واحسب حساب تغيرات التضاريس=قدام تصبح للكوراث فريسة

لو ما تعشى غير حبة تميسة=
يعمير بتويتر والتيوب والفيس= انشر بيوتاً بالدفاتر حبيسة
لعل يتغنى بها حادي العيس=اليا رعى في منبت العشب عيسه
ندر بيوتاً ما نظمها امرئ القيس=مثل الجواهر والعقود النفيسة
ابوك متلقي من الدهر تدريس=ومحيط فكري يتعب اللي يقيسه
واقول يامن تدرك الميز والقيس=لو ما تعشى غير حبة تميسة
اخير من تقلط وتدني على تيس=بضيافة اصحاب النفوس الخسيسة
واليا اعترض لك في طريقك عواكيس=ادعس على صل الخبارة وديسه
واحسب حساب تغيرات التضاريس=قدام تصبح للكوارث فريسة
واخذ المعارف من بطون القواميس=علم الهدى ماهو بعلم الكنيسة
واحرص على صحبة رجال النواميس=والشخص قالوا ينعرف من جليسه
واتجنب الناس الخساس الدنافيس=عميان الاريا زارعين الدسيسة
وتجنب الرعديد واللاش والهيس=اهل الوجيه الكالحات البئيسة
انظر وتلقاهم سوات الجواميس=خصوص لا شافوا صحون المريسة
ولا تصحب الا النادرين السناعيس=اصحاب الانفس والوجيه الونيسة
اخوة وفاء وبحزة الجد فريس=وقت الملاقى يوم يحمى وطيسه
اليا هرج هراجهم في المجاليس=منطق لسانه يجذبك مغنطيسه
يهرج وهرجه مايجي فيه تلبيس=دايم وهو متعوذاً من بليسه
واشعل سراجك في ظلام الحناديس=حتى يجي للنار قدح وقبيسة
واليا بدا اسبوعك بلكمة وتبقيس=اغنم ربوعه قبل يقبل خميسه
واليا ارتفع صوت الغنا والمروايس=ما كل مرساماً يهنى عريسه
وفي السباع ذويب وكليب وبسيس=والغاب ميّز* هيصره من بسيسه
واليا افتقرت ازبن غناة المفاليس=راعي المقر اللي تعالى حسيسه
اليا نصوه الاشقياء المتاعيس =اعطاهم اغلى ما بجيبه وكيسه
واجعل شموخك فوق كل المقاييس=لو تشرب امرار الحياة التعيسة
وانشر بيوتاً في بطون الكراريس=ياكم لها وسط الدفاتر حبيسة
جندب المالكي=