فوق هام السحب ( الشعر الشعبي) على متن القوافي

‏المحبة ماكنت اشوفها راس مال
‏كنت اشوف الحياة الفانية عبرها

‏راح منها شعور وراح منها وصال
‏لين دار الزمان وراحت بكبرها

‏سهل ترجع على خبري هذيك الليال
‏البلا من يرجّعني على خبرها

.....

‏على شان عنقٍ كل ماجيت له موعود
‏أجي له وأنا مرمي وأعوّد وأنا رامي

‏يالبيه يحلى فاتنة من بنات العود
‏يالبيه لين يجيبك العمر قدّامي

‏اسوق الهقاوي مالشوقي عليك حدود
‏وادوّرك وأسرج مهرتي واكرب حزامي

‏وأرد البرا وأقول يا ام العيون السود
‏انا الصادق اللي موقفه فالهوى سامي

.....

‏كان لي ذنب واحد ما عليه اغفريه
‏ليلة الهجر تجرح عين من نامها

‏شوفي اقرب مطوّع حولكم و انشديه
‏من كلت كبد عاشقها وش آثامها

.....

‏ما كرهت بـهالحياه الا الغياب
‏ولا ذبحني بدنيتي غير الرحيل

‏ولا عرفت ان الفراق اكبر عذاب
‏لين عشته في دجى الليل الطويل

.....

‏يا الله يا اللي تسجد الخلق لرضاه
‏ياوامرٍ عبده على حج بيته

‏تفرج لمن سده على الناس ما أبداه
‏راض ٍ على مقسومك اللي عطيته

.....

ظروف الاقدار مدري كيف نامنها
‏عز الله ان الحياة ظروفها خطره

‏كم واحدٍ كان مستانس وضامنها
‏وامسى وكبده من الحرمان منفطره

.....

‏اعتبرني معطيات الواقع اللي يستثيرك
‏وحبني مثل الخيال وخلّني مثل المخيله

‏القبال اللي تشوفه قادر يحدد مصيرك
‏والقبول اللي لمسته منك يكفي عن قبيله

‏يوم مريت بحياتي كلها ماشفت غيرك
‏أنت صورة كل مشهد وأنت قصّة كل ليله

.....

‏مرحبا وأنتي العوض فالغايه إللي ماتهيّت
‏لايق الترحيب ياشبه القمر والا نزيده

‏تكرمين من الهروب بصمت والعذر المبيّت
‏العذر ماهوب متوافق مع سلم الوليده

‏عاضني ربي وأنا إللي شجّع العبره وعيّت
‏وجادت الفرحه على روحي بعودتها الحميده

.....

‏يعم الهدوء ويستثير السكون الصوت
‏وأنا بين صوت العقل وإحساسي الجايش

‏ماضيّعني وذوّقني الموت قبل أموت
‏إلا عقلي المتحرّص وقلبي الطايش

‏ترا ما أصعب من الموت واللي خلاف الموت
‏إلا الفتره اللي لا أنت ميت ولا عايش

.....

يالله صباحٍ منك خير ومسرات
‏ويوم ٍ يشع بنور عز وكرامه

‏اغفر لنا يارب واغفر للأموات
‏اللي تحت رحمتك يوم القيامه

.....