فكرت باللي بين ربعي وبيني

البارحة ماذاقت النوم عيني
فكرت باللي بين ربعي وبيني

واحترت واحتار القلم في يديني
الا متى أصبر وارتجي راحت البال

عجزت اميز صاحبي من عدوي
يارب ضاقت حيلتي ويش أسوي

وأنا على درب الغرابيل توي
أخاف زود الهم يقضي على الحال

على الوفاء والصدق هلت دموعي
مجبور أطيع الوقت وأعلن خضوعي

ملزوم اطيعه غصب ماهو بطوعي
أحلامي السوداء رمتني على الجال

يا ناس وين أهل الوفاء والصداقه
الظلم -لوتدرون - مرٍ مذاقه

قلبي غدا يا ناس منكم حراقه
مليت فكوني من القيل والقال

ياناس مافيني من الهم كافين
قلبي وأعرفه مايبي من يواسين

اشوف حظي عاثرٍ شوفة العين
والحل بين ايديك ياطيب الفال

ياناس أنا بالحيل صعبه ضروفي
أبي الأمان اللي ينسين خوفي

ودي تبين ما بقلبي حروفي
والمشكلة قالو لها ألف حلال

ابكي على ربعٍ نسوني وراحوا
والحق معهم من شقاي استراحوا

ما قصروا يا ما الا أخطيت صاحوا
وأنا عنيد وكلمة الحق تنقال


عبدالله بن عبدالعزيز العلوي