فوق هام السحب ( الشعر الشعبي) على متن القوافي

‏البارحه والناس داله وسالي
‏يوم أنتصف ليلي تساويت للريح

‏والهم يلعب في ضميري وبالي
‏لعب الأصابع في خيوط المسابيح

‏مليت أنادي للسحايب تعالي
‏وتمرّني دهم السحايب مراويح

.....

‏لاتحط المشاعر بين كيف وليه
واضحه لو تركز فالشكل والذات

المحب الحقيقي لاتشكك فيه
اذبحه بس لاتطلب عليه اثبات

.....

لاجاك مني ياهوى البال عهود
‏باذن الله اني قدّها واحتميها

‏حبل الموده فـ المعاليق مشدود
‏لو كان بعض ظروفنا لك عليها

‏كل شيّ ينقص عندي وحبك يزود
‏وساعه وصالك كل يوم احتريها

‏يحن لك قلبي كما حنّت رعود
‏على سماء ديره انا وانت فيها

.....

‏الي متى والضيقه بصدري عمار في عمار
‏متى تمر الضحكه اللي تبطي بوجهي متى

‏ما اخاف من طعم الحزن اخاف طعم الانكسار
‏واحاتي الهم الكبير اللي على صدري عتا

‏في داخل ضلوعي حراره كل يوم تشب نار
‏منها اتدفى عن شديد البرد في ليل الشتاء

.....

‏كم سريت الليل أدوّرك ياصافي الجبين
‏وأدحم جنوب الليالي وأجاهدها جهاد

‏داريٍ بإن اللقى صعب لكنّ الحنين
‏ساقني لـك ياحبيبي وفي راسي عناد

‏مايقارن شوف وجهك بمال ولا بنين
‏حظ من يقضي الليالي معَك على انفراد

.....

الشموخ مع الركاده والثقل
‏في مفاهيم البشر صارت غرور

‏أحمد الله كامله كلي عقل
‏والثقه في خطوتي شيخة حضور

.....

احلى لقى لاصار من دون ميعاد
‏صدفه كذا مثل السماء يوم ترعد

‏رشة مطر ودك بها دوم تنعاد
‏احيّت جفاف الأرض من دون موعد

.....

سامرت وجه الحياه اللي عطتني عمر
‏حتى بدت تسرق القمرا وتسري بها

‏ماحولي إلا سنا ضو ٍحطبها سمر
‏وأفكاري اللي تقفي بي وأقفّي بها

‏وأطقطق الجمر بالملقاط وأسحب جمر
‏والجمره اللي بجوفي ويش أسوي بها

.....

نضحك ونمزح لاتعاتبنا على بعض المزوح
‏نحتاج ساعه للفرح لاصرت ماتحتاجها
‏
‏قفّل مجالات الزعل والضيقه اللي ماتروح
‏والعين عوّدها على الفلّه وفل حجاجها
‏
‏ان كان في صدرك جروح صدورنا فيها جروح
‏خلك على الهقوه ونلقى للجروح علاجها

.....

المسا هذي تفاصيله وهذا لونه
‏التحف بشته علوّ الديره وطامنها

‏كل مامرّت نسايمه الشجر وغصونه
‏تبعث اللي في قيود الصبر من مكمنها

‏الهوى ماينعذل قلب المهاوي دونه
‏والقنوع ان ذاق لذّات الحياه ادمنها

.....