فوق هام السحب ( الشعر الشعبي) على متن القوافي

كم واحدٍ ضيّع حياته بدنياه
سعى ورى ارزاقه وخلاّ صلاته

وكم واحدٍ ناجا بدنياه مولاه
قايم بدين الله وعايش حياته


مسيعيد الفهد

تجمل ترى والله ما للجميل إنكار
ولاينكره من كان في راسه مروّه

عسى راعي أبشر ماتقفي به الاقدار
ولا ينقطع ذكره ولا ينطفي ضوّه


سلمان بن رازن

نضحك لو إن الزمان يزيد بأحزانه
يوم الرّدي لا مشى تقصر خطاويّه

ونصير للأجنبي واحد من أخوانه
يوم اتّصدد عن الوقفه بني خيّه


تركي عواد

الاقشر اللي فالعمل مايساعد
ومن جاه ماحصل كرامة وتقدير

باكر ليا حاشه نظام التقاعد
ماعاد يلقى من يمسيه بالخير


عبدالله بن عون

الله ولا بعض الكلام اللي يحطك في حرج
الكلمة اللي ما تجمّل خلها في فالها

ودك يقولون العرب وش فيه ساكت ماهرج
ولا يقولون العرب ليته سكت ما قالها


حزمي سعد

رجلٍ يجي تكميل عند المشاكيل
ورجل طلع بين المشاكيل صيته

هذا يدل بيوت كل الرياجيل
وهذا يدلون الرياجيل بيته


نايف ابا العون

لاتجامل العالم ولا تعبد وجيه
ولاتهاون للرياجيل وتهون

والله ماترضي الناس باللي تسويه
لرضيت لك عشره زعل منك مليون


عمران الزراقي

اللي ليا مدْح ابن عمه تعومس
وقام يتعقد ناظره عند الاجناب

تراه ليا اشتد الطلب ما ينومس
خسارة فيه العوارض والاشناب


مدشوش الاكلبي

هقيت فيك الطيب واثري مغامر
الله يسامحني على هقوةٍ ظلم

جعلك لبو قدام وابشر وتامر
فدا يابوبشوف وارد لك علم


حمود خلف

‏لولا المباخر ماعرف طيب الطيب
ولولا المواقف ما عرفنا الوليده

وانا اشهد انك كاسب العز يالذيب
ياللي علومك فالمواقف سديده


نايف التويجري