فوق هام السحب ( الشعر الشعبي) على متن القوافي

أشوف الأحلام ماهي تشبه أحلامي
كل ماتخيّلت حلمي ضاق بي صدري

مدري إلى الحين ماجات أجمل أيامي
أو أجمل أيامي مرّتني وأنا مدري

....

نضحك بوجه الحزن وانجابه سنين
لو بكره يسوي من الأمس إعاده

وبتزين إن ضاقت علينا تبي تزين
من الله اللي مايخلي عباده

....

يارب وانت بكل مافيني عليم
سخّر لي أصحاب النفوس الصافية

لو شحّت ظروفي فلا غيرك كريم
وان جارت ذنوبي عساها خافية

عن كل ذنب استغفر الله العظيم
عن كل كسرة نفس أجر وعافية

....

‏ياللّي لك الشكوى من الضيق عاده
خذ وصفةٍ تروي عطش كل ضامي

ان كان تبغى وصفةٍ للسعـاده
صل الفروض الخمس واذكر كلامي

....

‏أحلى من السكّر عذوبة حكاويك
وكلك ورب البيت سكر زيادة

رسايلك ضحكك سوالفك طاريك
تبقى لقلبي دوم مصدر سعادة

....

‏لو شلت هم مايشيله جبل طي
‏حذراك لاتبدي على الناس سرّك
‏
‏من قال لك وش فيك قل له ولاشي
‏ومن قال كيف الحال قل له تسرّك

....

ياشينها لاصرت معجب من الروح
في شخص كنه بالغلا قطعةٍ منك

لاتقدر تعبّر ولا تقدر تبوح
مشغول به بالك وهو مادرى عنك

....

‏يا الله يامن في يدك حل الالغاز
وعندك حلول المشكلات الصعيبه

ادعيك تكشف كربت الناس الاعزاز
وتجبر كسور اهل القلوب الرحيبه

يارب من يقصد رجاء رحمتك فاز
ياخير من كل البشر تنتخيبه

عبدك على بابك وطامع ومعتاز
وانت الكريم لكل داعي تجيبه

....

‏يا الله يامن فوق عرشك تعليت
يامن تدبر كل زينه وشينه

ادعيك تغفر لي خطايا اذا اخطيت
وتمسح ذنوبي كل ذنبٍ بحينه

يارب يا اللي لك عبدتك وصليت
عبدك لجا لك يا إلهي تعينه

ترزقني الراحه على ماتمنيت
وتملا حياتي بالفرح والسكينه

بقلمي

‏الناس نامت مابقي حد صاحي
ماغير انا واحساس قلبي والافكار

نمسي نقضي الليل بين النواحي
ونترجم اشواق المشاعر بالاشعار

هذا شعور اللي في العشق طاحي
واللي غدا قلبه من العشق منهار

يمسي يناجي الليل لين الصباحي
والرووح مشتاقه وقلبه على نار

....