فوق هام السحب ( الشعر الشعبي) على متن القوافي

‏مرحبا يام خصرً كن طاويه جوع
‏من يشوفه يحلْف انه مجوّع شهر

‏حط فيك الله مْن الزين من كل نوع
‏ لبةٍ تسحر وعين وقوام وطهر

‏ والله اني قنوع وفيك ماني قنوع
‏ودّي أسوق لك كل العذارى مهر

‏ قومي وطفي اللّمبه وشبّي الشموع
‏وقولي لفارعات الطول موتن قهر

.....

‏يوم اقّبلت قام السحاب يتزبّر
‏عيونها والموت ما بينهم فرق

‏الرمش اقام الفرض والجفن كبّر
‏وعيونها الثنتين صلّت بنا شرق

.....

وش يفيد البوح لو نبغى نبوح
دام بعض البوح يوصل للندم

.....

‏من تجاهل وجودي ماحسبله وجود
‏علم اهل القلوب اللي غطاها الصدا

‏والكبر نقص بالناس ماهو بزود
‏والردي طول عمـره من ردا في ردا

.....

‏ان غبت عنكم بالجميل اذكروني
ولا تبخلوا نحوي بخالص دعاكم

وعن كل ما جاكم خطأ سامحوني
قلبي على طيب النوايا معاكم

.....

‏ياللي تربيتوا على الذل والهون
‏راع الضعافه ما يخلي الضعافه

‏حتى لو انكم قلتوا اللي تقولون
‏مافي مجالسكم حقوق الضيافه

‏ظنوا عساني فوق منتو ماتظنون
‏ياهل التبجح بالجهل واللقافه

‏صرتوا على قل الكلافه تمونون
‏قلة سنع ماهي بقلة كلافه

‏صارت مبادينا رسالة تليفون
‏وسلومنا صارت مجرد خرافه

‏ماعاد به شي مع الوقت مضمون
‏حتى سحاب الصيف صرنا نخافه

.....

يارب خاطرنا من الوقت مكسور
والهم فينا مثل عالي جباله

كلن بهذا الوقـت يشكي من الجور
وكلن تقهوى من مواجع دِلاله

.....

إن ضاقت أيامك وتحتاج تغيير
لا تظهر الأوجاع والحزن خبّه

العمر ضحكة ضيّعتها المقادير
وماعاش غير اللي رضا بحكم ربّه

.....

ماعادت الايام هي نفس الايام
ولاعادت الناس الحبيبه حبيبه

احتار فكري قبل تحتار الاقدام
الدرب موحش والمشاعر غريبه

.....

‏خاطري لا زال يهمس لك غلا
‏كل مره من يسار ومن يمين

‏اشهد ان القلب ما عمره سلا
‏غير صوبك واسمعوا يالحاسدين

.....