يا ذيب ياللي بالحنايا لك قنيب

يا ذيب ياللي بالحنايا لك قنيب
أتلفتنـي بعـواك يا مـال التـلـف

دور لجوعك رجم ولهمـي شعيـب
ودور لعيني نـوم لوكانـه سلـف

من بارحة لأولى وأنا أودي وأجيب
طواري منها شعـر راسـي وقـف

تزاحم الضيقات بالصـدر الرحيـب
نفتح ملـف الهـم ونقفـل ملـف

يالله بجاهك من تريديـة النصيـب
وبحماك يالله من مقاشير الصـدف

نشيب ورموش الليالـي ما تشيـب
ونعف وصـدوف الليالـي ما تعـف

وكم خاب ظني وكنت أظنه مايخيب
وكم باروا الأصحاب فينـا للأسـف

وكم صالفت بقعا عساهـا للذهيـب
وفي عـز شدتهـا قلبناهـا تـرف

نقدم على رقـي المنابـر ما نهيـب
إن جات وإلا ما على الدنيـا حسـف

نحيا حياة أحرار راضين النصيـب
ونموت ما تاطى لنا الدنيا طرف

ونقصر خطاوينا عن الدرب المعيب
وبالماقف اللي يبهج الخاطر نقـف

ونطيب لو عيـت ليالينـا تطيـب
فضل من اللي جمٌل الحـال ولطـف

غصب على الوجه الكريه المستريب
وغصب عن الرديان من شق وطرف

مساعد الرشيدي