فوق هام السحب ( الشعر الشعبي) على متن القوافي

انتي بوجهي من الدنيا لايلحقك خوف
‏مصيرها تضحك الدنيا لنا لو تضيق
‏
‏مادامني حي حطيني بوجه الظروف
‏انا الابو والاخو وانا الولد والصديق

.....

سامرت طيفك على ضوٍ تواقد سناه
وثنتين لا جات مع طاريك يازينها

النار ملح الشتا والبرد ملح الحياه
وأنتي حياة القلوب اللي تمرينها

.....

خاطري ماهو بطيب ولامرتاح بال
والعرب معاد لي شفٍ في منطوقها

أتظاهر بالسعاده وأقول الحال عال
والا أنا ضايقٍ والأخلاق طايحٍ سوقها

.....

لولا الحياء وعاداتنا والتقاليد
وسلومنا واطباع جدك وجدي

لاقول احبك واعترف للاجاويد
ولاهمني من عارض اليوم ردي

واجيك انا كلي بليا مواعيد
تمد لي يمناك وامد يدي

وتضحك لنا الدنيا ونرجع مواليد
ننسى زمان كان ضدك وضدي

.....

عملت لك منشور ونشرت هشتاق
خايف یبيت الشوق خارج دیارة

ياساكن أعماق أنا حيل مشتاق
وعقلي من الأشواق خارج إطاره

إحساس قلبي يرتجي ضمة إعناق
ولا غير شوفك من يطفي نياره

.....

‏تعال أحطك في خفوقي وأغطيك
‏وأكتب على الخفاق ممنوع الإزعاج
‏
‏وأسمّعك نبض المحبة يسليك
‏صوت الغرام الّلي له الروح تحتاج
‏
‏وإذاغشاك النوم في جوف غاليك
‏خليت لك قلب الغلا فرش ديباج

.....

لك من عطور الشعر ماينعش الروح
‏ولك من مواجيب الغلا نبض واحساس

‏ولك في خفوقي بيت مازال مفتوح
‏مايسكنه غير انت يانقوة الناس


.....

‏أرضى إذا وقتك سمح لي على طول
‏وان ماسمح في كل الأحوال راضي

‏أصير فاضي كل ماصرت مشغول
‏وتصير شغلي كل ماصرت فاضي

.....

‏يالغلا في طلّتك تضوي سماك
ابتديتك حب والله ما انتهيك

وفي حياتي ماعرفت الا هواك
كل ماغبتِ عن العين احتريك

.....

التغاضي والقناعه والرضى بانواعه
‏لانقص وحده بنفس الادمي كدرها

‏طـع مباديك وروض نفسـك الطماعه
‏وقلل الهقوات فالعالم ولا تحقرها

‏والزمن لازين ظروفك لمدة ساعه
‏عش مع الساعه ليالي كامله تذكرها

.....