فوق هام السحب ( الشعر الشعبي) على متن القوافي

‏اسافر من محطات الخيال لوقفة التفكير
‏واغني باللحون اللي صداها يطرب أسماعي

‏جناحي ذكرياتي والسما فكرة واحب اطير
‏كرهت الواقع اللي يحبس افكاري في قاعي

‏جفيت الليلة اللي تشغل الخاطر عن التعبير
‏وسكنت الليلة اللي في دجاها يظهر ابداعي

.....

حنّيتك من العتب يوم ان بعض العتاب
‏اقطع من السيف واصدق من دموع اليتيم

‏اهديت لك ورد واهديتيني اخطر صواب
‏محدٍ رمى الورد غير انتي وعبدالحليم

‏شكراً على مامضى لي معْك حتى الغياب
‏انتي غيابك صنع للناس شاعر عظيم

.....

تعبت أمد الصوت في صمت إمتّلى بالتايهين
‏وتعبت أدوّر للجواب اللي خنق هلأسئلة

‏عايش على قيد الأمل ماني على قيد اليقين
‏أكبر من الأحلام وأصغر من غموض المرحلة

.....

ياعاشق الليل وش خليت لعيوني
لو هامت بالليل تنشد نظرة عيونك

ماهي عداله بحب اثنين مفتوني
امّا انا او سمو الليل مفتونك

.....

‏بالمحبة والمودة لك حبيبٍ زاد شوقه
والمشاعر صادقة درب الوفا تمشيه رجله

ولا يداوي جرح ود القلب لازادت حروقه
غير قربك خل سير أقدامكم للوصل عجله

.....

ياما على وصلك ركضت وتعنيت
وفتحت لك قلبٍ من الحب تايب

وياما كسرت خاطري كل ماجيت
ارجع ودمعي فوق خدي سكايب

والحين عنك ياهوى البال صديت
حال الفراق وخاطري منك طايب

.....

ياصاحب الكف المخضب بحناء
يامن أسرت القلب في نقش حناك

ياناقش الكفين يسرى ويمنى
سبحان من صور جمالك وسواك

.....

‏حي المساء اللي نشوفك تجي فيه
ياللي عليك الروح كل يوم توله

يالذ واجمل شي تطري طواريه
ياغاية المشتاق واللي يقوله

.....

اشفق عليك واعتني بك واداريك
واسكّنك عنّ البشر وسط عيني

ياما زعلت وقلت ماعاد احاكيك
ويردني شوقي عليك وحنيني

خوذ الصراحه من حبيبٍ مصافيك
انت اجمل اللي مرني في سنيني

.....

‏نمسي على حال ونصبح على حال
‏يوم ٍلنا واليوم الآخر علينا

يوم ٍسلا خاطر ويوم ٍغثا بال
‏طبع الزمان وحكمة الله فينا

.....