فوق هام السحب ( الشعر الشعبي) على متن القوافي

جاك عقلي وفكري والنظر والفؤاد
وجاك قلبي وروحي سقتها في يديك

كل شيً أخذته صرت مثل الجماد
ما بقى الا عروقي ما تبيني تبيك

.....

‏لا تحسف وأبذل الطيب في كل أتجاه
‏من قضى للناس حاجه قضى الله حاجته

.....

‏اما صباح يجيب طلتك ويروح
وتبقى صباحي لين تفنى حياتي

ولا فلا لي فيك يالصبح مصلوح
خلك على صبحك وانا في مباتي

.....

يا وليف الروح ياحلو الوصايف
‏يا بعد من شافت عيوني عيونه

‏احبك حب غير عن كل الولايف
‏حب صعب على الأوادم يفهمونه

.....

‏من غيابه صرت كنّي شخص ثاني
‏وكن في وسط الحشا نيران حيّه

‏والله إن صدري من الضيقه يعاني
‏كثر ما عانت فلسطين الأبيّه

.....

من عطاني قدري أعطيه احترامي
‏ومن تجاهلني تجاهلته وطفته

‏ومن يدوّر قربي أعطيه اهتمامي
‏ومن يقفي عني أهملته وعفته

‏والمكان اللي ينزّل من مقامي
‏تنكسر رجلي ليا جيته وحفته

.....

‏الفقد مسراي وأحلامي بعيدة منال
‏كم واحدٍ أشعر بفقده من قبل لا أفقده

‏ذابت بقايا فؤادي فوق جمرة تعال
‏ماتدري إن الحنين يفتت الأفئدة

‏ما عاد لي خاطر يداري غياب ووصال
‏إن جيت يامرحبا و إن رحت فالمزهده

.....

أكبر فخر للناس أنك من الناس
وأكبر فخر للارض ممشاك فيها

في من غلاك أحساس مايحده قياس
أغلى من الدنيا ومن هو عليهـا

.....

السعي فالحاجات ومساعد الغير
‏هذا الرصيد الباقي اللي يسرك

‏وان كان مالله قدّرك تفعل الخير
‏على الاقل امنع عن الناس شرك

.....

قابلت انا الدكتور ثم قال وشفيك
قلت العفو لجل المرض جيت يمك

قال انصرف واطلب من الله يشافيك
مابه مرض معروف شفته بدمك

ارجع على منهو تحبه يداويك
يبرى المرض اذا على الصدر ضمك

.....