فوق هام السحب ( الشعر الشعبي) على متن القوافي

انت وينك عن مساء الأشواق قلي
كيف عايش ياجميل الروح دوني

في غيابك ياحبيب الروح من لي
انت اجمل من سكن داخل عيوني

.....

‏لك الوفاء والشوق بالشعر مرسول
‏ولك الورود أشكال من كل نوعي

‏بيني وبينك بحر وجبال وسهول
‏وروحك قريبه في حنايا ضلوعي

.....

‏بعض الصدف لو تجمع الحي بالحي
‏مثل الحزن عمره مارد المصيبه

‏يؤسفني ان باقي من الواجد شوي
‏ويعرف كلٍ وش يخبي نصيبه

‏إن لم تعد هقواتنا مثل ماهي
‏عدنا كما كنا غريب وغريبة

.....

‏ضيقةً في خاطري عقدها حبله جويد
‏ماتفرج لين ياخذ بي الجيب انهوٓه

‏في سنع بدوٍ تناحوا بمضنوني بعيد
‏دونهم للجيب روحة ومسرى واضحوه

.....

‏لنا مشاريه وعلينا مشاريه
‏ولا كل رجالٍ عليه انتشره

‏نشره على الطيب لاغير مباديه
‏والا الردي شرهاتنا ماتمره

.....

‏الوقت يكشف لك الاصحاب بالمرّه
‏لو كان صبرك على الايام فولاذي

‏اللي ماهو معك في الحلوه وفي المرّه
‏لاعاد ترجيه في هاذيك وفي هاذي

.....

يالله بنور مثل وضاح الصباح
‏اللي يشق الليل الاظلم لاصعد

‏وحظ يبادر بالسعادة والنجاح
‏ويوم يبشر بالغنايم والسعد

.....

عن المجامل وكسب الناس ورضاها
‏رضا ضميري على نفسي مكفيني

‏العمر يسلب من الدنيا مزاياها
‏ورغباتي تقل كل مازادت سنيني

‏أشياء ياكثرها كنت اتمناها
‏والحين ماعاد تسوى شي في عيني

.....

‏يابرد الشتاء خل الحنين القديم يموت
‏امانه معك لاتبعث الشوق من قبره

‏انا من كثر ماني بمتضايق ومكبوت
‏لو يقول احد وش فيك غصتني العبره

‏اذا الناس تحتاج اكسجين وشراب وقوت
‏انا احتاج جبرة خاطرٍ مالقى جبره

.....

‏اقلطي يامرحبا والليل توه بادي
‏لايروح الليل دام انتي وانا من دونه

‏باللسان وبالعيون وبالمشاعر نادي
‏اسمع مناداك قبل الناس لايوحونه

‏من سمع صوتك ولا جاوبك هذا غادي
‏ودك الله يحرمه سمعه وضحك سنونه

‏هايمٍ في عينك وصوتك وضارب وادي
‏واديٍ من هام فيه الله يكون بعونه

.....