نادوا سميّك وارتبكت وتغيّرت

نادوا سميّك وارتبكت وتغيّرت
كذا ولا ادري وقتها ويش جاني

سكّت حتى اتصدّق اني تباشرت
كنت احسب انك جيت يمّي عشاني

وانا من الموقف ضحكت وتكدّرت
وبشايري مرت مرور الثواني

مع السوالف يوم طروّك سافرت
سافرت لك وانا مكاني / مكاني

قصّيت للضيق التذاكر وغادرت
وقدّمت شكري للقدر وامتناني

أثر الفراق اصعب من اللي تصوّرت
بدت جيوشه تستحل المحاني

آمالي ان عاشت كذا مالها كرت
طاحت من عيون البحور المواني

ماني ب ( قايل ) ليه فالوصل قصّرت
وليه انت متقلّب وهادم وباني

اقول لك يوم انك ل ( صدك ) اخترت
نسيتني .. والا نساني زماني

في سكتك واقف .. وفي سيري احترت
قلي ترى ماعاد لي عمر ثاني

تراي في قيود الرجاء ماتحررت
علّقت في ذمتك .. كل الاماني

مشعان البراق