احذر من الدنيا تغرك وتغراك

احذر من الدنيا تغرك وتغراك
ولا تحسب انها على الكيف تعطيك

كم كرفت بشراع مثلك وشرواك
واصبح بلجات العسر والتهاليك

ولا تغرك يا فتى كثر الاملاك
وشعاد لو تربح بكثرة مشاريك

الا ان تجود بما حوت فيه يمناك
لى جاك ملهوفً يسالك ويرجيك

قدم لنفسك قبل دورات الافلاك
من قبل لا ياتيك من لا يخليك

للاخره قدم وعمٌر لدنياك
واقنع بموجودك عن الناس يغنيك

اثر المنيه وين ماسرت وياك
في وين ماتنوي تراها تباريك

حافظ على التقوى ترى الدين يحماك
واصبر على امرً من الله ياتيك

اياك لا تشكي الى الناس بلواك
اشتك لربً من عديم مسويك

احذر من ربعً خبيثين الاسلاك
ترى ربعة الحمقين ياصاح تدنيك

ايعرضك طرقً على غير مهواك
ان صار حزات اللوازم يخليك

رفيقك اللي في المواجيب يعزاك
ولي عزيته فالمواجيب يشفيك

رفيقك اللي كلما سمع طرياك
يشفق على شوفك ويفرح بطاريك

احرص على جارٍ يعزك ويدراك
عزه وخل الجار حسبة اهاليك

ولاتشوش بين هذا وذاك
وتحط مابين الرفاقه شرابيك

واياك تهزا الاجاويد اياك
ولاتحط الحر في حسبة الديك

ارعى الصديق اللي يودك ويهواك
افده بماجودك وملكة اياديك

احذر عدوك لاتخليه وياك
ولاتفضي له خفايا مساويك

ينقلك عند اللي يهذرك ويشناك
بين الملا يصبح يبيعك ويشريك

اياك لاتحمل على كل من جاك
جاب العذر لك يعتذر مخطيٍ فيك

خل السموحه بين الاجواد منواك
اسمح لاتكثر عليهم دعاويك

حقك من الدنيا جميلك وحسناك
وعلمً تذكربه نبالك وينبيك

اوصيك الى جيت المجالس وحياك
ربعً وكل منهم بشوش يحيك

لاتصير ملقوفً الى الهرج يعداك
اصمت وخل الصمت احسن معانيك

الا ان سئلت عما جرى لك وماجاك
عطهم علومً لك على غير تشكيك

جود بوفا اللي تعب لك ورباك
الام الحنون اللي سهرت في ترابيك

بجاه النبي اللي على الحق اهداك
بيوم الحشر من لاهب النار ينجيك


سعيد البديد

أخي العزيز الحمدان
شكرا لك على هذه التواجد الفعال
والمشاركات النافعه والمفيده
فبارك الله فيك وجزاك الله خير

المشاركة الأصلية كتبت بواسطة حسن بن عبدالله

أخي العزيز الحمدان
شكرا لك على هذه التواجد الفعال
والمشاركات النافعه والمفيده
فبارك الله فيك وجزاك الله خير

أرحب اخي الغالي ابو حوفان
اشكرك جزيل الشكر
لتعقيبك وتواجد المميز
وفقك الله لكل خير وبارك فيك