يقول من عدا على راس عالي..

يقـول مــن عـــدّا على راس عالي =رجــمٍ طــويـلٍ يدهـله كل قرناس

فـي راس مـرجـومٍ عـسير المنــالى =تلعب بـه الأرياح مع كل نسناس

في مهمهٍ قفرٍ من الناس خالي =يشتاق له من حس في القلب هوجاس

قـعـدت فـي راسه وحـــيد لحــالى =براس الطويل ملابقه تقل حراس

متذكرٍ في مرقبي وش غدالي =وصفقت بالكفين ياسٍ على ياس

أخذت اعد ايامها والليالي =دنياً تقلب ما عرفنا لها اقياس

كم فرقت مابين غــــالى وغـالى =لو شفت منـهـا ربـح ترجــع للافلاس

يا ما هفا به مـن رجــالٍ مـدالـــى =مـا كـنّـهـم ركبوا على قب الافــراس

ولا قـلـطوهـن للكمـــين المـوالـى =ولا صـار فـوق ظـهورهن قطف الانفاس

ولا رددوا صم الرمك للتوالي=كلٍ يبي من زايد الفعل نوماس

مــن بينهـم سمر القنا والســـلالـى =مـثـل البـروق برايحٍ ليله ادمـــاس

يقطـعـك دنـيـا مـا لـهـا أول وتالى =لـو اضـحكـت للغبن تقرع بالآجراس

المستريح اللي من العقل خالي=ماهو بلجات الهواجيس غطّاس

ماهوب مثلي مشكلاته جلالي= ازريت اسجلهن بحبرٍ وقرطاس

حملي ثقيل وشايله باحتمالي=واصبر على مر الليالي والاتعاس

وارسي كما ترسي رواس الجبالي=ولا يشتكي ضلعٍ عليه القدم داس

يـا ابـجـاد شـب النار وادن الـدلالى =واحمس لـنا يـا ابجاد ما يقعد الــراس

ودقه بنجرٍ ياظريف العيالي=يجذب لنا ربعٍ على اكوار جلاّس

وزله إلى منّه رقد كل سالي=وخله يفوح وقنّن الهيل بقياس

وصبه ومده ياكريم السبالي=يبعد همومي يوم اشّمه بالانفاس

فـنـجال يغـدي مــا تـــصور ببالى =وروابـعٍ تـضـربْ بها اخماس وأسداس

لاخاب ظني بالرفيق الموالي= مالي مشاريهٍ على نايد الناس

لعـل قـصر ما يجيلــــه اظلالــى =يـنـهـد من عالى مبــانيــه للساس

لا صـار مـا هو مدهلٍ للـرجـــالي =وملـجـأ لـمن هو يشكى الظـيم والباس

بـحسـناك يا منشى حقــوق الخيالى =يـا خـالق اجـناسٍ ويامفــنى اجـناس

تجعـل مـقـره دارس العهــــد بالى =صـحـصاح دوٍ دارسٍ ما به أوناس

البوم في تالي هدامه يلالي=جزاك ياقصر الخنا وكر الادناس

مـتـى تـربع دارنـــا والمـفــالى =تخضر افياضٍ عـقـب مـاهيب يباس

ونشـوف فـيـه الـديدحــان متـوالى =مثـل الـرعـاف بخصر مدقـوق الالعاس

ينثـر عـلى البيـداء ســـوات الزوالى =يشـرق حـمـارة شرقة الصبـغ بالكاس

وتكبر دفوف معبّسات الشمالي=ويبني عليهنّ الشحم مثل الأطعاس


محمد الأحمد السديري

الله الله مااجمل الشعر إذا كتبه السديري

وماأجمل الموضوع إذا جى منك يا سلمان

شــــــــكــــــــراً لــــــــك يــــــــا أبــــــــو الــــــــرشــــــــد

شـكــ وبارك الله فيك ـــرا لك ... لك مني أجمل تحية .

أشكرك أخي مشتاق على مرورك

اخي سلمان
شـكــ وبارك الله فيك ـــرا لك على نقل هذه القصيده
لك مني أجمل تحية .

أشكرك يا أبو حوفان على مرورك العذب