أقسى الجروح اللي يكون الدوا به

أقسى الجروح اللي يكون الدوا به
موت المشاعر والقلوب النبيله

والحب لو وطّا رفيع المهابه
تراه ماعز النفوس الذليله

ولو إن الأنفس ياحبيبي تشابه
بتشوف نفسك من فراقي عليله

في غيبتك ضاقت عليّ الرحابه
والحزن خيّم بالضلوع النحيله

حزنٍ عليه يجرّ قوس الربابه
وتبكي لحونه ناعساتٍ ظليله

حزنٍ لك الله كل حيٍ درابه
وطبع العرب ما تررك أحْد بسبيله

قالوا تخلاّ صاحبك في غيابه
خلّه وتلقى فالعذارى مثيله

وإنسه وإذا عوّد عليك إجتنابه
وإكرهه وتلقى من تحبه بديله

كلامهم ماهو غريب الغرابه
إنّي عجزت ألقى لكرهك وسيله

لأنك فرح عمري وزهرة شبابه
ولأنك أساس الذكريات الجميله

ولأنك وطن للقلب بعد إغترابه
وأطهر فضيله في زمان الرذيله

ولأنك أمل قلبٍ يأس من عذابه
وأكرم وجه بين الوجيه البخيله

ولأني معك برقٍ عشق له سحابه
يشوف فرقى حضنها مستحيله

عوّد ترى قلبي تعب من صوابه
وروحي من طعون الجفيّا قتيله

مغير أسلي خاطري بالكتابه
وأجر صوتي لليالي الطويله

وأقول مهما نبتعد في القرابه
يكفي بالآخر نجتمع في قبيله

وإن كنت طيفٍ مت أتبعه سرابه
عزّي لقلبي والهوى عزّتي له

ببعد لو إن البعد ما أهوى الرضا به
لكن مالي في المقادير حيله

وقبل البعاد أسألك وأبغى الإجابه
لاجيت أنا بنساك وشهي الوسيله

محمد السبيعي