قصيدة ومجاراة

- قصيدة اغاريد السعودية

كل ما جيت ابسلى عن غرامك واتوب
جددت جرح قلبي لك هبوب الريـاح

جت بطاريك عندي كم نسمة هبوب
وانعشت ذكرياتك ماضيات الجـراح

واشرقت شمسك اللي باديه بالغـروب
واستبّد العنـا والهـم بـي والنـواح

ول يا قلب فارقت الفـرح والطـروب
ونجمك اللي رجيته في سما الحب طاح

ولو تهربت ماينفـع كثيـر الهـروب
اه واسدّي اللي من ضنى الوجد بـاح

لابسن لك عن الهجران والصّد ثـوب
وان شكيتك تقول الحب ذنبـه مبـاح


- مجاراة عبد الله بن عون

هيه ياللي عليك الناس تمشي دبوب
ليت من يدري انته غيم ولا ضيـاح

كان من ريم نجد ولانت بس بمعروب
واهني من لقف لك بالهـوى يـا رداح

عاشقتك المسامع قبل عشق القلوب
وامغلوث الهوى لو طالع البرق صـاح

لا تهيج صبابة كـل قلـب معطـوب
اتغزل من الغزلان مـوت(ن) ذحـاح

زدت نار المحبه من حطبكم شبـوب
ما يطفي للهبها شرب مويـة نسـاح

من شرب حب مثلك ما هناه الشروب
لو تسلسل على كبده لذيذ(ن) قـراح

كل ما جيت ابنسى الحب غنّى طروب
واستمال الحشاشه له طرب وارتياح

بالغطاريف دوبه ينعش القلـب دوب
مثل ماينعش الظميان برد الصبـاح



- رد ابن عون على كريدي

هيه ياللي يهيظك الطرب والعجـوب
وش محرك حصاتك وانت مالك صلاح

احسبنك رفيقي فـي غيابـي ينـوب
واثرك اللي على الغرّة يصيبه شفاح

كل مادرت وجه الراحله يـم صـوب
عارضوني مقاريد العـرب بالسـلاح

ودي انصحك ياراع الحصان الهذوب
حيث ياجب علي معاملـك بالنصـاح

الخطا والتعرض منك مالـه وجـوب
والنصيحه تفيد اهل القلوب الصحاح

وكل وادي على مجراه سيله سحوب
سيل وادي الرشا ماطب وادي رمـاح