ديوان قصائد لشعراء المملكة العربية السعودية (متجدد)☘️☘️

نقد القصايد - البسيط الهجيني
الشعر يا ناقده لا تسبح بحوره
حتى تجيده وتفهم شف كاتبها

ترى قصيدي من اللي داخلي نوره
واللي يرد التي في البال حاسبها

سفينتي لا ابحرت في البحر مشهورة
حتى ولو قادها للبحر ناهبها

ابياتها من صميم الذات مسطورة
هي بنت ابوها وتعرف زول كاتبها

ان كان في متنها بابين مكسورة
تعال واشّر عليها لا تخربها

يالايمي ليش ماتبحث عن الصورة
تنقد على نظمها ومنت عاربها

ترى صحيح الشعر يحكي عن شعوره
والجرة اللي بها ماها شوايبها

ابياتنا من حلاها مالها عورة
يتوه من يرجي السيّة يعايبها

والكسر لو صابها تطيح معمورة
ويختلف عن طريق الخير صاحبها

متذوقه يدري ان الشعر سبورة
سبورة احساسنا واللي نجاذبها

ان غاب شاعر فشعره سجل حضورة
يمثل الحال في شتى قوالبها

سلام للي على الجزلات مفطورة
تجيب مدفونها واللي بغايبها

تشطير الابيات بالمعنى وبالصورة
هي لعبةٍ في يديها لا تلاعبها

عند اليمامة مع العبدين مشطورة
تجيب ثار المهلهل من مصايبها

فكيف ياناقد ابياتي ؟ومن شوره ؟
يشور في بعضها ولّا يناسبها

للشعر شاعر وميقافه يجي دوره
ماهو بمثلك على كيفه يضاربها

وانا على كلمتي والحال مخبوره
نسبح بحور الشعر نعرف مضاربها

ماني ضعيف الشعر ولاني اسطورة
لكن قصيدي سنام الشعر كاسبها

لو انزل الوادي القى الارض ممطورة
وانام ما صابني لدغة عقاربها

هذي تشافي كمدنا حزة ظهوره
للنقد سيسانها واحذر ضرايبها

بعض البشر مبتدي ماقد بنى سوره
يرمي على من بنى سوره تجاربها

هذي معاني تسوّي داخلي ثوره
وانا هنا قلتها شفي اجاوبها