فوق هام السحب ( الشعر الشعبي) على متن القوافي

الخطوة اللي ماتعزك بممشاك
لاتهتويها واقصر المشي عنها

لاصار ماترفع مقامك بدنياك
احذر تجاملها وترخص ثمنها

.....

‏ياكثر ماقلنا على الجرح لاباس
والوقت يكرب مـن شقانا حزامه

طابت خواطرنا من الوقت والناس
ماعاد نبغى الا الستر والسلامه

.....

يرقآ شعوري في سما عينك غْيوم
‏ويطيح من عين السما ألف شاعر

‏واليا إنهمر شعري على قاع ديموم
تنبت بشر تنبت ورود ومشاعر‏

.....

أبتسم للناس وأضحك للحياه
‏ولو تضيق اليوم قل بكره تزين

‏أعرف ان الله وحده لاسواه
‏قادر إنه يبهج الصدر الحزين

.....

ان جابها الله والمشاعر سليمه
يبغى لها حمد وشكر وتسبيح

وان ماكتبها الله فلا به هزيمه
حنا بشر نحتاج ونقوم ونطيح

.....

بين زيف الوجيه وطول بال السنين
ضاق صدر الفضيله بين حرّاسها

كل ماقال واحد راحوا الطيبين
أشعر أن الصداقه تلفظ أنفاسها

.....

الحاجه تدور المحتاج وتهينه
كم من كريم وطيب ماهو بخالي

ظروف الايام مثل السمعه الشينه
ماودك تشوفها في واحدا غالي

.....

والله اني بعض الأحيان ابتلش في حالي
‏من خطايا غاليٍ مايستحق اسبّه
‏
‏ودك أن الغالي اللي يدري انه غالي
‏مايقوم يكرر الغلطات وأنت تحبه

.....

‏عرفتك وسلمتك غلا ماعليه غبار
وشعور كثر مابطيت عنه تباطاني

تلاعب وفن وشي فاخر ولعب كبار
على شان عينك ماكتبته على شاني

طغيت بقصيد يطغي بساحة الشعار
مثل ماطغو في ساحة الحرب جداني

.....

اللي يعزك مايشوف الردا فيك
ومن يكرهك حتى بخيرك يذمك

ترضيه ماترضيه ماهو براضيك
لو هو من اقرابك ولحمك ودمك

.....