اخترنا لكم

لو ينبت الورد فوق ارض الغياب الهجير
‏يمدي تزين السنين وتترك عماسها

‏اقسى من الدمعْ في عين العزيز الفقير
‏الكلمه اللي تموت وندفن احساسها

‏البارحه ما فقدتك .. رحت فاقد مصير
‏وانت اخبر الناس في (وينك) وهوجاسها

‏كنت اقطع الشك وآخذ في يدين الضرير
‏لين امتلت كل فكره .. شر وسواسها

‏كيف آمنك وانت خايف واحتضر واستخير
‏يا بهجة النفس ، نفسي ضاقت انفاسها

‏حلّلني ارجوك من بعد العَشاء الاخير
‏خانتني الامنيات ودقّت اجراسها

‏ياما وياما طفت شمعه وفاحت عبير
‏بعض الاماكن تضيق بـ ضيق جلّاسها

‏يوم انتظرتك لحالي جيت جمعٍ غفير
‏تبّت يد الذكريات وعاش كرّاسها

‏لو اسهرك ما سهرتك لجل احبك كسير
‏توارد اوجاع روحي تطرد نعاسها

‏الطف من الصبح واعذب من قراح الغدير
‏صوتٍ يمر الليال وينجلي ياسها

‏اخفض جناح الهوى وامسك يديني وطِير
‏محتاجلك حاجةٍ ما دنّقت راسها

‏محبةٍ مابها غصّه و صحوة ضمير
‏حرام ودّك تبور وتعلن فْلاسها

.....