فوق هام السحب ( الشعر الشعبي) على متن القوافي

خل الغياب لغيرنا حنا تعودنا الوصال
انا انتظر وصلك عمرَ واردد ان شفتك هلا

مكانك بقلبي هنا ماياخذه غيرك تعال
يفز قلبي لو تمر وان غبت قلبي ماسلا

.....

‏تطري علي واشتاق لك واتمناك
‏والقاك حلمٍ من بعض ذكرياتي

انا ادري اني صرت ماني بوياك
‏لكنك احلى حلم مر بحياتي

من عاشرك ماظنتي بيوم ينساك
‏مهما تغيب تكون لي مثل ذاتي

واصعب مواقف دنيتي يوم فرقاك
‏فيها عرفت انك تساوي حياتي

.....

عسى وجهك يسامحني على التقصير
‏يابو وجهٍ يغربني عن افكاري

‏احبك والسفر نوعٍ من التغيير
‏اسافر لك وأنا في زحمة اعذاري

‏اقول اسف وأنا الأسف على التأخير
‏انا المشتاق للغربه عن دياري

‏واذا تسأل عن اخباري بكون بخير
‏مدامك أنت تسألني عن اخباري

.....

افعل المعروف وتشوف العجايب
كل حاجه ممكنه تقدر عليها

يمكن تنجّيك من بعض المصايب
حاجةٍ في وقتها وفقت فيها

قمت معّ محتاج والا اسعدت شايب
انت ناسيها وربك مانسيها

.....

ياما قطعناها من الميل للميل
تبي تجمركنا ولا جمركتنا

تلعب بنا الدنيا وحنا رياجيل
لا غيّرت فينا ولا حركتنا

.....

قالت من انت وقلت مجموعة انسان
من كل ضد و ضد تلقين فيني

فيني نهار وليل وافراح و احزان
اضحك ودمعي حاير وسط عيني

وفيني بداية وقت ونهاية أزمان
اشتاق باكر واعطي امسي حنيني

واسقي قلوب الناس عشقٍ وظميان
واهدي حيارى الدرب واحتار ويني

واحاوم صقور الهوا حوم نشوان
واسيل الوديان دمع حزينِ

في عيني اليمنى من الورد بستان
وفي عيني اليسرا عجاج السنينِ

تهزمني النجلا وانا ند فرسان
واخفي طعوني والمحبه تبين

ِإن ما عرفتيني فلا ني بزعلان
حتى انا تراني احترت فيني


خالد الفيصل

اياً الذي من قاعة البير يظهرك
اياه وايا الذي تركى على الجال

قدرك وتقديرك لمن لا يقدرك
غبن ولا يصبر على الغبن رجال

عبدالرحمن الوهيبي

في اتصال هاتفي سألني الشاعر الكبير
بدر الحويفي عن قائل هذين البيتين:



أي الذي من قاعة البير يظهرك
أياه وأيا اللي تراكى على الجال

قدرك وتقديرك لمن لا يقدرك
غبنٍ ولا يصبر على الغبن رجال

قلت له إنني لا أعرف القائل ولم أسمع الأبيات
من غيرك فقال لقد أثاراني بجمال معناهما
فكتبت هذه الأبيات على نفس المعنى والبحر والقافية:


لا تصاحب اللي بالقسا ما يشاطرك
عند النوايب لا تحطه على البال

لا صار باوضاع القسا ما يباصرك
طبيعته ما له على الطيب مدخال

العفن لو هو في رضاعك مخاشرك
عليه لا تسند ولا تشكى الحال

اسند على اللي صحبته ما تحدّرك
وان جا مجاله قالوا الناس رجال

والراي لا تعطيه من لا يشاورك
مالك وماله لا شكى لك ولا سال

‏عن البال ما راحت طواريك لجل تعود
‏مثل كـل ليـلة طيش مرَّت على تايب

‏طبيعي بأن الناس تستشعر الموجود
‏وأنا أستشعرك موجود وأستشعرك غايب

.....

‏لو ترد السيل في بطن السحابه
‏ما ترجع قيمتك في قلب عايف

.....