فوق هام السحب ( الشعر الشعبي) على متن القوافي

مثل من يحجب بيده عن عيونه شعاع النور
‏انا وشلون بنفي فقدك وتأثيره وجوره

‏فقدتك كني أول من فقد غالي وعاش الدور
‏ولا احد قد فقد غالي قبله ويفهم شعوره

‏عبث تحضن خطاوي الدروب ودمعي المنثور
‏تطلعه ابتسامات الرضا والحب من طوره

‏كأني وان عرفت سرور قبلك ماعرفت سرور
‏او إن القلب زهّده الحزن واستكثر سروره
‏
‏اشوفك كل ماغنى على غصن الشجر عصفور
‏ولا عاد الشجر نفسه ولا غصنه وعصفوره
‏
‏يمر بعيني اشهی ماخلق ربي بدون شعور
‏صحيح إن القلوب جنود منهيّه ومأمورة

‏حبيبي مابقی دافع وسط بالي ولا لي دور
‏والارض اصلا كذا ولا كذا بالناس معموره

‏انا لو ذكرياتك ماتعمّر بالي المهجور
‏تعدّته الطواري من فزعها وانهدم سوره

‏على وجهك تحاسيف الزمان وصوتي المكسور
‏ياضيعة جرة انسامه من الصدر ومن كسوره

‏تركت من الجفا قلب يحبك راضي ومجبور
‏ولا ملله طول البعد منك ولا معي شوره

‏عسی الله لا يضيع لي سنين وجعلني مأجور
‏ولو ماتدمل اعذارك جروح القلب معذوره

‏احسك اقرب من اني اقول انّا ظلال وسور
‏واحس الأرض مادارت بعد عينك ولا دوره

‏ على صوره موقفني حنيني لي ثلاث شهور
‏وعيت لاتدور الأرض مادري عيت الصوره

.....