ديوان قصائد لشعراء المملكة العربية السعودية (متجدد)☘️☘️

سفير الحزن
..
غريب ..
ماقلتلك ..
من هو ..؟
تبي تعرف ..
هو اللي .. لو خذلك الحب
وبان الشوق ..
في عينيك ..
وعجزت إنك ..،،
تداري حزنك وهمك ..
واختفت ..
من ليلتك ..،،
كل الأماني ..
وماشفت الصبر كافي ..
تلاقي دمعتك عنده ..
يعيش أحزانك بصوته ..
ويغني جرحك الخافي ..
ولو تبغى الشجن عنده ..
ولو تبغى الفرح ..؟
قليل من الحزن عنده ..
ولو ناديت
وعذبك بعض النداء ..
بصوته عنك ينادي ..
عرفته؟!
سفير الحزن في الدنيا ..!!
عبادي ....
عبد الرحمن بن مساعد

بهو فندق
..
بهو فندق .. بلد غربي .. في فصل الصيف
على ميعاد أو صدفة .. جمع أجناس مختلفة
ولا فيهم أحد وافق .. أحد ثاني على تعريف للمنطق
بهو فندق .. فيه الناس مكتظة
فخامة تكسي الجَنبات
نادل يحمل الطلبات .. على أواني من فضة
هنا تجّار .. يحكوا أسهم وسندات
هنا سمسار .. هنا شاعر .. هنا بنيات
هنا فلكي .. هنا لاعب كره بارع
هنا فنان .. هنا متعهد السهرات
هنا يحكوا عن الأوضة .. هنا يحكوا عن الموضة
هنا يحكوا عن السادات
وبركن ٍ ماهو للصفوة .. بجنب الباب
كرسيين .. حوار يدور بين اثنين حيل أصحاب
ملامحهم تودي يم شرق أوسط
وهيئتهم وحالتهم .. بسيطة أو بعد أبسط
شفّ سايح من اليابان .. يداعب آلة التصوير
يغازل آلة التصوير
سايح هذا يا غلبان؟
هذا السايح البارح .. كانت صورته تحكي
في صدر الصفحة الأولى
يقولوا خامس أغنى شخص في العالم
وأظن أنه .. وربي وحده العالم
جمع هالمال والثروة .. من استيراد أو تصدير
نسى الكاميرا على الكرسي
لا يا شيخ .. مثل هاذولا .. ما ينسوا
صدّقني نسى الكاميرا على الكرسي
لا والله .. رجع خذها
ظنك وينهو رايح؟
أكيد يزور له متحف
سخيف .. وهوايته أسخف
شفه مستني يمّ الباب
وش ينتظر؟
أظنه ينتظر تكسي
أقول عدنان: فاخر حيل هالفنجان
خذ شايك قبل يبرد
أقول أحمد: هذاك هناك .. هو منهو؟
أي واحد؟
هذاك اللي معه واجد
تخطرف أنت أو عميان
هذاك فلان
هذاك اللي كلامه منتهى الحكمة
وجوده مثل غيث السحب
هذاك اللي لأجله ترخص أيامك
وتقضي النحب
هذاك اللي يهينك وانت تتلقى
إهاناته بصدر ٍ رحب
هذاك اللي شعورك نحوه مبيّن
مزيج من الولا والحب
هذاك اللي اذا لاقدّر الله راح
يغطي حزنك الدنيا
وتهمس .. راح ابن ال ...........!!
كذا يا أحمد ..؟
شايفني أنا منافق ..؟
انا مسمح ولا أوافق
تظن اني بقلب أسود .. كذا يا أحمد؟
لا تزعل أنا آسف .. أنا آسف
ترى الدعوة سوالف
شف هذا خفيّف دم .. ويعطونه
يعطونه ..؟
يعطونه
ويرجع باكر لهذا .. يقطّع ذاك
ويشرشح أصله وفصله .. بخفة دم
ويعطونه؟
يعطونه
ويرجع بالأخير .. ضاحك على هذا وعلى هذا
أقول أحمد: ظنك هو رصيده كم ..؟
دقيقة صمت .. فرضها جيّت النادل
يشيل الشاي
ويقول ان العصير اللي يبونه لحظتين وجاي
شفّ الشاعر
هاذيك الحلوه تضحك له
أي واحد ..؟
شفه واقف .. يوقع دفتر لطفله
تخيّل ياخي يقولوا
بإنه يشتري شعره من الشاعر
اللي الشاعر المشهور يكتب له
يا حظه .. وسيم ومشهور
ياليتني أكون مثله
قوم نتصور معه
نقوم نتصور معه؟
ما باقي سوى هذي
نكبّر راس هالمغرور
خفيّف انت .. وغبي أحمد
ودايم فيك هالعلة
أقول عدنان .. ترى صاير طويل لسان
أحمد ياخي لا تزعل .. ترانا اخوان
تعوّذ بس من الشيطان
وانا آسف .. وترى الدعوة سوالف
فخمه حيل هالكيسان
اشرب .. لا تزوّدها
ترى يبيّن عليك تعبان
شف مو هذي صاحبتك؟
هلا والله .. إلا والله صاحبتي
تدري ..؟ تموت هي فيني
يا رجال .. خليني
خادعتك .. تراها والله خادعتك
أقول أحمد: عشان انسرقت فلوسك من زبيدة
صرت تشوف كل وحدة .. هي زبيدة
يا عدنان .. خادعتك
أنا قصدي لمصلحتك
شفها تكلم الرجّال
أي رجّال! .. اخوها ذاك
يا عدنان .. خادعتك
أقولك ماتبي غيري
يا عدنان .. طع شوري
مشاعرها .. وهم .. كذبة
أحمد .. احترم نفسك
أفا عدنان .. تمد يدك علي
وهذي السبّه
صفعه دوّت بركن ٍ
قريبٍ من هل الصفوة
عِراك في بهو فندق
جمع أجناس مختلفة
مافيهم أحد وافق أحد ثاني
على تعريف للمنطق
خارج صالة الفندق .. شرطيّين
يقودوا بالحديد اثنين
ملامحهم تودي .. يم شرق أوسط
وهيئتهم .. بسيطة أو بعد أبسط
كانوا أصحاب
في داخل بهو فندق .. بلد غربي
في فصل الصيف
عبد الرحمن بن مساعد

السفينة
..
ماقد سمعتوا عن سفينة في بحر
والبحر موج متلاطم .. والخطر فيه متعاظم
ماسلم منّه احد .. ماترك شي ٍ ابد
كودالسفينة وحدها
ماهزها موج البحر .. وان هزها
امسك بها ربانها
وابعد عن حماها الخطر .. بدينها وقرآنها
ماقد سمعتوا عن سفينة .. قويةٍ دايم عظيمة
بحرها هو الحياة والسفينة هي بلدنا
والفهد ربانها
ماقد سمعتوا من بنى هذي السفينة .. وكيف؟؟
كانت غبار .. كانت جروح متناثره في كل صوب
ورغم الجروح جمّع شظاياها بيده
بامر العزيز
وافنى العمر ليل ونهار .. وارخص لها قلبٍ وروح
عبدالعزيز
عبدالعزيز اللي بنى هذي السفينة
اتعبت منه الدروب .. واشتكت منه الحروب
بالسيف ارسى شراعها
وبالحب قوى حبالها
ومن يومها .. رغم السنين .. تمضي السفينة في دربها
ماقد سمعتوا عن سفينة
قويةٍ دايم عظيمة
بحرها هو الحياة والسفينة هي بلدنا
والفهد ربانها
ماقد سمعتوا عن اهل هذي السفينة
عن كرم اهل السفينة .. عن وفاء اهل السفينة
وماقد سمعتوا عن قهر حسادها
وكيف انها للي نواها بالغدر ماتمهله
تجعله ذر ٍ هشيم مايمهله طوفانها
ماقد سمعتوا عن سفينة
ارفعت قدر البحر
ماقد سمعتوا عن سفينة
قويةٍ دايم عظيمة
بحرها هو الحياة والسفينة هي بلدنا
والفهد ربانها
عبد الرحمن بن مساعد

تسلم عيوني
..
ياطيب حظي كان انا حلم دنياك ياللي تقول اني أمانك وخوفك
تحبني؟ ..أدري حكالي محيّاك رعشة يدينك وارتباكة حروفك
ياللي الوفا هو بعض أصغر مزاياك حملي ثقيل ووافياتٍ كتوفك
تشيل همي دوم كنّي أنا اياك صارت ظروفي مو ظروفي ..ظروفك
إن جيت ابحكي عن بهاك وسجاياك كيف اوفي أخلاقك وباهر وصوفك
وان جيت الاقي لك خطايا خطاياك أطيب قلوب الخلق ساكن بجوفك
وشلون ما احبك وهذي سواياك؟! وشلون ما أهديك عمري فكفوفك؟!
ياقلب قلبي وش حياتي بلياك؟! تسلم عيوني دامها هي تشوفك
عبد الرحمن بن مساعد

قالت أحبك
..
قالت احبك
واحضنتي ثم ٍ قالت من انت؟؟
وضحكت .. ثم ٍ بكت
ثم ٍ حكت .. ثم ٍ سكتت
ثم ٍ قالت لي من انت!!
اللي جرى .. ماهو غريب
الزمن فعله .. عجيب
نسّاها اسمي ..
نسّاها حبي ..
نسّاها دمعي ..
في يوم انا ..
في احضانها طفل وحبيب!!
ياهي جرحتني .. يوم نكرتني
حاولت اداري عبرتي .. بس ماقويت
خانتي دموعي .. وبكيت
وبعدت عنها واتبعتني وامسكت يدي
واحضنتي ومسحت دمعتي من فوق خدي
رجعت البسمه لشفاي
نسيت انا همّي وشقاي
صرخت للدرب الطويل
لا مانستني .. مستحيل
الزمن او اي شي ..
يقدر يقسيها علي
يقدر ينسيها هواي
وفجاءه سكتت
ثم ٍ ضحكت
ثم ٍ قالت لي من انت؟
عبد الرحمن بن مساعد

اسأل الأعمى
..
اسأل الأعمي .. ان كان في نومه يشوف
ليه يصحى؟!
واسأل اللي ما درت عنه الهموم
اللي درى ان العمر محدود
وان الفرح مهما اختفي .. موجود
اسأله ليه ينوم؟
وان جاوبوك اسألني ليه حنّا افترقنا
يا صاحبي مابه سبب لفراقنا
غير اننا جينا بزمن ماهو زمنا
ياصاحبي مابه سبب لفراقنا
غير اننا في حبنا عشنا الصدق
وفي وقتنا وشهو الصدق
في وقتنا لجل اللقاء تكذب
ولجل تاصل ماتبي تكذب
ياصاحبي خذها من جرحي نصيحه
كانك تبي تاصل؟ اكذب .. اكذب .. اكذب
الصدق في وقتنا اصبح فضيحه
في وقتنا دايم تهيم في شي ماتعرف مداه
دايم تهيم فلي بعد عن سكتك
واللي زهد في محبتك
واللي ف يدك ومتحمل جروحك معك
ما يهمك تنساه
ولو تقتله ما يؤلمك وبقدامك تاطاء على دماه
يا صاحبي وقتنا في اوله ضيّعنا أولى القبلتين
وفي آخرة الله اعلم وش بيبقي
في وقتنا صار الغدر شي ٍ عظيم
والوفا ماظنتي ان كان بتدور بتلقى
يا صاحبي في وقتنا أطول مسافة ممكنه
تمشيها بين النقطتين
الخط المستقيم
يا صاحبي في وقتنا وقت الألم
من يسمعك مهما حكيت
من ينصفك مهما شكيت
منهو اللي ما يضحك إذا ذلتك دنياك وبكيت
يا صاحبي في وقتنا
ما للمشاعر ناس
يا صاحبي في وقتنا لبعض القلوب إحساس
يا صاحبي في وقتنا وقت الكلام
وقل الفعل .. لامات احد وانتقل لعلى رفيق
من طيبنا نحزن عليه
نصلي عليه
ناصل معه للمقبرة
وفي المقبرة غير الدعاء وقولت الله يرحمه
مابه كلام .. وندفنه .. ولا دفناه نبكي
بدون دموع أو بدموع
المهم بعد ما نبكي نتركه ونروح
وتلقانا نقول مسكين يا فلان مسكين
من دنيتك وش اللي خذيت؟
وبعد باب المقبرة بشبرين
واقل من الدقيقة لامن دخل فينا الزحام
من طيبنا نضحك ونسمع أغنية
لجل نتسلى في الطريق بين المقبرة والبيت
يا ربي سبحانك ياللي تجير من العذاب
قلوبنا وش صابها؟
في وقت غدا بين الحياة والموت
وبين البكاء والضحك
شبرين ودقيقه وباب
ويدننا اللي قد حثت في وجه ميتنا التراب
هي نفسها اللى بعد شبرين واقل من الدقيقة
اختارت شريط وحطته لجل تقتل طول المسافة
بين المقبرة والبيت
يا صاحبي في وقتنا احسن كثير
من بعضنا
في المقبره على الاقل ميت وندري
المشكلة متنا وإلى الحين ماندري
يا صاحبي في وقتنا ضاع احترام الموت
في وقتنا حكينا ما أكثره
وللأسف كل الحكي من غير صوت
وان كان به فم ٍ صدق
واسمحوا يحكي بصوت .. ما نسمعه
ياصاحبي قدامنا كان اختيارين
يا نجاري وقتنا ونكذب ونخدع نفسنا
يا نفترق .. لان الفراق في وقتنا
هو الصدق .. افترقنا
يا صاحبي كانك تشك في أسباب الفراق
دور لك اعمي وإذا صحى اسأله
ان كان في نومه يشوف ليه صحي
وليه افترقنا؟؟؟؟؟
عبد الرحمن بن مساعد

صدق أولا تصدق
..
صدّق أو لا تصدّق
كل ما تباعدت المسافة بين الرغيف والجوع
تلقى الفرح أصدق
صدّق أو لا تصدّق
لامن غدت كل المشاكل جوع الصغار وسقفٍ يداريهم قبل يصحى النهار
تلقى الشعور أعمق
صدّق أو لا تصدّق
كل ما انقفل درب انفتحت أبواب
صدّق أو لا تصدّق
لو فيه احد طيّب .. للطيبة أسباب
صدّق أو لا تصدّق
قليل من يعفي ويسامح .. كثير وده ينتقم
بس ينتظرله وقت سانح
صدّق أو لا تصدّق
القناعة كنز يفنى
ولو كل من ياخذ قنع .. وكل من ياكل شبع
كان الفرح غطى شوارعنا
صدّق أو لا تصدّق
كل النهايات البداية .. وأحلى البدايات النهاية
وكلنا رغم القساوة الظاهرة .. نبكي قدّام المراية
صدّق أو لا تصدّق
به مطوّل لحيته .. والثوب يلمس ركبته
وما قرا في الشهر آية
صدّق .. ان الشعر صدقه .. اعذبه
ودي احكيلك حكاية وقبلها ابغى لسؤالي اجوبة
المال هذا هو وسيلة والا غاية؟!
لو ماهو غاية .. ليه الحروب؟ .. ليه السلام اللي تمناه الشعوب؟
ليه الحسد يملى القلوب؟
وليه الفقير المُعدم الكادح .. بهجته تملى الملاح
لامن لقى ذاك الثري يعطي هاذيك المطربة مليون
وهذا الثري لامن سرى من حفلته .. وقفت سيارته عند الإشارة
وجاه شايب يطلبه .. الهم عاثي في وقاره
دق ب اصابع مُتعبه .. على الشبّاك
قال: انا يا سدي مديون .. وانت الكريم
يحكون عنك في الجرايد .. وتقال في جودك قصايد
ويُقال انك للأرامل واليتامى عون
ما ابغى منك الا حاجة .. لبس الشتا لجل العيال
الله يسدد لك خطاك .. اعطني مما عطاك
واعتدل راعي الملايين الكثير في جلسته
وعقد حجاجه ثم قال:
ألا ما اثقلك واغباك .. ليه يا اخي ما تشتغل
انت كسول .. ومستغل
وطلّع من المحفظة فكّه .. رماها وقفل الشبّاك
ابغى لسؤالي اجوبة ...
ليه البر والتقوى .. مليان في جرايدنا؟!
وليه هموم هالشارع؟! .. بعيده عن قصايدنا؟!
ليه الفساد .. ليه الكساد؟!
وليه الحروب؟! .. وليه الحسد مالي القلوب؟!
وشهو الجواب؟!
اتمنى انه مايكون المال هذا هو وسيلة ماهو غاية
هذي الكلمة النبيلة .. اخترعها أغنيا
لجل مسكين ٍ شقى .. يرضى بقليلة
وصدّق انت او لا تصدّق
ماني الشخص المثالي .. كل مافي الأمر اني شاعر ٍ ماهو يبالي
كان صار اللي اقوله علقم ٍ او صار حالي
كل مافي الأمر اني استريح .. لا مشابي مركبي عكس اتجاه الريح
وما ابرّي من الخطى نفسي ..
واللي اجاهربه مثل همسي
صدّق اني ماني الشخص المثالي
كل مافي الأمر اني اجمع احساس الحواري وسط صدري
وانقل الواقع لشعري
كل مافي الامر اني شاعر ٍ مطرود من جنة خيالي
صدّق اني ما قصدت اني اكون
صوت للي مايبون
صدّق اني ماني الشخص المثالي
والا تدري لا تصدّق
عبد الرحمن بن مساعد

سيّد جروحي
..
سيد جروحي شمس عمري وظلي البعد طوّل والخطأ منك واضح
اذا غرورك يمنعك تعتذر لي تعال جنبي وابتسم لي واسامح
تدري احبك لكن الموت ذلّي ادوس انا قلبي لو الشوق جامح
الله عطاك الحظ واصبحت خلّي والله عطانياك طاغى ملامح
سألتني يا ياسميني وفُلي ياكيف يشفى الورد .. والشوك جارح
مثل العيون اللي لها كل كلي زايد حلاها لكن الدمع مالح
وش تنتظر يكفي دلال وتغلي الوقت ماهو للوصل دوم سانح
مادمت ترحالك ومادمت حلي ان صرت انا خسران ماصرت رابح
لا تعطي الفرصة لعذالنا اللي لكل ماهو يهدم الحب طامح
مالك صبر عني ومالي تسلي والوقت خيل صوب الآجال رامح
سيد جروحي شمس عمري وظلي الحب بعد وقرب .. مخطي وصافح
اذا غرورك يمنعك تعتذرلي لا تعتذرلي قول اسمي واسامح
عبد الرحمن بن مساعد

هذا الوطن
..
لله ربي جزيل الحمد والمنّه العادل القادر المتكبّر الرحمن
اللي عطى في كتابه رزقه وأمنه لبلاد مكّه وطيبه أطهر الأوطان
سبحانه أرسل رسول لإنسه وجنّه باليسر والمغفره والرفق والإحسان
ماكان فظٍ غليظ القلب لو إنه من حوله انفض جَمْع وزُعْزِع الإيمان
يالله صلّي على احمد ما هَمَت مِزْنه وما هَلّت دموع طفل وما تُلي قرآن
خُلقه عظيم ف كتابك قلت ذا عنّه رحيم فينا رؤوف اكرَم بَشَر قد كان
ياحافظ كتاب ربّك دارس السنّه البِر واضح وضوح الإثم والعدوان
عَلِّم كثير المجادَل تابعٍ ظنّه لا روس حنّا غدينا وْلا هم الأفغان
لبلادك المسلمين نفوس ممتنّه لبلادك الكافرين اتمنّوا الخذلان
للإسئله في الشوارع شَنّه ورَنّه وش وصّل الناس ذولا فوهة البركان
وشلون ينهي حياته في صُغُر سِنّه؟ وشلون هذي المراحل توصَل الإنسان؟
إن كان ماهو فراغٍ.. يأس يمكنّه ماهي حكاية تديّن.. ما لهذا شان
أو هي حكاية فوارق دنيا منجَنّه دكتور عاطل.. ويُثرى لاعب وفنان
أو هي حكاية عدوٍّ زاد في زَنّه لين المسامع تعبّت كره .. واستهجان
أو هي حكاية شفايف في الخفا دَرْنَه تلْعن صنيع الأيادي.. تبوس في الكتمان
هذا الوطن ياما رمينا همّنا بحضنه يستاهل أنه يفتدى بالروح والأبدان
هذا الوطن هو روح فهد وماحوى جفنه هوقلب عبدالله ونبضه هو وله سلطان
عيال أخو نورة ذراه ودرعه وحصنه هم سدرة المُلك وأهل المملكة أغصان
هذا الوطن شعبه من ملوكه وهم منّه متماسكين بصف واحد مثلما البنيان
هذا الوطن أكرم بلاد الأرض لكنه يبقى هلاك للمعتدى والباغي الخوان
لا مايهزّه حقد حاقد زاد في زنّه حافظه رب المشرقين الواحد المنان
هنّ الوطن برجال أمّنه يا فهد هنّه يستاهلون المجد كله صفوة الشجعان
المؤمنين الذايدين بروحهم عنّه أفعالهم مايحتويها نوط أو نيشان
ياللي تكفّر كثير الخلق.. بك جِنّه كل هالخلايق مضلّه؟.. وش معك برهان؟!
كل هالأمم في جهنّم..كافره عَفْنَه؟ وانت الذي مسك دمّك ضامن الرضوان..؟!
جنّه بعرض السما والأرض مِنْضَمْنَه هي حِكر لك مع رِفاقك زمرة الأعوان؟!
يالله إقطع ذيول الشر والفتنه ورُدّ كيد الأعادي فْنَحْرهم خسران
واكفِ البلاد التقيّه شرذمَه.. حِفنه ساروا بدرب الضَلال ولبّوا الشيطان
فجِّر ودمِّر بلادك .. تدخل الجنّه أفتى بهذا مشايخ آخر الأزمان!!!!
عبد الرحمن بن مساعد

سيّد القادة


..

عشرين عام

والكون احداثٍ جسام والكون يبدي الاحترام

لاهل السعودية الكرام

في ظل قايدهم فهد

عشرين عام

لولا فضل رب الأنام ثم خادم البيت الحرام

فهد الامام ابن الامام كان البلد غير البلد

عشرين عام

مليكنا الشهم الهمام ارضخ هوايلها العظام

وكفى المشقة والكَبَد

عشرين عام

خلّى عواصفها غمام ونيرانها برد وسلام

وبدّل شقاها بالسعد

عشرين عام

ماشافت بلادي ظلام كيد العدا اصبح حطام

حماها ربي من الحسد

عشرين عام

انجاز فاق ألفين عام علم وبنا ورفعة مقام

ياربي تبقى للأبد

يافهدنا عاشقينك شايلينك في نواظرنا لإنك

مخلص النية رفيع النفس مؤمن

مرخص الغالي لشعبك طيب اليمنى محنك

شايلٍ هم الوطن في وسط قلبك

مبتغي مرضاة ربك

به نجيت وفي رجاه احسنت ضنك

يابلادي دام خيرك ودام طيبك ودمتي في عز ورغد

يابلادي دام مجدك ودام سعدك في ذرى الغالي فهد

رعاك الله ياخادم بيوت الله وبانيها

كل أرضٍ بها مسجد تقول الأرض سجادة

رعاك الله لبلادك لأمة انت راعيها

لشعبٍ شالك في قلبه وعدك ثالث أعياده

تجي في المسلمين كروب عظيمه من يداويها

يداويها الكريم الشهم ملكنا فهد كالعادة

شمل خيره جميع الأرض اقصاها ودانيها

ملك افنى بعطاه الجود خلقه الله لعباده

تخيّر أشرف الألقاب تسامى عن تباهيها

تسمى بخادم البيتين وهو سيّد على السادة

طويل العمر وغالي الأمر ذرى الأمة وحاميها

شديد الضر ساقي المر للباغي على بلاده

ملاذ الجار .. رد ديار مغصوبة لاهاليها

طفى الفتنة وأخمدها وحرر شعب وقيادها

هقت فيه الكويت الخير وماخيب هقاويها

نخته ولا انتخى كحيلان تجيه الأرض منقاده

عطايا الضافي الوافي نبي نلقى تواليها

نعددها ولاقلنا قضت نلقى به زيادة

عطاه الله من فضله خصال مانلاقيها

سوى فاطيب ملوك الأرض فهدنا سيّد القادة


عبد الرحمن بن مساعد