فوق هام السحب ( الشعر الشعبي) على متن القوافي

أجمل عطر ريح الثرى بعد الأمطار
خل العطور اللي من أسواق باريس

ياما حلى عقب المطر شبة النار
مع هاجسٍ يمطر مشاعر وأحاسيس

.....

سكرت انا باب العتب والنقاشات
ماعاد لي خاطر افتش وابرر

كثر العتب شوّه جميل العلاقات
خل النوايا البيض عنك تقرر

.....

يذوب طرفي في مشاهد عيونك
وتشهق لك الأنفاس من قو الإعجاب

صحيح عاقل بس انا أعشق جنونك
ياللي غديتي كل ناسي والاصحاب

.....

الناس بالدنيا تواريخ وأرقام
أحباب وأصحاب ومعارف وخلان

وإنت بقلبي جامع الأربع أقسام
وقدرك بقلبي دايم الدوم ماهان

.....

لوكنت ماحبك ولا أغليك بإحساس
ماكان اسمك بين الأضلاع منحوت

لكنني أخفي غلاتك عن الناس
والناس غايتها متى حبك يموت

.....

مفتاح قلبي معك ياكامل الزين
مسموح لك تدخل ولا عاد تطلع

وإذا طلعت اطلع من القلب للعين
وان ماعجبك الوضع للقلب ارجع

.....

دخيل انا وجهك الي يشبه اسلوبك
وعيونك السود والا الوجنه الحمرا

إليا مشيتي مشت كل العرب صوبك
الضاهر ان العرب تمشي على القمرا

الحب والعشق يُبنا من على طوبك
والزين يمشى على امرك ماهو بأمرا

من يوم ماقلتي اني صرت محبوبك
وانا كرهت العذارى بيضه وسمرا

.....

‏ياحلو صوتك وانت مليان بالبرد
في نبرتك فرحه ولهفة ورعشه

من هب صوتك امتلى مسمعي ورد
الله يالك في مساء الشوق وحشه

.....

وين أنت ياللي كتبت الشعر لعيونك
عطني تفاصيل حرفك وترك الخافي

ان كان حرف القصيد يحرك اشجونك
وشفيك ماتبدي إعجابك على قافي

.....

ياصاحبي مادام للحب موضو؏
احفظ وبكره حصة الدرس تسميع

انا غلاي اصلي من الحب مصنو؏
ماهو من اﺳواق المحبين تجميع

.....