فوق هام السحب ( الشعر الشعبي) على متن القوافي

بعض الثقة تدفع ثمنها حسافه
شعور موجع يصعب أحيانا وصفه

أخطر عدو لا كان أقرب مسافه
صديقك اللي يسند الكتف كتفه

.....

ماسلمنا من سكاكين القرايب
ولا سلمنا من اقاويل الصداقه

ابشع الصدات صدات الحبايب
واشنع الطعنات طعنات الرفاقه

.....

فمان الله والعذر السمين أبلغ من التبرير
عفى الله عن خطايا اللي خطايانا على شانه

فمان الله يالغصن الليِّان اللي هَجرك الطير
هذا طيرك يبلغك السلام بروس جنحانه

.....

متصنع الطيب لايمكن يجي طيّب
يتعب من الطيب ويعود على طبعه

.....

أنتِ طمأنينة الروح وشعور السلام
في قربك النفس ماتاخذ تدابيرها

تمر الأيام في قربك على مايرام
يابهجة عيوني ويا أغلى مساييرها

.....

عطيتك محبه صادقه مابها تشويه
وجعلتك بقلبي منفرد فيه وحداني

وغيرك بغاني بالمحبه وانا مابيه
مادام انت عندي ويش ابي بواحدٍ ثاني

تراني ليا شفتك اسج الفكر وشقيه
واشوف القمر واقول عندي قمر ثاني

غلاتك بقلبي شي يطغى على التشبيه
كيف اوصفك والوصف يعجز به لساني

.....

أحبك جنون ومرحلة طيش وإستهتار
وأشوفك سوالف عزلتي وإهتماماتي

لو إن الليالي جارحة والزمن دوّار
يصبّرني أنك فرحتي وإبتساماتي

تخيّرني دروب المساري عشان أختار
وأنا ما بغيت الّا دروبك يا مولاتي

أخاف إنهزامي في حياتي وأخاف النار
وأشوف إنهزامي معك مثل إنتصاراتي

.....

أحبه وأحبّ ازعله وأحبّ رضاه
دفا عمري وترويق بالي وتفكيره

لو اني اذوق المرّ منه اقول الله
عذابٍ معاه ولا سعاده مع غيره

.....

‏خلك مع اللي لا درى بضيقتك ضاق
‏وابعد عن اللي لا درى بضيقتك صد

.....

نعرف نحل حبالها لا تلوّت
ونقودها قود الرسن للعسايف

.....