فوق هام السحب ( الشعر الشعبي) على متن القوافي

‏علاقة العربي بالقهوة علاقة سرمديّة وثيقة يتقهواها كيف ويكتبها شعور

يقول مدغم أبو شيبة :
‏أما أني أنساها نسى الله من نسى ذاك القبال
‏ياصبّ روحي صب دلتها على فنجالها

‏ويقول ضيدان بن قضعان :
‏ ‏لو بقى للهيل صبرٍ على فوح الدلال
‏مابقى للقلب صبرٍ على شيء يرتجيه

اللي يبيك يجيك لو دونك قيود
يكسر على شانك خشوم الصعايب

‏واللي يبي فرقاك لو دربك ورود
‏ماجاك لو أنك من أدنى القرايب

.....

انا مشتاق اي والله انا مشتاق
وهذا الشوق متماكن ومتلازم

وانا لاشتقت نفسي تشين والاخلاق
تصير اضيق من الرجعه على الجازم

بدونك مرت أيامي تعب وارهاق
ويلاوعني حنين غث مترازم

يارب شوف لي صرفه مع الأشواق
انا قاعد احن اكثر من اللازم

.....

‏لاتبدي أسرار قلبك عند هذا وذاك
‏لو كان بين الضلوع العوج نار ولهب

‏متى مابينت سرك للأوادم تراك
‏سلمت نفسك لهم على طبق من ذهب

.....

‏طاب ليل القصيد وخاطري منك طاب
لاعرفت ابتديك ولا قدرت انتهيك

بين سين السؤال وبين جيم الجواب
لحظه ازعل عليك ولحظه ارضا عليك

ذيك فيها ملام وذيك فيها عتاب
وذيك فيها مايطعن في تفاصيل ذيك

واكثر اللي من عيونك يجيب العذاب
نظرة اللي ابيك ونظرة اللي ما ابيك

.....

تكتب عيون الشوق والقلب يقرا
من غالي الابيات حس ومشاعر

قصايد المشتاق من كل سطرا
ويترجم احساس الغلا كل شاعر

.....

وده يصارحني وأنا ودي ابوح
والكل منا يذبح الخوف شوقه

إلى متى يبقى الحيا مالك الروح
والصمت يحرم كل واحد حقوقه

.....

‏إليا زعلتوا فأزعلوا لين ترضون
‏وإن مارضيتو جعل فالأمر خيره

‏مايلحق الواثق مشاريه وظنون
‏ولا به كبيرٍ يلتفت للصغيرة

.....

‏غلاك مايحتاج توثيق وحلوف
‏والله خلق حبك من الحب فيني
‏
‏وعزفت نغمة عشق عن كل معزوف
‏وسكنت في قلبي وروحي وعيني
‏
‏واغلى المشاعر جتك في شعر وحروف
‏قلبي كتبها قبل تكتب يميني
‏
.....

‏لاتلتفت لاضاق صدرك لمخلوق
‏ناج الذي يعلم خفايا ضميرك

‏الله على سبع السماوات من فوق
‏يقدر برمشة عين يقلب مصيرك

.....