يابن الحلال ان طاب خاطرك منّا

يابن الحلال ان طاب خاطرك منّا
قلي وانا ماني على الدرب عاقه

انتم على ماقد نويتو وحنا
اهل الشموخ اللي جويدٍ وثاقه

وان شفتنا في بعض الاحوال لنّا
تراه من باب الادب و اللباقه

حنا خفاف نفوس لاتحسب انّا
بيتٍ عموده مايقوم رواقه

من زان زناّ له ومن شان شنا
حتى يتوب من الجهل والحماقه

نرجح بكفة عصبته لا وزنّا
والموج نعرف غبته من زراقه

ماننخدع في قول كنا وكنا
ونشوم عن بعض العلوم الدقاقه

من صد عنا لو زعل ماشحنا
نعطيه في وجهه ونكسب فراقه

عاد انت هاك موثق العلم منّا
فحوى الكلام يبين لك من سياقه

قلنا بعد باسم العزيز استعنا
منّا الى من خان عهد الصداقه

اليا بدا لك هجرنا لاتونا
انس العلاقه وانس راع العلاقه


نجم الاسلمي