اخترنا لكم

تقول لي مشتاق وتقفل الباب
الباب بابك والمفاتيح يمك

والله لو العلم يشكى على اللباب
ما كان تشكي للصواديف همك

ماعاد به عذر ولا ينفع عتاب
دام العذر موجود بأطراف فمك

ودك تروح وكل شي له اسباب
عذرك سمين وسبته وسط دمك

.....

فيه أمور ما يجوز العذر فيها والتغاضي
‏لا وصلنا عندها حطيت قلبي تحت رجلي

.....

‏ابشرك قلبي من الضيم قد طاب
وكل ضيقن في خفوقي نسيته

من بعدما كحلت عيني والاهداب
بشوفـت الوجه المنور فديته

ارتحـت بك وارتاح دمي بالاعصاب
وارتاح شوقن في ضلوعي خفيته

وارتاح قلبن ذاب من جور الغياب
من عقب مانا في فراقك لقيته

.....

احرص على اللي عاقل وزين الاخلاق
وصريح لو جارت عليه الظروفي

والصدق عند اهله شريعة وميثاق
والصادق الواضح عديم الوصوفي

نجود الفيصل

‏على دربك لو إن العمر يوقف تمشي الاقدام
‏إلين اموت ابيك وغيرك من الناس ما ابيها

‏يا روح الشعر وحروف الكلام وسطوة الالهام
‏احاسيسي معك ماني بعارف كيف اخبّيها

‏يا مرساي الاخير وذكرياتي في مدى الاعوام
‏يا ضحكة وجهي اللي تذبح اشواقي وتحييها

.....

البل شعاها نفيضه وسرحت يمّه
وهل الجهازات والشاصات خمّوها

تخبّطت في غديره واشرعت جمّه
وداجت وطابت خواطرها وردّوها

.....

تغاضي ياعيوني والسنين قصار
ما دام الوقت لا انصفني ولا انصفته

احب اللي مضى لي واكره التكرار
واشوف اللي يخوفني ولا خفته

غريب شعور والواقع غريب اطوار
كثر ماكنت راضي كثر ما عفته

ياكثر اللي تحاشيته يصير وصار
ياكثر اللي تمنيته ولا شفته

.....

تقول صوّر لي المطر لا تمشيت
وشلون اصوَّر للسحابة مطرها

.....

ياقبلة الروح مدري قبلة المترفات
مازال حبك مقيم وذكرياتك عطر

لو تكثر الامنيات وتكثر المغريات
مالي طمع غير في صوتك وصوت المطر

.....

يارفيق الذكريات وياشريك فؤادي
‏كل ظن فيك ظنيته تجي من فوقه

‏ يتسلل صوتك من الذاكره وينادي
‏لين يفتق جوفي اللي كنت أخيط فتوقه

‏ايه يا لبيه يا موتي ويا ميلادي
‏جعل حزنٍ مرني ما تونسه وتذوقه

‏ياوقودي وأندفاعي بالحياة وزادي
‏ياحشاشة جوفي وقلبي ودم عروقه

.....