فوق هام السحب ( الشعر الشعبي) على متن القوافي

اكتب لغيرك طيب المشكله وين
هذا طبيعي فالشعَر ياشاطره

ذي عادتي والطبع هذا من اسنين
اكتب لغيرك بيت وانتي خاطره

.....

‏قلبي سجين الحيأ وطيبته زاده
لو شان وجه الزمن ماشانت أخلاقي

وانا تربيت والطيبه لنـا عاده
واخلاقي العاليه واسلوبي الراقي

قصر المكارم مشيد فيني امجاده
وقصر الوفا والشهامه ساكن اعماقي

والطيب في داخلي مغروسه اوتاده
ماحيل وابقى على عهدي وميثاقي

.....

فرحتي في شوفة الأرض الفسيحه
‏فرحة صغيّر لما شاف الملاهي

‏خلك من العود الأزرق والذبيحه
‏دام راعيھا راعي كبر وتباهي

‏ودنا باللي سواليفه مليحه
‏حتى لو انھا على براد شاهي

.....

انا الغايب الي كان بين العرب موجود
‏رفيق السهر لين السهر مل من عينه

‏تعبت من الدنيا ولا لي وراها زود
‏وانا من نشدني قلت له كلها زينه

.....

‏حتى لو تشوف التفاصيل بوضوح
‏لاتكبر الرجوى بعين المرتجي

‏من كثر ما اتعبني شعور إنك تروح
‏ماعاد يسعدني شعور إنك تجي

.....

‏مصير الأيام تكشف لك كنين الصدور
‏كانك تشوف الوجيه وتجهل قلوبها

‏قلبك دليلك ليا اشتبهت عليك الأمور
‏لاتقرب اللي يجيك الشك من صوبها

.....

دام العلاقه بيننا بس شاشات
مافيه داعي للعتب والمشاريه

الحب ماهو مقيدن بأسم نكات
الحب يربط شوف غالي بغاليه

.....

ماهو صحيح القلب للقلب شاهد
لو هو صحيح أصبحت مفتون فيني

بيني وبينك حب من قلب واحد
ليته يجيك من الهَوى مايجيني

وليتك تعرف الشوق لاصار واجد
وليتك تعرف أوجاع كثر الحنيني

أضحك وأنا لجروح الأحباب جاحد
أداري المكنون عن كل عيني

.....

اما وليفٍ يرفعك بالهوى فوق
والآ وليفٍ تكره الحب منّه

للنفس عزّه والكرامه لها حقوق
لجل الكرامه نار الفراق جنّه

بنت النماص

‏خل اهتمامك واتركه ماعاد ابي منْك اهتمام
‏تصنعك ماعاد يرضيني ولا عاد اطلبه

‏ياكم على شانك قلّبت الارض وابعدت الظلام
‏واحاول ارضي خاطرك لو كان في قطع رقبه

‏بعد الكلام البارحه ماعاد ابي منّك كلام
‏نقع كلامك في غزير دموع عينك واشربه

.....