فوق هام السحب ( الشعر الشعبي) على متن القوافي

خل البشر تذكرك بالخير والطيب
السمعه الزينه رصيد وغنيمه

ان جيت تلقى المسهلا والتراحيب
وان غبت تمدحك النفوس الكريمه

محبة العالم من اغلى المكاتيب
بعيونهم بتشوف معنى الحشيمه

.....

أرسل تحيه على قدر الغلاء الصافي
لأحباب قلبي على نغم الوتر والدان

بحساس شعري ونظم الحرف والقافي
ممزوج بشواق فيها صافي الألحان

سلام مني سلام الصاحي الغافي
سلام رايق معطر بالعطور اللوان

فيها من العود وانسام الهواء الدافي
والزهر والورد مقطوفه من البستان

.....

‏لو طلبت العين تفداك العيون
‏ولو طلبت القلب لك قلبي فدى

‏يابعد من يعشقون ويكر هون
‏لك خفوقي يعشقك لأبعد مدى

.....

لو بقى للهيل صبرٍ على فوح الدلال
مابقى للقلب صبرٍ على شيء يرتجيه

.....

‏حظك كبير بفكّة الريش ياطير
لك خاطرٍ مابيّح الوقت سدّه

عطني جناحك بس في حزة عصير
ولك وجهي إنه لأظلم الليل أردّه

.....

ياطير ياللي في السماء فارد الريش
‏خذني على ريشك ديار الحبايب
‏
مافي بالسماء ياطير نقطه وتفتيش
‏ولا على المشتاق دفع الضرايب

.....

‏من شالنا بالعين شلناه بالعين
وان ضاقت الدنيا لقانا رصيده

ومن خصنا بالزين نكسيه بالزين
غصب ٍ على خشم الامور العنيده

.....

‏ليش التغلي صار بالناس عاده
واصحابنا الغالين ليش يتغلون

ماهو بذنبي صرت طيب زياده
ذنب الزمن خلا البشر مايحسون

.....

كبدي اللي من الايام فيها وفيها
كنها حدر جمر وكنها فوق مله

البشر ماهي بتنباع لجل اشتريها
وانا ماعفت احد من رخص ولا ممْله

عزة النفس تمنع من تربى عليها
وانا قلبي ماقلت اخذه ولا قلت خله

الحقيقه بتسمعها ولو ماتبيها
انتهى كل شي وربي وربك الله

.....

‏رضا البشر ماهو بآيه منزله
خل العقول الطايشه في طيشها

احيان تفكيرك يحل المشكله
واحيان حل المشكله تطنيشها

.....