قبلة احساس القصيد ووجهه وميلافه

قبلة احساس القصيد ووجهه وميلافه
‏من بعد غبتي .. وانا الصبر الجميل وشاحي !

‏كنّ ورا صدري ' يويق الطير " من مشرافه "
‏ما لصوته غير ( نسناس الهبوب ) ملاحي

‏ما حسدت الطير في مرواحه / ومنكافه !
‏قد فلج صدر السماء ( منكافي ومرواحي )

‏كل ما هبت عليّ .. " النسمه الهفهافه"
‏(ضاع قلبي مثل ضيعة طيري وملواحي)

‏لا تلومين المشعّف ' لو يزود أشعافه
‏لاقيً له عنق ( ريميّه ) وعين ( وضاحي )

‏وجهه اليـك ، و" تباريح الحياه " ، خلافه
‏والله ان قلبه خَبل .. لكن "عقله صاحي"

‏مع مرور اللي يذوب الليل بين اكنافه
‏خلّي الصبح يتنفّس واجلسي وارتاحي !

‏في لواحظ عينك يدف الظلام أكتافه
‏الظلام اللي تقدّى به ، ضيا مصباحي !! )

‏ادفنيني تحت وبل الغيمة الشفاّاافة ..!
‏بين خمريّك .. ولمعة ثوبك التفاّحي

‏كن خصرك يوم يبسط للهبوب .. اطرافه
‏تارك(ن)له فرجة(ن) يلعب بها مسباحي

‏تشبهين الشعر حتى في ( عذوبة قافه )
‏كنّك اصبوحة بداها ناصر اِبن مناحي !!

‏ادري ان الفقد موجع وادري الحبّ آفة
‏ما أخبر انه مرنّـي .. ( تيارّه الاصلاحي )

‏وإن هلك طراد شفّه دون سعي اهدافه ..!
‏الصبر منجاي 'والعزم المكين سلاحي

‏يتعب المبدع ما يلقى فـ الحياه انصافه
‏ولّا انا قد جزت عن شفّي وجمع ارباحي ! )

‏ان خفضت جناحي يحجب القمر مهيافه
‏وان رفعت جناحي يضيق المدى بجناحي


تركي العطاوي