} أبو وجهين والنمّام والمغتاب والكذاب

أبو وجهين والنمّام والمغتاب والكذاب
_____________________


أبو وجهين والنمّام والمغتاب والكذاب
هذولا الأربعه هم بالصراحه شر خلق الله

أبو وجهين في صفك قريب وكنه من لحباب
وفي صف العدو ضدك يحد السيف ويسلّه

وترى النمام من يفسد ما بين الناس والأصحاب
ولو يسمع طرف كلمه زرع منها مية علّه

وترى المغتاب من يشتم ويتكلم في الغيّاب
وياكل لحم اخوه المسلم اللي من هل الملّه

ورابعهم كذوب يحرِّف الكلمه بدون اسباب
فلا تاثق يلا تكلم ترا هرجه كذب كلَّه

صفاةٍ كلها في حكم شرع الله سوى في باب
ذنوب من الكبائر يا عسى الله يغفر الزلّه

ولا يمحو الكبائر يا هل المله سوى من تاب
وعسى الله يغفر ذنوب البشر دقّه مع جلّه

هو التواب والغفار ياللي للعلى طلاب
توجّه بالدعا واسجد وكبِّر له وهلّل له

ترى الدنيا دنيّه ما تساوى لك جناح اذباب
ولو دامت لحد ما جت إلينا لابسه حِلَّه

ويا كم نجم نوّر في سما الدنيا وشاب وغاب
تمعَّن في كلامي يا ذكي وأرجوك تفطن له




الشاعر : مبارك طالب الربيعي المنصوري