القلب ياهل الملامة لا تعذلونه

القلب ياهل الملامة لا تعذلونه
دعني على ما اشتهي يا عاذلي دعني

ان هب برد الصبا لبيه يـــاعونه
وان ذعذع الغربي الغربي يولّعني

توهّجـت جمـرة الهـاجس وغليونه
وغنّيت حتى جميع الناس تسمعني

يا هيه مشاعري ماهيب ليمـونـه
ولا فيه شي عن قناعاتي يزعزعني

لا تستفز الحشا وتهيّض شجونه
بالمنطق الإنتهازي صعب تقنعني

من يعشق النفخ عفواً صار بالونه
لسان حالــه يقول انا هنـــا يعني

يستجدي المدح بالْسانــه وبعيونــه
وانا سلومي عن الهفوات تمنعني

اللي بعينه يشوف الناس من دونه
اموت ولا ارتجي هالوجه ينفعني

الروح في صحبة الاجواد مرهونه
مــا عــاد يمديك تقلعني وتزرعني

روّضت حرفي ما عاد اطاوع جنونه
على هوى النفس والخاطر يطاوعني

زمان كنت استشيره واتبع ظنونــه
كـــان يتدلّل ونــزواتــه تــروّعني

وهالحين صار القلم يكتب على هونه
لــو ازهــم الابجديــه جــات تتبعني

اليا مدحـت امـدح اللي يستحقـونـه
اشـاور العقـل قبل القلـب يدفعنـي

ما كلّ زول انخدع في شكله ولونه
ولا كـلّ طيفٍ يشتتني ويجمعنـي

؟؟؟