ديوان قصائد لشعراء المملكة العربية السعودية (متجدد)☘️☘️

الأمرعاتي


جيتها زعلان منفوخه شفاتي


والغضب والبهذله باين عليه
قلت يابنت أسمعي والعلم ياتي


أفهمي والسالفه ماهي شويه
طالعت قالت تفضل لا تحاتي


خير يارجال قل وأيش القضيه
قلت أناقررت أعيش مع حياتي


بأتفرغ وأعتزل كل البريه
باعتزل واقعد مع روحي وذاتي


صارت العيشه مع العالم شقيه
بس باوصيك وانتبهي وصاتي


نفذيها لاتخلين الوصيه
احذفي بني وجوالي وكاتي


والبرامج كلها وأنتي ذكيه
والقصايد والصور ومحادثاتي


امسحيها مسح لايبقى بقيه
وانا باغير جميع معرفاتي


ودي أصبح شخص مجهول الهويه
وان جتك أخبارتنقل لك وفاتي


أحفظي مابيننا وأنتي وفيه
ضحكت وقالت من الله الثباتي


أدري إن الضحك من شرالبليه
وأيش عندك ياكثير الموعظاتي


يامطوع لاتكن ناوي بنيه
عش حياتك وإعتزل والامر عاتي


لاتفلسف وانت عند العبقريه
قلت يعني ما زعلتي يافتاتي


وأنا خفت تجيك جلطه يا بنيه
ردك القاسي تري كسر عصاتي


كلمتك يا حلوتي كلمه قويه
قالت اسكت بس يازين السكاتي


وانت تعرفني ترى ماني غبيه
أعتبرت السالفه ضحك ونكاتي


تتهمني بالقسا وانا بريه
عش حياتك يعني ادخل في عباتي


الحياه أنا وأنا الدنيا الهنيه
فز قلبي واني اصحى من سباتي


والمشاعر بعد قسوتها نديه
اي نعم والله ياسكر نباتي


الحياه أنتي نعم ميه بميه

عيسى المحبي