فوق هام السحب ( الشعر الشعبي) على متن القوافي

‏يارب تفتح لي مغاليق الأبواب
‏اللّي على غيرك ومثلي عسيره

‏وهيئ لنا فضلك ومن خير الأسباب
‏واكتب لنا في كل مشوار خيره

‏واجعل لنا قوة وصدق أولو الألباب
‏واجعل لنا مع طيب الذكر سيره

.....

اصبحت باحسن حال والحمدلله
‏الفضل له والشكر له والثنى له

‏ماخاب من يرجي ثوابه ويخشاه
‏والله وكيل اللي عليه اتكاله

.....

الكريم ليا عطا كنه مايعطي من حلاله
‏لو طلبته ثوبه اللي لابسه يعطيك ثوبه

‏لعنبو جد البخل واللي يحطه راس ماله
‏البخيل بخيل مايعطيك حتى من ذنوبه

.....

قبل تعزم اعرف من اللي تعزمه
‏عساه فعلاً يستحق العزيمة

‏والا الردي لو تعزمه صرت فأزمة
‏وشلون تذبح للبهيمة بهيمة

.....

والله اني ما اتحسف واتصاغر حالي
‏غير يوم أخطي على طيّب ويغضي عني

‏الله يقطع هرجةٍ تجرح مشاعر غالي
‏والله يقطع هرجةٍ تزعل صديقي مني

.....

تذكرتني بعد اربع سنين مدري خمس
‏هذا شوق ولا عوق ولّا وش تسمّيه

‏ترى عادة جروح الهوى تشتعل باللمس
‏وانا خايف انك تلمس الجرح وتصحّيه

‏سمح خاطري من رحلةٍ كلبوها شمس
‏ومكانٍ بغيت اجيه ولا قدرت اجيه

.....

‏بس اقنعي عقلي يا ناقضة الجديل
‏وشلون طاح الليل وبالظهْر استوى

‏وكيف الخصر من ليلك الهادي يميل
‏ومن رقه النسناس وشلون انزوى
‏
‏انتي الهوى او شي من هذا القبيل
‏وانتي الشعور المخملي والمحتوى

.....

‏جعل يسقى يوم عاد الهوى كله شجون
‏والطمع محصور فالعين والصوت الشجي

‏قبل تدخل سوقه اهل اللهو واهل المجون
‏وينقطع حبل الرجى في يدين المرتجي

‏راح وقت ٍ كانت ايامه اجمل مايكون
‏يوم كانت تعترض لي شوي وتحتجي

‏تختلق الاعذار لاجل العرب مايفطنون
‏ماتجي بالماء من الوايت اللا لين اجي

.....

‏سلهمي بعيونك الثنتين دايم
‏واحرقي قلبي بنظرات المحبه

‏واتركيني طول عمري فيك هايم
‏مثل نظرات البعيد اللي مشبه

‏لو هلك يدرون ماحطوا تمايم
‏دامها فالشرع سنه مستحبه

‏انتي المفروض يحذف لك عمايم
‏من شغاميم العيال الملتهبه

.....

‏عسى لي أثر طيب مواقف وذكرى خير
‏ونفسٍ تنول اللي تمناه ياربي

‏ولا تبتليني بالسّعي في نصيب الغير
‏ولا تضيع سنيني وأنا أدور لطبي

‏وهب لي بصيرة ماتوردني التقصير
‏تميّز قلوب الناس في كرهي وحبي

‏ونولني أشوف الحقيقة مثل ماتصير
‏أنا أشوف الأشياء مثل مايشتهي قلبي

.....