارباح
ولاني مع اللي ساكنٍ وسط فله

ولاني مع اللي يقضي الوقت فلاَّح
ولاني مع اللي صورته بالمجله

الوقت كله صايرٍ تقل سوَّاح
وان رحت يم البيت شفت الممله

لا واحسايف وقتنا بالعمل راح
يوم ان نفسي بالعمل مسفهله

واليوم مثل الطير مكسور الأجناح
عزاه يالمتقاعد علتك عله

وهذي اسوات الحظ ياناس لا طاح
لا طاح حظ المرء شاف المذله

لكن ترى برق الأمل قدمنا لاح
اخيل برقه بالمزون المطله

والذيب مثلي عادته بعد الاشباح
لا من سرى بالليل دربه يدله

وانا سموي للصعيبات نطَّاح
وتاريخ مجدي واضحٍ في سجله

لو التقاعد ياهل العرف ذبَّاح
تلقى راعيه امراوحٍ في محله

ابعتزي والبس على عزمي وشاح
ومن عقد راس الحبل لازم يحله

نايف الشويب السليمي