يا رجال أنتم رياجيل تبغون الصحيح

يا رجال أنتم رياجيل تبغون الصحيح
والصحيح أقفى عليه العجاج وضيعه

كل ما ربي جمعكم على هبات ريح
كثرت اللجة وصرتوا ثلاثة وأربعة

كان ما فالقوم نطحة ونارٍ في قديح
لين يلقى طالب المر مرٍ يجرعه

لا تلومون المصيح ليا عوّد يصيح
عزتي له كان ما فيه حيٍ يسمعه

والله لـ يبطي وهو من معاناته جريح
كلمةٍ تجرح ضميره وكلمة توجعه

نثرة المجلس على راس أبو وجهٍ قبيح
ودك أنه يعترض له قبيح ويجضعه

الهذور الي يبي المدح ما حوله مديح
من هو الي يمدحة نعنبو من طبّعة

والله أني يوم أشوف المنافق ما أستريح
وأنه أبغض عندي من المدير الأمعة

المنافق والكذوب الربادي والشحيح
كان مامنهم مضرة مامنهم منفعة

والغرور وكبرة النفس راعيها يطيح
يحسب انه في مظلة وهو في مدرعة

لو رصيده بالملايين ولسانه فصيح
ما تساوي قيمة الخاتم اللي بأصبعه

أنشده عن غزوته كم صويب وطريح
وأنشده هو مالقى ابن حلال يفرعه

توحّد رايكم ما يزحزحكم مزيح
وإن تفرق رايكم صار فيكم مطمعة

وإن بغيتوا ذا يخيل وهذا يستضيح
والنوايب ذي رهينة و ذيّ مودعة

عود الشيعي يحلق على راس المسيح
والمسيحي عجزت أمة محمد تمنعه

عزوتي يا عزوتي وارد الجمة يميح
لا تخلون الضعن في سراب ومقطعة

مصلح بن عياد