جواب القاف

جا جواب القاف مع عذرا حَدَتني فالمسير = يوم انا باتل وادوِّر من يوصلِّني هناك

في غَدِر ليلٍ عواه الذيب واقفاه الجعير = دبْكها يقرَب ويقرَب حيل ويزيد الدباك

كل ماله لين احِس إنَّه بجنب إذني هدير = تاتي الحمَّى جبيني والشقيقه والوعاك

وفوقي إحمولٍ ومع ذالك يِدِي فيها شطير = من يبي طوحي ليا من قال جيتك قلت جاك

وانا قدني منصدم من واحدٍ ما فيه خير = يكوِّش المجلس علانا بالهروج وبالضحاك

ويْتكلّم فالمبادي ما يوقِّف بالهذير = وكلمة إزهل ما تعدَّا دَرْج لحيه والحناك

وحسن ظنِّي فالرفاقة ما يخلِّيني حقير = لين جتني ذالبنيَّه قالت الدنيا فداك

انا لك حسْب الطلب جيتك على ظهر البعير = قلت يفداك الشويْن انتي من انتي ياملاك

قالت آنا بنت ربعان الّي مع بو بن زهير = وبن زهير وبن ربيعه قبل مالله قد نشاك

والمعرِّي وابن بُرْد وقيس بن اوس وجرير = وابن ثابت والسموأل من هذول ومن ذولاك

وبو جعيدي وابن ظافر والغويد وبن طوير = وابن غرم الله وموسى زين يوم الله هداك

كنت احوف الارض لاجلك فالظلام وفالهجير = وآتوجّد في غيابك وآاترجَّا في وِحاك

لين صِبْتَك وانت غافي صرم حالي فالسرير = وانت ساجي فوق عادي لا عدا عدْوه سباك

باعني يَّاك وشريتك بالحنان وبالحرير = بلمسة إكفوفٍ علاها النقش بإسمك من غلاك

وريح مسْك وعنبَّر وكادي وريحان وعبير = ونور بدر ونبْق سدرٍ حبّةٍ منها دواك

وريق فُل وبرك راش وطعْمها طعم العصير = ينشرب ويصير خمره لا تخالط في شفاك

عندها تصْلب وكنَّك تنتظر مقدم عزير = تنقطف روحك وكلٍّ ياخذ الّي في خباك

منكشف كنَّك بلا ثوبٍ تدوِّر للخَدير = تعجَز إتنادي ولا حولك من الناس إيْحَمَاك

كود انا حولك واطولك مثل ماطول الغرير = والهدايه لين تقوا وإتّباها في قواك

ما ربَح وحْدٍ جنابي فالوريد وفالصدير = وانت جيتك جيتك ابغى ما تبي يالله وهاك

شدّ فوقي فوق رَحْلي شدّ لو تبغى تطير = خل حملك فوق رَحْلي خل حملك لا يطاك

إمتسِك دونك يِديَّه والقلاده والظفير = ولا يمين ولا يسار ولا ورا هذا بلاك

قُدْم قُدْم أمام أمام إهنا هِنا حتى تصير = قُدْم ما لك خلف ولْوحدك بلا ذيَّا وذاك

انت وانت وهِم وهِم وهِم عِمِي وانت البصير = لانت فوق ولانت تحت اقدُم تراني في حَراك

أرقبَك فلا تخلِّي من يرا مثل الضرير = وانت يومك شفتني غيرك ترا يبطي وراك

هذا حِن فوق البحَر والبحْر مآهول وغزير = طربخ إرجولك مع إرجولي ونبحث في مداك

وخُذ نفَس حتى تحِس إنَّك على جرف وقرير = لو تنفَّس طحت, فإصلب لا تفكِّر فالحراك

وإلى حَنّ الصدر حَنَّة مجهمٍ تطلب حِويْر = ما تدُرّ الا ليا جاها الحوَيِّر منيَّاك

الغبوق ابيض, حيا, ما به ولا حبَّة شعير = فيضةٍ تهضابها كل الحشايش والشواك

تضيع لو تلهى لحالك لو تكُن شيخٍ كبير = والمقدِّي فالسما شعرى وثاقب لا بداك

بنتقدَّا في سهيل وبنتعشَّا فالعِصيْر = وكل شِعب وكل بيد فيه عفري جا لفاك

وكل عدّ وكل بير وسيل وقْليب وغدير = جو بعرضه فوق عرضه لين تتلايم حذاك

بالقنا ماهي جنابا والقصايد بالصفير = قبلها طرشٍ تسوقه قم لهِم سوق إبعصاك

ثم تدور الدور في طابور من عود وصغير = كلَّها تجمع علي هرجٍ يكالت في خَفاك

باصدَق الهاجوس جا لك من محادير الضمير = وحْش ماصادف ولاصيدف ولاطرْي وطراك

في فضا, حُرٍّ طليق الساق مافوقه عَمِير = فاوَّل إمقابل بلا ميعاد بالصدفه لقاك

ويوم هو شافك شهَق بالموت وإشهاقة صرير = لو قدر ياكلْك ذاك الوقت ما قصَّر كلاك

ما تعرَّض له نفير وماعترض قبلك نفير = وما توصَّخ بالكذاب وما تنمَّك بالنماك

ما سمَع غير الرَعَد ثم المطر ثم الخرير = وما رِوَح غير الخزاما والشواحط والاراك

لين ترسل بالكلام الّي على الكيف وخطير = وانت لا قلته من النعره ترا العالم لهاك

فقلت هاتك هاته الّي من شهيقك للزفير = إشخَلي زلِّي تولِّي كل مافيني دعاك

فقالت الّي ماجبر خاطرْك خلَّه ما يضير = وإن بدا بالشكل والا الهرج فيحان وغَوَاك

وجات كم فرصه وعيَّت بيض فرسانه تغير = ولاحتمى من سود فرسانٍ طلايقها هلاك

فلا تهقوا مثل ذا بين البشر ولا تحير = دام داريته وحاولته وعيَّا لا يحاك

وحَط قدرك عند راس العير ماكنَّك عشير = فحُط قدره عند ذيل العير لا يطري علاك

من درا جنبه وقفَّا عنك فاليوم العسير = فإدر جنبك عنْه لاتحتار له واعطه قفاك

لا تراعي خايبٍ جبوٍ هدانٍ ما يجير = لو تجي بيته يزرفل دونك الباب وجفاك

وهو غريب وصار بين الناس والعالم امير = دايم الطرقي تهاوا الناس له تبغى اللواك

وماتفرِّق بين فيحان وفحَيِّح فالنذير = تبغى تتلافا المشاكل وقت هيَّات العراك

ما طرَت راس البعير اليا زبد عقب الهدير = البلا من زوره اليا داس به عند البراك

فيا بو هدلا لا تشدّ الحمل بالحبل القصير = خذ رهاوي يلحق الغارب ويوثق بالحباك

وانا في جالك علاك آمن وفي عمرك خشير = آتهقوالك على حلو الشيَم واظهِر حلاك

فلا تخيِّب من تعشَّم فيك ويحبَّك كثير = طعني وحوسه ودوسه وإدهكه باسفل حذاك

قلت سم آمر على خشمي وتحت امرك ذِمير = والله إنِّي طوعك انطق كل كلمه من حكاك

رابعه, ترين يِدينك على جسمي تثير = كامل إشعوري واغيِّب لين ياخذني حِداك

صوتك اجمل من تقاسيم الحساوي مع بشير = يسحب إحساسي مع المسحوب واتنفّس هواك

فالقرار وفالحراك وفالطلوع وفالحَدير = دلّةٍ ريقت على فنجال وجْدايه جداك

شفت فعيونك وانا شابح لها عدٍّ غوير = منهجر كنَّه هلالي فوقها قصَّة حجاك

من رما ماضن رما ماينفع الحبل الجرير = هو بدل ماياخذ اثْرَه قام مايدري عطاك

مات فيها اكثر من الّي مات من وقع الجفير = والّي مات ارتاح مير الّي نشِب واصبح معاك

وين ماتلقين يلقى وين ما ذرتي يذير = كل جُرَّه فوق جُرَّه والخِطا على خِطاك

والمهيجن لا تهيجن زاع بالصوت الجهير = يشكي اوجاع المشاعر والتوجّد والهماك

فيا ربيع القلب لك فالقلب مجعاد وحصير = وياربيع الراس من شر العباد الله يقاك

فزعتك حطَّت همومي مابقا منها اليسير = وبرّدت كبدي مخاييلك وفحْواك وحَياك

واليسير الّي بقا لازم له إمعاود وزير = ينفض الناشب بصدري من لزاليز وحساك

والرّدي عندي مشاذيبه وانا عقبك خبير = حتى لو يبعد بَصيبه بالشخاف وبالرماك

الرّدي ماله مكان الا لحاله في حَضير = يقعد إيلاوِك سنونه ويْتعالك بالعلاك

إزهلي يا رابعه ما دام انا جنبك جوير = ما عزمت اخذ علوم الخلق يحرم من سواك

والله الله فالقدوم اليا غدَت نارك دهير = لا بردت إهبي تعالي وآتدفَّا من صلاك

رابعه, قالت عِفيت اليوم وإعلومك بخير = ما سلا يا بنت ربعان الهجوس الا عِفاك