فوق هام السحب ( الشعر الشعبي) على متن القوافي

من يحب سلومنا حنا نحبه
ونتمنى كل يوم إنّا نشوفه

من قوانين الشجاعة والمحبه
ماتبعنا اللي يعرضنا كتوفه


ناهي الجابري

ياصاحبي خذ الهدوء من ناحيه
ومن ناحيه اخرى خذ الشي الأصح

مالك ومال العالم المتناحيه
اللي علينا بالكلام تلْح لَح

حنّا بلشنا فالعقول الصاحيه
مهوب عاد اللي عليها قلّ صَحّ


سفر بريك

يالعبد لاتشكي همومك على العبد
اشتك على اللي في يدينه مصيرك

تشكي على المخلوق من دبلة الكبد
واللي دبل كبدك دبل كبد غيرك


نايف ابا العون

ايه اعترف اني معك حيل حساس
اضيق لو ماقلت لي كيف حالك

كريم لكنّك معي ابخل الناس
في شوفتك في مواصلك في اتصالك

تعال واسمعني من الراس للراس
البيت هذا ثبته وسط بالك

عطني عمر ثاني وقلبين وإحساس
وانا اوعدك أنساك واعشق بدالك


ثامر شبيب

يامن تبسم فَمْك هذا ماهو فم
هذا من الحان السماء الكريمة

لمة خدودك مثل جمعة بني عم
تجمعوا من شان رد الظليمة


رضا حليس

ان شفت لك باب مسكر ومسدود
غيره مية باب وطريقٍ تدله

محدن بميّت في رجا شخص محدود
كم شخص يكره حاجةٍ خيرةٍ له


عبدالله بن شايق

ترا مزحنا في مخالط الناس كله ذوق
ولا يكسر العزّة ولا يخدش الحشمة

ضعيف الروابع كل ما زم خشمه فوق
عطيناه درس من التواضع على خشمه


عبدالله بن مجحود

يازين مكتوبك وياحي ذا العين
وحنا على ماقيل سمعٍ وطاعه

مانزل رقاب الكفو والسلاطين
الا الهوى و الموت مابه شفاعه


ابو وسام

مانزّل الدمعه سوا فقد غالين
يطيح لو نلبس قناع الشجاعة

احدٍ يجي طاريه من حين لاحين
واحدٍ يجي طاريه في كل ساعة


ابو نواف

ماكل بشت تشوف راعي فعايل
كم بشت يبغى بشت غيره يذريه

ولا كل رجلٍ كل ماقال طايل
بعض الرجل قوله فلا يعدي يديه

كم واحدٍ يتعب عيال الحمايل
تجملو به بس مابينت فيه


عايد حواس