يوم أمس, 11:44 PM
|
#1 | ||
|
مساعد للمدير العام ومستشار للمنتدى
 |
فواز ابـن غسـلان يهـدي سلامـه
هذه تعتبر من خالدات الدهر وفيها نبذه لاشهر مواقف الرجوله العربيه الموثقه تاريخيا بالسند الصحيح الثابت
وخاصة فيما يتعلق بمكارم الاخلاق والشيم العربيه بعيدا عن الحروب والنزاعات القبليه السالفه وقد اوردت منها المراتب الخمس والعشرين الاولى بالترتيب حسب مااراه انا بعد استشارة العديد من رواة ومؤرخي القبائل المذكوره في القصيده والباقي ذكرتها دون ترتيب وانما ذكرتها اثباتا لها وكذلك شرح عن بدايات الشعر الشعبي واشهر الشعراء وافضل القصائد والحكم والامثال في الاشعار النبطيه وتحتوي على ( 357 ) علما من اعلام الجزيره العربيه سواء كانوا فرسانا او كرماء او شيوخ قبائل او شعراء او حكماء من الجنسين على حد سواء مجهود متواضع اضعه بين ايديكم فواز ابـن غسـلان يهـدي سلامـه والحمـدلله هـي بـدايـة كـلامـه نرجيـه يرحمنـا بيـوم القيـامـه في ساعـة ماينفـع المـال والجـاه وبدعـت زينـات المثايـل بقـافـي قاف يصوغ القاف لـو كـان خافـي يفيـض لاضـاق العـرب بالجفافـي ميراث عـود لـه بالاشعـار غـاراه قلبـي يـروم البـاديـه والـبـداوه والناس في ميـزان حكمـي تسـاوه ونشهد لمن حاز الصخـى والنقـاوه واللي زعل مـن قولنـا ماترضـاه ان كان يزعل عنـد قـول الحقيقـه محدن قدر يرضـي جميـع الخليقـه وهذي على طيـب المراجـل وثيقـه ولو رحت تبقى عند الاجيـال تقـراه اليوم بعض النـاس صـارت ذيابـه يبني بيـوت كـان ساسـه خرابـه واللـي يريـده يكتبـه فـي كتابـه ويطبع كتابه بالسنـه عشـر طبعـاه وانا نويـت اكتـب حـروف نقيتـه بالحفـظ واسفـار القبايـل خذيتـه وعندي دليل اللي جزمـت ورويتـه ودرب الخطـأ لازم بالاقـدام ناطـاه ناطـى الخطـأ لكنـنـا مانعـيـده ولاطعت شيخ طامـع فـي رصيـده واللي كذب بالقـول غصـب نصيـده ولو يشتمن وسط العـرب ماشتمنـاه واذا ثبـت لـي غيـر ماكنـت راوي راح اعترف دامي للاصـلاح قـاوي ولاني على ذكـر الخطايـا قصـاوي والناس محدن سالم(ن)مـن حكايـاه ولا اقول محدن يفهم الصدق غيـري وابقى بوسط اهل المعارف صغيـري والعلم مثل الموج شربـه عسيـري ونرجي ولـي العـرش رب البريـاه فيهـا روايـات علومـه شهـيـره صارت لمن عاشوا بوسـط الجزيـره ومااقول انا ماصار بالطيـب غيـره لكن ذكـرت اللـي سمعنـا وقلنـاه الطيب واجـد غيـر ماصـار معنـا وحبيت اعد اللـي بصدقـه سمعنـا وهذا الـذي لاهـل المكـارم جمعنـا والصدق ياصلنـا ولـو ماوصلنـاه اروي روايــات ثقات(ن)شـهـوده اعطت على صدق الروايـه عهـوده ولانظلم اجواد العـرب فـي لحـوده قـوم عطونـا ثـم قوم (ن) عطينـاه وعندي لهـا قلبـن فهيـم وحافـظ ولسان مع صدقـه فصيـح الملافـظ وعقل لكذب اهـل الفراغـات رافـظ وكله من اللي كـان ضقنـا دعينـاه وبعض العرب مقبول للنـاس قولـه وسارت قلـوب السامعيـن بقبولـه والكايـده يلقـى طـوارف حلـولـه ولايكسبه رجل على الكـذب مركـاه واللي روى علـم ولااحـد درى بـه علمن كبير(ن) مثـل شامـخ هضابـه نقول يااهل العرف من ويـن جابـه كيف اختفى دامه مثـل ظلـع ابانـاه وكتابـة التاريـخ ماهـي فـزايـع ولا فيه فرق(ن) بين عاصـي وطايـع او ذاك اميـر وذاك يانـاس جـايـع والظلم يورث داخل القلـب حسـراه ونويت ارتبها على الطيـب ترتيـب اقوى المواقف للـذي يغلـي الطيـب مواقـف مـن دون شـك ولا ريـب وجميعهم بالطيـب حاشـوا مزايـاه هـذا وتفضيلـي لنفـس الفعيـلـه ماهو لنفس الشخـص والا القبيلـه كم واحد(ن) حـاز النـدى والفضيلـه ورقى جبـال المجـد لـو ماذكرنـاه وابعدت فيها عـن علـوم الحرايـب او ذكر نقص النـاس والا المعايـب وحصرتها بالطيـب وقـت النوايـب فيها لجيـل اليـوم حكمـه وعبـراه وشـاورت فيهـا كاسبيـن النفيلـه اللـي يشوفـون المغالـط فشيـلـه ولا همنـي كونـه مـن ايـا قبيلـه يهمنـي صـدق الروايـه وذكــراه واغلب روياتي عـن اهـل الشمالـي ولاتحسبـون القلـب للربـع مالـي لكن كـلام الصـدق يانـاس غالـي والناس كل(ن) ضابـط علـم مربـاه جنوبنـا نبـع النـدى والشجـاعـه لكن تواريخـه مـع الوقـت ضاعـه ويكفيك بالحاضـر مواقـف سباعـه والطيب عسرٍ فـي مبيعـه ومشـراه اعظـم مفاخرهـا خـذاه السويطـي صنيتان جرحه بالضمايـر محيطـي قلبـه بلاهـوب الوفـى يستشيطـي ابنـه علـى جـاره تقـدم وذكــاه ومجد الكرام اللـي خـذاه السبيعـي اللي فعل لـه فعـل ماهـو طبيعـي لاجل المهادي والشـرف لايضيعـي مفرج شلع راس الولـد ثـم دربـاه والدوسري ذيـب الرجاجيـل ناصـر اللي غدى عن فعلهـم غيـر قاصـر اللي خذى بالطيـب نفـس العناصـر وابنه على حـوض المنيـات مشـاه والثانيـه عمـران ولـد البجـيـدي ادخل دخيله عـن سيـوف العنيـدي وهـو يطلبـه دم الولـد ياعضيـدي عسى ولي العرش بالطيـب يجـزاه والرابعـه طيبـه لصبـر المهـادي مع جاره اللي في ردى البنـت زادي وقال اصبري والصبر درب السـدادي وصبر ثمان سنيـن والظيـم ياطـاه والخامسـه شيلـة خـوي كسيـري سبوعين ماهابوا طريقـن عسيـري وفازوا بها الشلقان عقب المسيـري وكسيرهم في زين الاشعـار جـازاه والسادسـه للـي بقـرن الشمالـي ادخل عن الاتراك مـن كـان جالـي والترك جيشه مثـل وبـل الخيالـي وابن سمير اعلـن مواقـف حميـاه والسابعه شالـه حمـد ولـد عيـده نخـاه مربـوط شكـى نـار قـيـده وصار الثمن في كل ماحاشـت ايـده من قوم ابن مرشد عسى الخير ملفاه والثامن اللي مات من صوت ناخيـه فايز مع ابن سويط والضيـم كاويـه وياغيبة ابن هذيـل بالحـال تنهيـه وعقوب من غيضه على القبر خـاواه والتاسعـه طيبـه لشيـخ الظفيـري اللي حمى ماجـد بسيفـن شطيـري راع البويت اللـي مقامـه عطيـري دغيم ثنى دونه عن القـوم وانجـاه والعشـر ابالظلعـان يرجـي خويـه كسيـر طـاح بسهـلـة جرهـديـه ربعه تميـم اهـل العـزوم القويـه شهرين لين الله من الكسـر شافـاه حادي عشر للي عطى الذيـب شاتـه ذيـبٍ كبيـر قبـل حــزة وفـاتـه ابـن سعيـد مـن يسـوي سواتـه يوم العرب بالجـوع تبلـش بدنيـاه ثاني عشـر للـي بليلـه يصيحـي يدعي ضيوفـه بالزمـان الشحيحـي للي وقع من جـوع بطنـه طريحـي ابن مهيد اللي علـى الطيـب نـاداه ثالث عشر للعوهلـي مـع جريحـه تسعيـن يـوم وكـل يـوم ذبيحـه ربعه عتيبه والصخـى فـاح ريحـه وهـذي سلـوم المرجلـه يالقرابـاه رابع عشر طيبـه لشيـخ الشـرارت اللي هوادي ضيفتـه روس خلفـات خلف رمى في مجحم النـار طاقـات واكمل عشى ضيفه ولا قـال حيفـاه خامس عشر للذيـب والطيـب فالـه من نقوة العجمـان واهـل الجمالـه ومن طاب طيبه ياصله مـن خوالـه ماخـاف تهديـد المهنـدس وفرقـاه سادس عشر للي نقض سقـف بيتـه حمد كريم(ن) فـي بلـي ذاع صيتـه يوقد عشـى ضيفـه وفعلـه رويتـه وعقبه وقع بيتـه ولاجـاب طريـاه سابع عشر للي قعـد مـع خصيمـه عقيل والمجـدور مـن دون خيمـه عقب العداوه صـار خصمـه نديمـه صعب ولد عمـه يـذوق المهونـاه ثامن عشر للي عـرف حـق جـاره واسقى الغنم مـن در غالـي بكـاره هجرس من التومان والطيـب كـاره ساق الغنم والناس تمشـي بممشـاه تاسع عشر والجـار شالـوا شياهـه فوق الخيول وجارهـم بـان جاهـه والحـرب ماتمنـع رجـال الوجاهـه مطارفة وايل علـى الطيـب منشـاه وعشرين للـي قـدم الطفـل نايـف للذبح عن جـارن حريمـه ضعايـف سليمان قال الطفـل نلقـى خلايـف وبني عطيـه طيبهـم طـال مبنـاه واحد وعشرين ابن ناحـل وطاريـه لو ماكسب يعطي ضعيفـه ويحذيـه شيخن ولايترك طريقـن مشـى فيـه واشعار ابوماجـد بمدحـه سمعنـاه واثنين والعشرين من شان جربـوع من ملحتـه ذود المعاديـن مرجـوع وهي لقمتن ماتطرد الضعف والجـوع بسبيع ابـن مـروان تلقـى حلايـاه وثـلاث والعشريـن ذابـح ذلـولـه وهو ماملك غيـره كريـم الحمولـه لاجل العجوز وخمس الايتـام حولـه هذا ابن سندا مـرة الطيـب منصـاه واربع مع العشريـن يرقـى سنـوده وعن غرة الجـارات يلـزم حـدوده يقـول مثـل اللـي رضعنـا ديـوده طيبه لابـن هـذال والمـدح يزهـاه والخمس والعشريـن راع المسيـره صوب الكويت اللي دروبـه عسيـره عجوز تبي التمـر ياصـل صغيـره وطيب الصعيدي راف بـه ثـم وداه خمسه مع العشرين فـازت ربوعـه وجبته على الترتيب في كـل روعـه واللي يجي بالطيب في مثـل نوعـه ومن دون ترتيب ابي اذكـر حلايـاه مثل الـذي حـاول يفـك الاسيـري وهو ساجنه سجن ولا هـو يسيـري من رحمته يكـره يشوفـه حسيـري الشيخ جاسم في قطر طيـب الجـاه والا كريـم الـخـال راع العطـيـه لنهيـت ولـد بريـك مالـه جزيـه شيخ الظفيـر اللـي كفوفـه نديـه لصديق ابوه اللي من الضيـم ينخـاه واللي وصف له بندق خوش نوعـي ومشقاصها كالشيخ عنـد الركوعـي مـري ولاهـو بالقصيـره دنوعـي هذا ابن فاضل واعسى النـذل يفـداه واللي حلف بالله مـن شـان حصـه ولعيـون حصـه حالف(ن) ماتمصـه هـذا الدريعـي كـان ودك تنـصـه الشيخ ابن شعـلان سـارت سرايـاه واللي من الجربـان قـاد المسيـره خمسين ذيب مـن حـدود الجزيـره وخذى بثار اللي وقـع وسـط بيـره هايس ولا هـاب السبـاع المضـراه واللي قعد بالـدار عقـب الجماعـه اللي مشوا والحرب يوضي شعاعـه ابن عقيل ارخـص حياتـه وباعـه من نقوة السرحـان صـالا شظايـاه واللي كفـل بالطيـب رمـل القبيلـه وعشاء الارامـل كافلـه كـل ليلـه ابالرمـل راع الفـعـول الجميـلـه سالم سليل الطيـب نسـل الطـوالاه والله ستر بالطيب عرض المعازيـب ودهن كفوفه سمن من كثرة الطيـب ما حـط بكتـوف المعـزب كلاليـب المرتعـد ومطيـر بالطيـب كـافـاه واللي تجيه مـن الخـوال المنيحـه ويعطي عمامه لو ظروفـه جريحـه لـو ان روحـه بالمجاعـه طريحـه ابـن خزينـه بالقـرابـات ســواه وراع المضيف اللي كما الظلع ظاهـر وسط الحويقه له ظعـون ومظاهـر ويازين طيب اللي مع النـاس طاهـر وذياب ابـن حسـان شيـخ تـولاه واللـي الغـازي ذلـولـه ســواده شافـه تـرك ربعـه ويتبـع شـداده ومن حبهـا ماطـاع يرجـع بـلاده وشيخ المفافي من ظنى يـام خـلاه عجيان راف بحالته عقـب ماشـاف وقال اشتريها في عدد كل الاطـراف واعادها للخصـم والطيـب ميـلاف شيخٍ مـن المـره وسـاعٍ شغايـاه واللي طرد ذوده قبـل يـارد البيـر كله لاجل يسقـي ركـاب المساييـر سواه ابن طـارش خـوي المناعيـر وطاح العشار من الظمـا واحلـولاه وبمطير سواه ابـن هدبـاء عيانـي مـع العتيبـي فـي قديـم الزمانـي ولا واعذابـي كـان جـاري حدانـي قالـه سميـر وراعـي البيـر بـداه واللي ينفـد مـن خيـاش القهـاوي ابـن لحيـدان التميمـي شـفـاوي يـوم الدهـر يمنـع ردي الهقـاوي منتوج صنعاء جابه الشيـخ واغـلاه واللي نقـد فنجـال شيـخ خطيـري قال ان وسط الكيـف حبـة شعيـري هرجه رفع بالحيل ضغـط الاميـري وابن ظويهر صار صـادق وراعـاه وشيخ(ن)سمع نخوا رفيق الشليمـي يبي النياق اللي تقـل جـول ريمـي ماخوذ ينخى لـه شجاع(ن) كريمـي وعبدالكريم اقبل على الذود واعطـاه مثـل القريفـه قـال ويـن الحميـا ومطيـر ربعـه شـاع طيبـه بليـاه والطيـب للـي راقــدن ماتهـيـا وراع الصخى ربـي يعينـه بمسعـاه وصعبن على اللي مايعرف العطـاوي شليويح ويلك كان صاحت مضـاوي بالسلـم قلبـه للعـذارى هــواوي وبالحرب ويل اللي على الخيل لاقـاه وراكان ابن حثلين فـوق الحصانـي اعطى رجال التـرك درس ومعانـي ولا يشرب القفـوات كـود الهدانـي يطرد بها اللي خانتـه عقـب فرقـاه وصـوارم الهيـلا فعولـه صعيبـه ردو نيـاقٍ عقـب ماهـي كسيـبـه حيثه حلب فـي راس تركـي حليبـه شيخن صواريـم الرجاجيـل تنصـاه واللي بحايـل شـاخ فيهـا وطابـي وسمـوه بالشـدات سمـن العرابـي محمـد الطيـب كـريـم المـرابـي ابن علـي ستـر الهنـوف المحنـاه ايضا الكريم اللي بوسـط الجلاعيـد له مجلس من جاه كنه ضحى العيـد الدهمشي فوقي سميـراء تقـل حيـد الحب صاع والرطـب كـان وزنـاه وابن مغامس جـاب تمـرة جنينـه والجوع وسط الكبـد مثـل المكينـه وشاهد طريح الجوع ظاهـر ونينـه واعطاه تمر الطفـل والـرب كافـاه واللي دفع مدى العرب لاهـل جـاره اللي توفـى عقـب طيحـة جـداره ساق الديـه فـي طيبتـه واختيـاره عنـد الدواسـر بالروايـه خبرنـاه واللـي قبـال البيـت مثـل النثيلـه مخلوطة(ن) مابيـن بـنـه وهيـلـه واميـر حايـل قـال حربـه فشيلـه شيخ المناقر من بلـي طيـب الجـاه وابن لهيلـم وقفتـه لابـن غسـلان اعطاه شاة الضيف لو كـان زعـلان قال ان هذا راعـي الطيـب يافـلان لولاه ضايق ما تقـدم علـى الشـاه وزيد العجاجي عقب طيـب التميمـي اللـي جميلـه بالزمـان القديـمـي انجى حلاله مـن قـرار الخصيمـي وعادت جفيفـاء بالمـروات واحيـاه واللي يهلـي بالبقـر وسـط ليلـه يظنها ضيـف رمـى الجـوع حيلـه ابن فزير اللـي مثـل وبـل سيلـه من مزنة(ن) بالوسـم خيـرٍ عطايـاه والا الشجـاع القـرم هـذا حديثـه اللـي طعونـه بالمعـادي غثيـثـه وبني صخر مزنٍ هطل سيـل غيثـه وعـادت لسطـام النجايـب بشلفـاه واللي بنى لاجـل الكـرم حوطتينـي لاجل الضيوف اللي يسـار ويمينـي بالمستجـده حـاز دنـيـا وديـنـي ابـن ربيعـان التميـمـي تبـنـاه واللي صبـر قـدام ضيـم القرايـب وماتوا عياله من عطيـب الضرايـب واخـوه راح وصابـرن للمصـايـب جديـع بـن قبـلان والعفـن يفـداه واللي نقل بالطيب بعـض الحجيجـي اللي ركايبهـم غـدى لـه هجيجـي وساروا حفايا تحت ريـح وعجيجـي واولاد الازمـل والركايـب عطايـاه واللي ختـم زيـن القوافـي بيائـي اللـي خيولـه جـاهـزه للنـدائـي اعـاد ذوده مـع حلـول المسائـي لغيهبـان اللـي خـذاهـا بيمـنـاه واللي يقيم اسبوع في مدخل الشيـخ من شان رجلن من رجالـن مطانيـخ وحمى ظويهر عن سيوف المناويـخ هـذا عبكلـي مـن يحامـي حميـاه والشايـب اللـي ماتحلـل عظامـه الشيخ ابـن هـادي عزيـز مقامـه في مجـد قحطـان العزيـزه علامـه اقفى علـى بيـض الفعايـل وخـلاه واللي عطـى وصفـه لكـل القبايـل اللي حمى بيـض النعـام الطوايـل شيخ العريعر مـن رفـاع الحمايـل مع ماجد اللي يطلـب العفـو باتـلاه واللي نخى عـدوان شيـخ الطوالـه يبـي الكفيـل اللـي عليـه الكفالـه وعاقب منيع وشـال كامـل حلالـه وسدد بريك اللـي بالاشعـار ينخـاه ومقرود ربعه مـع شهيـر المغـازي ساجر فقـد طيـر يـروم بالنـوازي وحتى السلوقي راح ساقـه قـزازي وصبـر علـى جـارٍ بقـرده تبـلاه واللي من الاخـوان طـاع الكبيـري لو يضربـه زعـلان طيبـه كثيـري ومن ضربته طاح العصا بالمسيـري وميزر خذاه وقـام للاخـو واعطـاه وهذا الفديع اللـي فعـل مثـل فعلـه مع شالح اللي طيب ربعه جمـع لـه خادم لاخـوه وخـاط ثوبـه ونعلـه وشالح قبل موتـه بالاشعـار ينعـاه والا فحيمان الحجـوري حمـى زيـد وخلاه يكمل حج فرضه ضحى العيـد فكه من سجـون النكـادات والقيـد ربعـه جهينـه بالملازيـم منصـاه واللي مشى فزاع مـن شـان عيـده اللـي عطوهـا شايب(ن) ماتـريـده واللي نخت ضاري تلاقـي عضيـده والشهم اخو صلفه مشى من حميـاه واللي لقى التاجـر تراقـل ضروسـه بـردان لكـنـه يـوفـر فلـوسـه وشرى منه فـروه وحطـه لبوسـه من رحمته والبخـل للـروح مـاذاه واللي من عياله شكى نـار الاتعـاس ودعى عليهم دعـوة تجلـب البـاس ومن دعوته طاحوا بقطاع الارمـاس وجحيش سارت بين الاقوام شكـواه واللـي ينـام بجنـب بنـت عنيـده شهريـن والطاهـر يظنـه ولـيـده مـع انهـا بالنـوم ماهـي بعـيـده ولد المفضل ماكشـف عـن خزايـاه واللي عطى بيتـه لجار(ن) ضعيفـي وعانـوه ربعـه بالحـلال الكليفـي سواه ابن جامـع وسيـع المضيفـي شيخ العوازم والصخى مـن مزايـاه واللي عفى عن واحـد جـاه حايـف يومه زبن قبـرن لشيـخ الطوايـف قبر الصييفي عقـب ماكـان خايـف وسبيـع ماتـوذي دخيلـه لـذكـراه واللي حرق من رحمته دفتـر الديـن عن واحد مديـون خـاف السلاطيـن الطـوب سواهـا وعنـدي براهيـن وشعـر العبيكـه للشهـاده حفظنـاه واللي نقل نسوان ربعه عن الضيـق من نقرة المشهد علـى فكـة الريـق اربع بنات فـي وصـوف الغرانيـق وسليمان بن حتروش بالطيب سـواه واللي عن الجـاره عفيـف اللسانـي وقامت تحـاول بـه وهـو مايدانـي اقصد به الطاهـر جريـس اليمانـي اللي رفض ياطى الخنا مـع رزايـاه وابن عجاج اللي هفى عقـب شيخـه ومثله مـن الثابـت عنـودٍ طنيخـه ماهـي خرابيـط الهبيـل ونفيـخـه ماتوا لموتـة واحـدن طـال مبنـاه واللي نجى من كيد رجل غـدر فيـه وعزي لمـن مثلـي ذلولـه تخليـه وقعد لهـا باللـي حديـده مصفيـه فهد الرشيدي صاب حبلـه ومرمـاه واللي حمى لاغلى الرفاقـه حصانـه في حـل لغز(ن) للخـلاوي ضمانـه هـذا بريـك الاسعـدي فـي زمانـه وابن سويط اخبـر خصيمـه وخـلاه والا الصويغ غـاب سبعـة عوامـي ورجع يبي طفلـه وزيـن الوشامـي وساعة وصوله طاح بيتـه هدامـي وماتوا وقلبه جـر حسـره ولوعـاه واللي من الضيقه نخى قال يادبـاس عقب الوساعه حالتي تشكي البـاس ورجع له اللي يشبه الطيـر قرنـاس واعـاد للشايـب مكانـه ومـركـاه ومثله عقاب الخيـل كانـك تقصيـت وسعدون شيخ قـال ياعقـاب ذليـت واذويت من كثر العنـاء واستخفيـت وذاق العواجي زيـن عيشـه بدنيـاه وبني تميـم اللـي تشيـل البعيـري شاله هل الروضـه بعزم(ن) كبيـري بعير ضيف(ن) طـاح دونـه ثبيـري وابوجري ضيـف بالامـداح جـازاه واللي نخت ناسن علـى ذبـح ذيبـه اللي كلـت وسـط الليالـي حبيبـه ثلاثة(ن) سـاروا لهـا فـي شطيبـه واحد الثلاثه صادهـا عقـب لقيـاه واللي لمـح داب بـراس الشطيبـي ينزل عليـه الطيـر ظنـه عسيبـي داب(ن) عمـى قـدام عيـن الذويبـي وزاد اتكالـه فـي بديـع السمـاواه واللي رحل مع صغـر سنـه لبغـداد واصبح لاخوه بطيبـة القلـب كـداد ومن المرض ناصر ولد غيث ماعـاد واخـوه عبـدالله بالاشعـار يرثـاه والا المتينـه لـه حروف(ن)كريمـه ارسل يدافع عـن مكـارم خصيمـه وراع الكـرم يكـره دروب الظليمـه وحامى عن اللي قال ياكليـب يانـاه واللي تـرك ظبـي المفالـي طليقـه ذكـر وصاة(ن) شالهـا مـن رفيقـه له في بني هاجـر عروق(ن) وثيقـه هـذا الخـلاوي مايخلـي وصايـاه واللي حمـى جـاره بنـار القوايـل اللي دخل من خوف سلطـان حايـل وعاف البلد لاجلـه وشـد الرحايـل الدوح من شيخـان عبـده ومجـلاه واللي لاجل جاره رحل عـن ربوعـه وخلاه تعطي حـق جـاره بطوعـه وشبر من البيداء تعوضـك فزوعـه هذي لابن نمـران والنـاس تنحـاه واللي لابن خشمان سـاق النجايـب حيثه تـرك لـه مجلسـه ياحبايـب زيد الخويـر اللـي فعولـه عجايـب في مجلس للشيخ في عيد الاضحـاه واللي مدح ناسن مثل باشـة الـروم وياحمود يظهر لك صديقن من القـوم الاحمدي من حرب بالطيـب معلـوم قافه سرى ذكره مع اقصـاه وادنـاه واللي رفض يشرب على جمة البيـر قبل الرفاقه خـوف بعـض المعاييـر ونار العطش في حاميات المصاهيـر غريب من الشلقـان ياطيـب حليـاه واللي يقول مـن القهـر زاد غبنـي وتوي لقيت ظـلال راسـي وزبنـي حسينات مثل الداب شوفـه رهبنـي والـداب لـو هـو ميت(ن) ماتمثنـاه واللي نزل من شـان بنـت صغيـره في حفرة(ن) محدن يجي فـي محيـره والله فـلا صـارت بكـل الجـزيـره خالد ولد سـودي سليـل الدعيجـاه والمنسلح رجل من اهـل القصيمـي ينصف معاشـه للضعيـف اليتيمـي عشـرة عوام(ن) كاتمينـه كتيـمـي ولابـان ليـن الله بعفـوه تـوفـاه مرحـوم يانسـل الشيـوخ الكرايـم ياللي بذلـت المـال والعفـن نايـم الله يحلـك عــد مـاقـام قـايـم وعسى جنـان الخلـد داره وملفـاه وعجايـب الدنيـا بنجـد العـذيـه سوالـفـن بـاقـدار رب البـريـه بالصـدق ترويهـا الرجـال النقيـه وصدقه ثبت عنـدي ولابـه مـراواه اعجب عجايبهـا علـى ابالخسايـر انجب مـن الخفـرات سبـع حرايـر وجابـن شيـوخ ماتهـاب السعايـر والكل منهم شاخ مـن طيـب يمنـاه الاولـه جابت(مكازي)علـى الطيـب اللي رمى شاته يبيها عشـاء الذيـب والثاني (الطيار) سيـف المعاطيـب اسم(ن) وكل النـاس تسمـع بطريـاه والثالثه جابت علـى الطيب (ساجـر) اللـي يغيـر بحاميـات الهـواجـر والشيخ(ابن شامان) سيـل المحاجـر اللي يصب السمـن صافـي بيمنـاه والخامسه شيخ الكرام(ابـن ناحـل) شيخ يمينـه مثـل شهـد المناحـل وعقبه(جديع) اللي يبـوج المراحـل جديع ابن قبـلان بالصبـر ما اقـواه والسابعـه جابـت محمـد بالاخبـار (ابن سمير) اللي حمى جيـرة الجـار مامثلها صارت علـى كـل الاقطـار وابالخسايـر شـاد ساسـه ومبنـاه ونسر(ن)ظبحايل فـي نوايـف جبالـه اللي نقـل كتـف الضحيـه وشالـه شيخ من الجربـان واهـل الشكالـه ومن الجزيره جابـه النسـر وألقـاه واللي فهـم تفكيـر خصمـه بحايـل سعدون قال اخشـى كريـه المثايـل والخيـل بـدل كدشهـا بالاصـايـل وقاله مبيريك الـذي صـاب مرمـاه واللي بنومه شـاف شيـن المعـارك والصبح حط الوصف كنـه مشـارك العرفجـي شيـخ وسيـع المـدارك وصارت مثل ماقال في وصف رؤيـاه واللي لمح زيت(ن) قطـر بالطريقـي من موتر والقيـظ شمسـه حريقـي وفهد الحمـادا لـه ضمير(ن) رقيقـي قـال ان هـذا مـادري فـي بلايـاه ومشى على دربـه لوسـط النفـودي وصاروا على قوله عطاش الكبـودي معـه بناتـه مثـل لـون الـورودي كانوا قريب الموت لـولا الله انجـاه والشعر كـان اول بطـرق الهلالـي قبـل يتطـور بالعصـور التـوالـي ورقـى الخـلاوي مرقبـه بالعوالـي وبريك مع شايع خـذو مـن ندايـاه اول ظهوره بالنبـط وقـت الاجـداد من يوم طاحت للعـداء كـل بغـداد تحت التتار اهل الجرايـم والافسـاد في قرننـا السابـع ونجـد نسينـاه امست بليل من عنى الجهـل حالـك والناس فيها فـي عـذاب ومهالـك ومن يزعم انه ظاهـرن قبـل ذلـك فهو مخطي(ن) باسباب ذكر الهـلالاه وهذا قديم الجيل في بـدع الاشعـار في شعرنا الشعبي على كل الاقطـار والغيهبان اللي غـدى فيـه بيطـار واكثر قصيده ضاع من طول ممشـاه حتـى بدايـة حكـم دعـوة سلفنـا وعادو لنـا التعليـم يـروي شغفنـا من عقب مـا كنـا نصالـي تلفنـا وصرنا اليا شفنـا الفوايـد كتبنـاه والناس تشرط للـذي صـاغ قولـه انـه يطابـق قولتـه مـع فعـولـه واللي خذى في نقرة الهـون جولـه صعب يسوق النصح لاهـل المـرواه والشعر غير النظم يا اهـل القوافـي الشعر لـه معنـى صريـح ووافـي وفيه الهدف واضح ولا هـو بخافـي غير القوافـي والـوزون السليمـاه واللي بـدى القافيـن راع الحريقـي محسن وهو قـول ولا هـو وثيقـي ولا احد جزم باللـي بداهـا حقيقـي ولا هي غريبه عند محسن ومسـراه واكثر حكيم القاف ضمـن الشـوارد وفيهـا كـلام فـي معانـيـه وارد وشعر السعيد اللي مـن الهـم بـارد مايشبه اللي ضاق من كـود بلـواه واقوى قصيد الناس شعـر المراثـي من لاهب في خافـي الـروح عاثـي يطلع من اللي مثل من طـاح جاثـي والسيف الاقشر شاهر فـوق علبـاه والشعر لـه نـاس تعـرف الخفايـا وهي وهبة المولـى جزيـل العطايـا بأشعارهم شـادوا صـروح وبنايـا وانـا مـن اللـي عارفيـن خفايـاه وعقبه بدى جيل الفحـول الصـوارم اللي بشعـره تشبـه السيـل عـارم صاغوا لنـا بالشعـر كـل المكـارم وحنا على نهـج الكرامـه حفظنـاه جيل الفراوي والفهيـم ابـن لعبـون وابن سبيـل والدويـرج بـلا هـون وشالح وتركي والربيعـه وسعـدون والعوني اللي شـب بالقـاف غـاراه وشعر ابن هادي ذاع بالقـاف تاجـه وراكان يضـوي بالقوافـي سراجـه وعبيـد وعبـدالله كفونـا همـاجـه وفجحان له بالقاف سجـه وروحـاه والا الشويعر صـار للشعـر بيطـار والا ابن ريفه صاغها مثـل الازهـار وابن عزيز النابتـي زيـن الاذكـار والنـاس كـلٍ لـه بدنيـاه مشهـاه والشاعر اللـي نافـل كـل الازمـان وغطى على شعر العرب وين ما كان اللي نظم فـي كـل الابـواب قيفـان ولا تصلح اشعـار المراجـل بليـاه هذا الفحـل راع الحـروف العزيـزه القاضـي اللـي رابـي فـي عنيـزه ربعه تميم وله علـى النـاس ميـزه شره علـى الدجـال لا بـان طريـاه وقصايد اهل الطيـب مثـل الجواهـر لا صاغها عقل(ن)زبالاشعـار ماهـر مثل المطر ينزل من المـزن طاهـر والناس كـل لـه هقـاوي وشوفـاه وقصيدة النجدي غطى الكون صيتـه وبديـوي اللـي بالمثايـل رويـتـه وقصيدة الهربيـد فـي زيـن بيتـه وداليـة رميـزان والمـدح يـزهـاه وقصيدة القاضي عسى الطيـب فالـه والابـل معلـوم بالايـدي عقـالـه خمـسٍ قليـلٍ بالقصـايـد مثـالـه وباقي القصايد كالزهر فـي شغايـاه وقصيدته في دلة(ن) تقـل غرنـوق وريح القهاوي فايح يفضـح السـوق في مثلها ماهو من النـاس مسبـوق حيثه بنفس الوقـت بالقـاف سـواه وجت لـه عنـود لاختبـاره بياحـي وقالت ترى قلبي تقل سمـح ضاحـي يامن يلم السمـح والسمـح راحـي قال المطر يسقيـه والحصـد يقفـاه ومثله لابن مجلاد ياصف بها الكيـف وذعـار بعتيبـه بديـع التواصيـف واللـي دلالـه كالبطـاط المهاديـف ودغيم اللـي شاعـر الربـع ناحـاه وقامـوا بتقديـم الثلاثـة فناجـيـل لشيخ الجموع اللي يقـود الرجاجيـل والفارس اللي يتعب الهجن والخيـل ثـم الكريـم الله مـن الفقـر ياقـاه وهايس عطى الاول لطيـب العقيـدي والثانـي المكـرم ونـاره وقـيـدي والثالث الفـارس سطـام الضديـدي وذعـار خالـف بالفناجيـل وايــاه ذعـار حـط المرجلـه للشجـاعـي ثـم العقيـد اللـي كلامـه يطاعـي وراع الصخى مشبع بطون الجياعـي وهـذي تراتيـب العتيبـي ومـدلاه وزيد الخوير اعطـاه راع الشجاعـه ثم الكريم اللي عطى النـاس صاعـه والشيخ ابن شعلان بالوصف طاعـه يـوم الـردي كل(ن) يسبـه ويشنـاه واللي رمى النيشان من روس قحطان حط الكريـم مقـدمٍ طـول الازمـان بقصة حريـم عيالـه اللـي بقيفـان في خاتم مـع سكـة الـدرب لاقـاه وهذا الصحيح ان الرجـال الكرامـي بصدور كل النـاس مثـل الوسامـي وعنـد الخطـأ مايلحقونـه ملامـي ويستاهل اللي ساق مـن كـد يمنـاه ومطلق شكى همه لمن يعلـم الغيـب وغادر دياره عقب قشـر التجاريـب والحـر لاصكـت عليـه المخاليـب يرحـل ولايقعـد بـدار المهـونـاه وعـاف التبينـاوي لذيـذ المنامـي يبكي علـى ذبـاح عجفـى سنامـي ويانجـد ناحـي ضدنـا بالجهامـي اقفـى وخلانـا والاشعـار تـرثـاه واللي بالاجرب صار مذكـور سيفـه بالقـاف يظهـر للقرابـات حيـفـه وطار الكرى من موق عيـن كسيفـه باسباب من خالف لتركـي وصايـاه وفيصل يعاتب صاحب بالـردى بـاق وقصره لهم عن لافح البرد مشـراق ويقـول ذا قولـه وبالـرب وثــاق ويمدح تميـم اللـي للاتـراك مـاذاه والشيخ جاسم في قطـر لـه مكانـي وانا اقصد اللي يشتهر بابـن ثانـي قصيدته باهـل البـدع بـه معانـي وفيها لمنهاج السلف خـوش شـاراه وقصيدتـه بالخصـم فيهـا لطافـه واحذر تـرى الثنتيـن بالـلام قافـه لاتخلـط الثنتـيـن والله حسـافـه وثنتين للقاضي على نفـس منحـاه وعنـده حزيـن قـال شعـر حزينـا وحنـا شبعنـا بالعنـاء وارتويـنـا ويامـا علـى مرسـام بيتـه بكينـا هـذا محمـد والفياحيـن منـشـاه وان طبت ياراسي كسيتـك عمامـه لابـن سـرار اللـي شهيـر كلامـه وهو من بني شهران رمز الشهامـه وابنه عمرو جاء من خوالـه وداواه واشعار غانم يشعـل الحـرب قافـه وردهـان يطفيهـا ويمنـع جفافـه ويجيبهـا العونـي ويلعـن سقافـه قافه مثل ضـرب المدافـع سمعنـاه وقصايـد الحكمـه والاجـواد كـاره ابوزويـد قــام يتـلـي مـسـاره وابن شريم اللي مشـى فـي قطـاره اللي بحرف الكـاف سـارت سرايـاه مثل بركات اللي على الكـاف شـده نصح(ن) بتجريـب الزمـان استمـده والدسم فـي نصحـه للاخـوان رده غير الشوارد كالـورود الغضيضـاه والا البـرازي فـي غرايـس منيـره يسمع لشيـخ بالجبـل بـان خيـره واعطاه شـارات الزمـان الخطيـره وشافه وقال ابيـات شعـر عجيبـاه ويانجد من سماك نجد غوى اسمـاك واللي على الرجلين ماهـو ولا ايـاك فهد وطى منهـا مشاويـل الاشـواك ابـن صليبيـخ الـذي ذاق مـكـواه والاشقر البيطار نافـح عـن الـدار والزير عمره ماولـد تيـس وجفـار عاتب فهد ياناس في زيـن الاشعـار لكن قصايدهم كمـا المسـك طريـاه ومثله شكى من قـال شابـت لحانـا شابـت وحنـا مـا لحقنـا هوانـا وفقـر القرايـا فـي نعالـه وطانـا رجل مـن الاسيـاح يشكـي بدنيـاه اما الغـزل باللـي جمالـه مليحـي هـذي لمحسـن قافهـا والوضيحـي وابن سبيل جاب وصـف صحيحـي ولاتاخـذ الدنيـا خـراص وهقـواه ورميح له قـاف لعـن فيـه قطـاش يزعل على مالون ويرضى على ماش وساكر دعى له دعوة تقـل رشـاش باللي ذبـح ناس(ن) تقيـم الصلـواه ايضـا وصوفـه للذلـول الاصيلـه وابوزويـد لـه وصـوف جميـلـه لاشك عايـد صعـب تسمـع مثيلـه في وصف زينات الركـاب الاصيـلاه وابن دويـرج جـاب قـاف طويلـي في وصف ريم رمش عينـه ظليلـي اللـي رمتنـي بالمحـبـه عليـلـي مثـل الـذي قبلـي تعـرض للآفـاه اللي وقع من رمش خاضـب كفوفـه ولاجل المحبه طاح يشكـي حتوفـه مثـل الدجيمـا والمطـوع حسوفـه ومخلد نخـى وادرك حبيبـه بلامـاه واللي لبس من شدة الوجـد خيشـه باسباب ريم طاح من قصـف جيشـه وصارت حياتـه بالمحبـه غشيشـه محمـد العمـار بالشعـر مـا احـلاه واللي لاجل خله شرب كاس الامـرار ونخى منير وصاح في زين الاشعـار ويامنير ماجاء لك عن التـرف ذكـار وذبح غريمه وانتحـر عقـب بلـواه ومحدن جهل قصة غـرام الرويلـي محسن طواه العشق وامسـى ذليلـي ونخى خلـف راع المقـام الجليلـي ومشـى لعينـه بـس ربـي توفـاه وثلاث الاخوه مـن عيـال الجلاعيـد واحد ورى الثاني يموتـوا مشاريـد باسباب زين العين والـردف والجيـد وام الثلاثـه بالحشـى نـار شكـواه واللي شكـى همـه لـورق تنوحـي يقول روحي كـن روحـي تروحـي ابراهيم بـن كنعـان قلبـه يفوحـي ناظر شريفه والمـرض قـام ياطـاه واللي غدى يذكـر وصايـف هلالـه وهي تطلبه بالطيـب يتـرك حبالـه في مجلسه والنـاس تشـرب دلالـه وعادي عطاه وشال بالصـدر لوعـاه وجتنا علوم رجال طاحـوا ضحايـا ولا طـاح بـدروب المحبـه صبايـا باسباب ضعف البنـت بيـن البرايـا ترضى وكل عهود الاحبـاب تنسـاه واكثر فحول الشعر لاهـل القصيمـي جابت رجال(ن) شعرهـم بالصميمـي في وقتهم بالشعر مـا لـه لطيمـي وثلاثة(ن) منهـم لحـايـل خذيـنـاه اول كسايبنـا خذيـنـا السنـيـدي اللـي بجيرتنـا وطيبـه سعـيـدي يقـول حايـل هـي هنايـا وعيـدي وحنا من صنوف الحبابـه عطينـاه والاشقر اللـي ساكـن فـي حشانـا اللـي بقيـفـان الحمـيـه كفـانـا الشاعـر اللـي بالمـوده شـرانـا وحنا علـى درب المحبـه شرينـاه ومحمـد العونـي شديـد النخـاوي اللي كما ذيب علـى الجـال عـاوي قصايـده تطلـق سبـوق النـداوي وصارت سبب سجنه وحزنه وبلـواه وفي قرننا الرابـع عشـر يالاكـارم جيل حـوى عـدة فحول(ن) صـوارم وهو عندنا نسميه جيـل الخضـارم واشعارهم في سهـل الالفـاظ تلقـاه مثل السديري مـع رشيـد الزلامـي ومحمـد الديـري رفيـع المقـامـي والا الازيمـع فـي لطيـف الكلامـي مع زبن ولـد عميـر مابـه مـراواه وقصايد شاعـت لصقـر النصافـي وبدر الحويفي بالقنص غيـر خافـي والا التبانـا عاسفـيـن القـوافـي والخس مع عادي وابن عون ناجـاه والا الفيحانـي بالقصيـد الثميـنـي اللي كسـى قافـه بعقل(ن) رصينـي خالد جمـع بالقـاف دنيـا ودينـي يشبه قصيد العـود مطلـع ومنهـاه العـود جـدي كالجواهـر قصـيـده فـي دلتـه والا العـنـود العنـيـده لـو تكثـر التـرداد تبقـى جديـده وصارت هي اللي من حلاله ورثنـاه والجيـل هـذا جيـل بنـدر وكـادي اللي شهد لـه حضرهـا والبـوادي ابن سـرور اللـي وطـى كـل وادي في وصف زينات المواتـر وطريـاه وقصايد النسـوان حرفـه نشيطـي مثـل الدقيـس وحبهـا للسويطـي ومثله مويضي ثـم بنـت السليطـي ندمت على اللي طاعها في وصايـاه وظويهـره قافـه سبايـب حروبـه بنـت الشـراري للرجـال مهيوبـه ومويضي العجمـان قافـه عجوبـه وجديع لاجل الشعـر يانـاس خـلاه وهياء تحب الطيـب بنـت العيـاده اللـي تريـد الطيـب لـو قـل زاده والعرفجيـه لـه بطيبـه شـهـاده وابوطلال اللـي شهـد لـه بذكـراه والشبرميـه حـذرت ربعـه الــذل جابت كلام كالرصـاص ابهـر الكـل وبعذر السحاب اليـا تـرزم ولا هـل وفكوا دخيل البيت حـوض المنيـاه مع نـورة الهوشـان شافـت قليبـه واللي نبـي عيـا البخـت لايجيبـه صارت مثـل للـي عسيـر حبيبـه من جملة امثـال الرجـال الشهيـراه مثل الذي يشرح همومـه والاسبـاب وقال ان هذا هو بلى ابـوك ياعقـاب قاله نمر واليوم فـي كـل الابـواب مايوم يمضي كـود نسمـع بطريـاه مثل الذي يرجـي صـدوق المخايـل اللي رزق داب(ن) بـروس الطوايـل اعمـى ولا هـو للبـوارق مخايـل وحجرف خذى منها دلايـل وعبـراه وراع الغلط يلقى الشماته من القـوم ومن طاوع الثنتين يصبر على اللـوم النفـس والحرمـه تخليـك مهمـوم مع عبد ابن هـذال والركـب خـلاه ومثل الـذي ينـذر قضـاة القبايـل لا صار ميزانـه عـن الحـق مايـل وقاضي السماء يعلم جميـع الفعايـل والشيخ جاسم قـال الاعمـال يلقـاه وتقـول للـي حـط للكـذب تمثـال يظلم كرام النفـس ماضيـن الافعـال والقـد مـا لانـت عراويـه بتفـال في شعر ابن لعبـون تلقـى ندايـاه ويقـول للـي طـاح والخيـر فاتـه واصبح قريبن ياعـرب مـن وفاتـه محدن يسـد السيـل عنـك بعباتـه وبعـض البـلاوي ماتـرده بفزعـاه وتقـول للـي بالشرابيـك بلـشـان اضرب على الكايد اليا صرت بحـلان وعيبن على اللي يختفي عقب مابـان لابن رشيـد عبيـد يخبـر رعايـاه ومثله على المعنـى اذا كنـت داري والعمـر ماياقـاه كثـر الـمـداري عن مقعد(ن).تصبح من العـز عـاري هذي لتركـي شيـخ نجد(ن) ومركـاه واللي يدوهج بالسهـل مـع جروفـه من دون حاجه تفرضه لـه ظروفـه ومشيك بلاحاجـه تـره قـل شوفـه ابوحمد قالـه علـى حسـب رويـاه والصدق يظهر لك على كل الاحـوال وماضاع وقت الصوم يظهر بشـوال والناس تـدري بالجدايـد والاسمـال لابوطلال الشيخ فـي شـرح بلـواه واضرب ولدك ان كنت تبغيه يشفيـك ولو زعلـت امـه لاتخليـه ياليـك وتيس(ن).يحطه وال الاقـدار بيديـك بركات قالـه فـي مثانـي وصايـاه ومن كدر الصافي شرب مـن زلالـه والـدار تحمـي بالشواطيـر جالـه وان كان ماتـدرى عواقـب رجالـه قال الوبيـر البنـت يكشـف مغطـاه واللي يباعـد عـن دروب الهوانـي ولا ياخذ الحاجه عقب شخص ثانـي ولايشـرب القفـوات كـود الهدانـي لراكان بـن حثليـن قافـه وحليـاه وهـو قـال قول(ن) لـلاوادم ذخيـره والهرج يغني صاملـه عـن كثيـره عن عالم(ن) بالهـرج يكثـر هذيـره وياشين هـرجٍ زايد(ن) غـاب معنـاه واللـي يفكـر بالوقـوت الخوالـي وانته تشوف الهـرج مالـه مجالـي تقـول لــه ياهـيـه ياهمـلالـي قاله جديع الشهم في وصـف دنيـاه واذا نصحنـا اللـي برايـه عصانـا نقول لـه لاشـاف صـادق هوانـا انته تقـول هنـا وانـا اقـول هانـا في قاف ابن سراح والجـوف مربـاه والنـاس بالهمـه وصوفـه بعـادي والحر الاشقر لا لقى الجـول صـادي والتبع يفلس مـن عمـود الجـرادي هذي لابـن خربـوش راع الجزيـلاه واللي لقى عنـد الجماعـات غيضـه من عالم(ن) صارت قلوبـه مريضـه شمس الخيـار ولا ظـلال الفريضـه هـذا المزينـي بالبيـوت الثميـنـاه واللي يبي يسلم مـن النـاس كلـه مـدام قـرب النـاس للقلـب علـه ولا جنبـك شـر المخاليـق خـلـه قضيـب قالـه والقصيـده ذكـرنـاه واللي يشوف الناس تحتاج توضيـح والطيب كلٍ نـال مـن هبـة الريـح قسم(ن) وهو بين الوجيـه المفاليـح العنقـري قـالـه لبنت(ن) تـهـزاه وعبيد عاش وشـاف جـور الليالـي الاسعـدي راع البيـوت الجـزالـي والعود يـوم انـه يجيـب العيالـي يبـي بتـال العمـر لـذه وطـربـاه والا الدقيـس ونصحهـا للرفـاقـه ولا تستخيل البرق لـو هـو شفاقـه ومن لا يـودك نـور عينـك فراقـه بيتين تسـوى لـه قصايـد وقافـاه والثالثـه تسلـيـم رب السـريـره ويالله عسى ماتكـره النفـس خيـره للـي جعـل رب البرايـا ذخـيـره سبحان رب العـرش رب السمـاواه وهذا جري زيـن المثـل داج سوقـه والعوشـزه ماينـزل الطيـر فوقـه ولا به مقيـل لواحـدن بـان ذوقـه هذا الشريف اللي خذى المجد والجـاه او راضي القصـاد جـاب النصايـح يقول شـاور مـن يحـوز المدايـح واترك كلام اهل الـردى والفضايـح ومن شاور البايه علـى قالتـه بـاه واللي درس زيـن المثايـل دراسـه وراع الجحش يلبس مع الدرع طاسه بوقتن به الحصنـي يـدور الفراسـه ابـو زويـد جابهـا طـاب ذكـراه والثالثـه قالـه يـحـذر رجـالـه اللي تهيـن النفـس ترجـي ريالـه تر ربـع يومـن مقعـدك بالشكالـه تسوى حياة العفن وسـط المهونـاه واللـي يهـدد واحـدن بالنـكـادي من عقب صبر(ن).مثل صبر المهـادي قـال الوعـد لاسـال بالغيـث وادي هـذا اللميـع يهـدد اللـي تـحـداه وثوب المعزه لاغـدى فيـك ضافـي تقـول باقـي عمـرنـا للـذلافـي واليا حصل عز(ن) مع الكيـف كافـي زيد الخويـر وقـال مابـه حسافـاه واللي يسير بـدرب ماهـو وكـادي يظـن فعلـه بالعـرب فعـل عـادي ويغويه عن نقـل الصميـل البـرادي وابن سبيـل قـال للنـاس شوفـاه وان جيت تنصح واحدن مـال شيلـه وتبيـه يفـزع للسيـوف الصقيلـه والحـق ظلمـاء والمصقـل دليلـه لظويهره تشكـي طبـوع السبيـلاه واللي نشـد يبـي الكـرم والوقـاره تعطي وصوف الرجم في راس قـاره مار البلـى دونـه جحـور وخبـاره هذا الرويلـي ينـذر اهـل الرديـاه وراشد يقول الثوب لو كـان خيشـه او عاش عمره ساكن(ن) في عريشـه شربه قراح الماء مع النـاس عيشـه لاصـار مكفـي الهمـوم الشديـداه وان صار فيه امرن يجي منه مثـلام وتبي العرب تسرع مع الطير لا حـام شـي يفـوت البارحـه كنـه العـام ردهان قاله واخمد الحـرب واطفـاه واللي نخى بالطيـب يبـي الرفاقـه يبي الفـزع للقلـب حيثـه شفاقـه وما من ورى عوج النصايب صداقـه يقولـه الهربيـد وجريـس شاكـاه ومن لازم المشراق فـوق الوسايـد يمـوت ماحاشـت يديـه الفـوايـد ومن طاب ينخى في وقوت الشدايـد هذا الخـلاوي زيـن قافـه ومعنـاه واللي خذى زين المثـل دايمـن فـن وحصان طيبـه بالملازيـم مـا كـن واعرف ترى سن اللبن يقلعـه سـن لمحمد بـن سعـود والزيـن يزهـاه وياحيف وان الحيف مايقري الضيـف من لابة(ن) لاغبت عنهـم مواليـف وان جيت مجسلهم تجندت بالسيـف لسمير بن زيـدان شيخـن عرفنـاه وكان القرابه في غثى البـال هانـوك تقلط على البارد وتنزح عـن احـوك ولا ينكره بعـد الرفاقـه اليـا اوذوك يقولـه النـوري لنـقـوة دنـايـاه واللي مشى بالراي عكـس المسـارا زوجة جديـع اللـي تـدل الحيـارا واللي يضيـع الليـل يرجـي نهـارا ومن ضاع وقت الظهر ضاعت حلاياه وابالشيـوخ افعـال غيـره حمدهـا خلف اليا جاء الخيل يقطـع جهدهـا والطيب واجـد ميـر هـذي وحدهـا يمدح رجال(ن) طيبهـم طـال مبنـاه والله نشد ياحمود عن معرفـة يـوم الاحمدي قالـه لاجـل يتـرك الـدوم وياحمود يظهر لك صديقن من القـوم وتاتيك من بعـض القرابـات غـاراه واللي تسبـب فـي شباك(ن) تصيـده ومن فعـل كفـه ذاق همـه وكيـده وكم لحية(ن) جاها خراها مـن ايـده بنت السليطـي قالتـه عقـب بلـواه واللي تغـرب عـن ديـاره وريفـه والطيـر بالجنحـان محـلا رفيفـه ويمنى بلا يسـرى تراهـا ضعيفـه هذي لابن روسـان عقـب القرابـاه واللي عطى غيـره مـن الغانمينـي ولا يستعيـده فـي قسـاوه ولينـي وحنـا عطيتنـا عطـيـة غبيـنـي لهايس من المجـلاد وذيـاب راكـاه ومن قال انا ضيم النشامى يضامـي ويلقى على قولـه عتـاب وملامـي بشعـر الهـلالات الفحـول القدامـي وبعض الرواة لساجر الطيب ينصـاه واللـي بصـدره حاجـة ماهرجهـا ضايق ويرجـي مـن وليـه فرجهـا نقـول رجلـك بالوسيعـات سجهـا قول السديـري للـذي عـاف دنيـاه ويقول ظلم اهل القرابـات حسـاس وكان انهم كانوا سبب كل هوجـاس مالك مشاريهن علـى نايـد النـاس للـي ربوعـه دايـم الـدوم تشنـاه واللي يسولف فـي مجالـس هملهـا لو هي هروجن مثـل ريحـة نفلهـا تسمج اليا عرضت على غيـر اهلهـا في شعر قحطـان الجليلـه سمعنـاه واللي يذوق الجور والوقـت واطيـه يبي لطيف القلب عن شـوف قاسيـه حيثه ليان ومن لقـى الليـن يتليـه يقولـه الهجلـي لشيخـن ترضـاه وحسد العرب مسبوك في ضامره سبك وان شاف طيبك بين الاقوام حاربـك لافاعلـن فعلـك ولاهـو مجنـبـك هذا الزلامي يخبـرك كيـف دعـواه ومن لايقلط شذرة السيـف والكيـس ويدوس صلب الراي من قبل لاديـس والقصر مايبنى على غيـر تاسيـس هذي لتركي عـن دروب(ن) تمثنـاه ويقول للي مات مـن شـان دينـار هرج(ن) يشادي طلع زينـات الاثمـار اخيـر منهـن ركعتيـن بالاسحـار لا نام خطـو العفـن دفيـان بغطـاه واللي كثيـر النـوم يخسـر شبابـه والنوم ساس اللوم بان الـردى بـه والنوم ماهـو مـن طبـوع الذيابـه مريبد يقول احذر ترى النوم مضمـاه بدعـت خمسمائـه بكـل القـوافـي فوايـدٍ تكشـف لكـم كـل خـافـي من شاعـرٍ ثوبـه نظيـفٍ وضافـي ورقى جبال الصدق ما هـاب مرقـاه وهي قطرةٍ من وسط هايـج بحـوره غير الذي بالصـدر فاحـت عطـوره مكتوم عن خبـل الخلايـق وثـوره في وسط ديـوان الضمايـر كتمنـاه سوالف(ن) للطيـب صـارت دلايــل وفيها لصدق الهـرج قـول وفعايـل والصدق واضـح ندعمـه بالمثايـل من راوي(ن) في مصنع الذهـن نقـاه جاب المثايل في جميـلات الالحـان اللي يناديه العـرب يابـن غسـلان والله فـلا تـوزن حروفـه بالاثمـان ومن يبذل المعروف له يـوم يلقـاه ذكرى لمـن ينشـر دروب المراجـل وقاسى طعونـن موجعـاتٍ عواجـل من فوق طعنـات العيـون النواجـل من رمش ريم(ن) عذبه يـوم راعـاه ماصغتها لـولاي احاسـب ضميـري مـادام مالـي بالخلايـق نصـيـري الجهـد جهـدي والكرامـه لغيـري وان طحت محدن قال يالربـع ويـلاه ان طاب غيري ثاروا الربع تصفيـق وان طبت انا تسكت جميع المخاليـق وانا ادري انه نقص ذمـه وتوفيـق ولاني من اللي يرجي النـذل حسنـاه ابـي عزيـز الخـال يكفيـن شـره وان جــاه ذكــري قــال لله دره وراع الحسد فـي هرجتـه لا يغـره ويخاف رب العـرش قبـل المنيـاه ياما وقعـت مـن المغثـه مريضـي ومن طحت عنده ثار مثل العضيضـي وان كان قلبي في حياتـه حضيضـي اكفـخ كمـا طير(ن) عجاجـه تقفـاه عن عالم(ن) تفرح وتنشـر عيوبـي وحدوني ارحل مامعـي غيـر ثوبـي وصارت على الدوحه نهاية دروبـي ياجرح من ضاقـت طواريـق دنيـاه سريت يوم الهيـس بالليـل هاجـع ينقل جنوبـه فـي ليـان المضاجـع يظلم ويرقص تحت الانغـام ساجـع والظلم يهدم سـاس ملكـه ومبنـاه مااطيع في مدح الخسيسين مااطيـع ومااريد يالناقص فلـوس ومشاريـع هذي تفيـدك مـع فـروخ الجرابيـع ماهي مع اللي ماتجي مثـل ماطـاه لاتحسب انـي مـن عبيـد الدراهـم وتراك في بعض الهواجيـس واهـم الكذب بعيـال العـرب غيـر راهـم وصعبن نـدوس بخطة(ن)مارضينـاه اعيـش كنـي للمخاليـق شمـعـه توضي وترسل من لظى النار دمعـه وديارنـا عفنـا كسـوره وجمـعـه لولا عجـوزٍ تفجـع القلـب فرقـاه ياقـرب يــومٍ لابـتـه يفقـدونـه ان جـاء عنيـدٍ وارمـاتٍ جفـونـه وعجزوا بساعات الرخـى يكتمونـه وقالـوا حسافـة سيفنـا ياحلـولاه والحمـد لله عـد مـا لاح بــارق واعداد نجمٍ في دجى الليـل شـارق من خافـقٍ تكويـه نـار المطـارق وبأهل الجبل تبقى مدى الدهر ذكـراه الشاعر والراوي والمؤرخ / فواز الغسلان
|
||
|
|
| أدوات الموضوع | إبحث في الموضوع |
| انواع عرض الموضوع | |
|
|
العرض الشجري