هالايام مدري كيف قد مطمع الرجال

هالايام مدري كيف قد مطمع الرجال
يموت بسلام وله وقاره وله قدره

من اول طموحه وين، يبني وطن واجيال
وهالحين بس يعيش، يا واسع القدرة

أفا يا وطن صاروا عيالك على هالحال
ومواردك فيها خير ما تشتكي ندرة

لكنه نهبها الشيخ واللص والمحتال
والانسان مثل البحر ما ينومن غدره

تبدلت فينا يا وطن بالعرب الانذال
يديهم تقاطر حقد ووجيههم ودرة

يشوفون رزق عيالنا حفلة استغلال
وكلٍ يحوش الجمرة الحية لقِدره

نعاتبك وآشدّ العتب شي ما ينقال
مثل دمعةٍ -والراس مرفوع- منحدرة

لكن الارض تاسع كل حرٍ حداه اللال
يهاجر بعيد ويرفع الغم عن صدره

تهونين يالغربة على البعد والترحال
ولا غربةٍ بين المعيذر وابو سدرة

د. عبدالله السالم
ناقد وكاتب قطري