ليتك قبل لا انتفارق طحت من عيني

ليتك قبل لا انتفارق طحت من عيني
عشان لامن نسيت .. انساك بالمرّه

لكنك اقرب لـ ( دمي ) من شراييني
وغلاك له في ضلوعي كرّه وفرّه

اصارحك .. لان مايعنيك يعنيني
واعاتبك .. وانت لعيون الغلا قرّه

خابرك مهما افترقنا ما انت ناسيني
وانا اتذكرك فاللحظه 100 مرّه

اسمك لحاله عن اللي جاي مغنيني
منقوش فالقلب نقش ٍ في صفا الحرّه

الله يسامح خطاك ولايخليني
ان كان الاحساس ماعندك منه ذرّه

وشلون ياللي مصافيني تجافيني
عزالله ان الليال السود مفترّه

لكن وش اقول والا ويش في يديني
مدام عهد المواليف انكشف سرّه

من ضيقة الصدر فيني ما يكفيني
تعيّن زرار ثوبي يالله ازرّه

ان كان ماجيتني يابهجة سنيني
غديت مثل الشهيد محمد الدرّه

ما أظن تبقى عناويني عناويني
يموت فيّ الغرام بخيره وشرّه

مجبور في واقع ٍ ماهوب مرضيني
.هذا مصير ٍ عليه النفس مضطرّه

خذ همي وشوقي وجرحي وسكيني
لـ ( عالم ٍ ) ينتظرك .. ودربك يمرّه

شف عاد قلب ٍ قسمته بينك وبيني
.عانه تقفّاك .. واقتصّك على الجرّه

الله يوفقك .. والله لايعنيّني
الحب .. ماعاد ابي بحره ولا برّه

مشعان البراق