ديوان قصائد لشعراء المملكة العربية السعودية (متجدد)☘️☘️

اه يالحظ الشقي رجعت نفسي في عناهــا
بسم الله الرحمن الرحيم
السلام عليكم ورحمة الله وبركاته
من قديم الشاعر بونايف نقلتها لكم ومن اجمل القصائد في نظري

عادتي ماني فضولي عيني اقصر مداهــــا ... واتحاشى وقفه ماني لها ولاهيب ليـــــــه

لين شفت اللي تعرضلي بنظرات عناهــــــــا ... ويوم طالعته تعمد ركز النظره عليـــــــــــه

جادل شبه القمر قدامها يزها حلاهـــــــــــا ... واثقه من نفسها زينه وكل الزين هيـــــــه

اقبلت مني وخلت كل من كانوا معاهــــــــا ... والله اني خفت منها ون بان الخوف فيــــه

ولا بغيت اصد قلت اشوف هذ وش وراهــــــا ... سلمت بعيونها وارخت عن اللثمه شويـــــه

قلت يالله ياكريم انك تكافيني بلاهـــــــــــا ... وقفتي ماهي على شان اكسب اثام وخطيه

وقفت وستأذنت يازين حكي من شفاهــــــا ... قلت مابيني وبينك معرفه يالاجوديــــــــه

قالت الناس أتعارف كلمه وعندك غطاهــــا ... ودي اسولف معك وأستئذنك من طيب نيـه

شفت بعيونك بقايا احزان وادري ماتراهــــا ... بينه من نظرتك حتى ولوكانت خفيــــــــه

قلت حسبك كل نفس عايشه تحمل شقاهـــا ... ماذبحني حب غالي او عيون نرجسيــــــه

مايذل الرجل غير النفس لا دور هواهـــــــــا ... افهمي معناي كان انك على شكلك ذكيه

قالت اسف مانويت ابحث على نفسك خفاها ... والله اني فاهمه معناك تحسبني غبيــــــه

الله اللي يعطي الارزاق من عالي سماهـــــا ... وانت رجال شقي خلك مع ناس شقيــــــه

وزعلت مني وراحت وتركت حتى ازملاهــا ... والله انه صابني مما حصل في القلب كيه

وضاقت اخلاقي ونفسي وصلتبي منتهاهـا ... ليتني جاملتها ماضنها بنت رديــــــــــــه

اعرف اني عاقل ونفسي يمشيها تقاهـــــا ... حسبك الله يالمكان اللي يسمى الفيصليه

اه يالحظ الشقي رجعت نفسي في عناهــا ... والله ان المضحك المبكي معي شر البليــه