فوق هام السحب ( الشعر الشعبي) على متن القوافي

في غيابك ملتهب قلبي على جمر انتظاري
‏والحزن ان ماتعشا من قفص صدري تغدا

‏ذي طيوفك من يميني ذي طيوفك من يساري
‏تطرق فباب الطواري طيف جاب وطيف ودا

‏والله اني في محيا وجهك الطاهر اماري
‏وكل زينٍ يمرني عقبك امره واتعدى

.....

‏انا لو لا غرامك ما قبلت لصدتك تبرير
‏ويا ليت لغيابك عذر مايطري على بالي

‏اكابر واتظاهر بالصبر واشره على التقصير
‏وانا في كل يوم يمر اشوف النقص في حالي

.....

في رمشها المسموم فتنه وتأويل
وفي عينها نجد العذيه وأبوها

.....

قالوا علامك صامت وقلت ياناس
كثر الكلام يقل لأجله مقامـي

الصمت حكمة والحكي مصدر إفلاس
ولقيت في صمتي يزيد احترامي

.....

الفلوس تنصب الخبل وعيال الرخوم
والعلوم الغانمه تشتكي من جورها

انتهى وقت المطاليق وعيال القروم
وجاك وقت أهل الدنانير تلعب دورها

فايزالمنصوري

يالله يالي بذكرك ينشرح صدري
ياواحدًا لا إله إلا أنت سبحانك

تغفر ذنوبي وترفع فالسماء قدري
أنت الكريم الودود أطلبك غفرانك

.....

‏لو بساطي من التربة وسقفي عريش
‏نفسي أسمى من الارض ودراويشها

‏يمكن أقنع بحلمٍ ماوصلته وأعيش
‏ما لبعض الأماني غير تطنيشها

‏لكن آعيش عيشة منكسر ماعليش
‏هذي العيشة اللي ما اقدر أعيشها

.....

عجل على التوبه قبل فايت الفوت
ولاتقول الوقت باقي وتوه

أحذر ترى التسويف شرٍ وممقوت
واللي أمربه دين الأسلام سوه

العمر لابده من العجز والموت
لو مر به في بعض الأحيان قوه

.....

‏والله انك دون خلق الله لحالك
‏مالك بقلبي شريك ولا مضاهي

‏والعمر خذ ماتبي منّه حلالك
‏حافظك حفظي لماء وجهي وجاهي

.....

يابو نـوايا طيبه وين اوديك
ما عاد حد من طيبين النوايا

آثارهم من كل صوب تناديك
والوقت ضيق من جميع الزوايا

صحوة ضميرك واحترامك مباديك
ما تختلف حسب اختلاف الروايا

حاولت اهديهم وحاولت اهديك
واطماع بقعا ذا تسوي سوايا

أسود تتمرق على بيضة الديك
وكلب يتعشى الغنم فالحوايا

.....