ديوان قصائد لشعراء المملكة العربية السعودية (متجدد)☘️☘️

شاعر طبل


أنا زميلي ضمير ونبل


ما يزرع الظلم بأدراجه
لا منّ غيره عصته السبل


حكيم..لا غبرّت واجه
شعور قبل الشعر..لا..قبل


وقبل الورق روح وهّاجه
لا هو محابل..ولا هو حبل


كن الفرح خلق بإحجاجه
ولد الأسد لو تسبه شبل


مثلك يوكر على أوداجه
والشخص باللي عليه وجبل


والناس كلٍ ومنهاجه
شاعر خيالي..و شاعر خبل


و شاعر ولا شاعر بحاجه
وشاعر طبلكي..وشاعر طبل


و شاعر حلاته هي إزعاجه

سليمان المانع

دلو بوحي


يا دلو بوحي جذبتك جيتني شلقا

تارد تصدّر ولكن منت لاقيها

وقفت هنيّا ولا تحوّل ولا ترقأ

دمت سيامي حبال الرمش تقصيها

نهار الاحزان ليل أشرب ظما الفرقا

يوم المسافات تطويني وأنا أطويها

أقلب أوراق تاريخ العطش وألقا

أشياء أبيها وبعض أشياء مابيها

الله عطاني جناحيني عشان أشقا

أقرا فضاها وأنا أجهل سر أراضيها

شف وجنة الشوق من خنق الزمن زرقا

ناظر عيونه يتيمه كيف أبكيها

كانت سحابه ولاهي معذرة أنقى

أخاف تزعل ومن يقدر يراضيها

كانت فلانة تسافر للسما طرقا

تمشي وحدها ولا بنت تباريها

هدية الله والله لابغى ينقا

يدني الهدايا على مقدار مهديها

مرّت أغاني وضجّ الجمع يا عنقا

لا واهنيّه حبيبك قلت أسمّيها

ومن باق عهدك يا علّه يوم ما يبقى

ياركعتينٍ سهيت وجيت أصلّيها

لعيونك أدمي وذا دلوي رجع شلقا

أبدّل حبال خادمها وواليها


سليمان المانع

حكم القدر والقراده


مجبور أعايش غربةٍ باسم الإحساس

وأجامل الأحزان باسم السعاده

واحيا برجوى مقبل العمر لا باس

واصبر على حكم القدر والقراده

متفائلٍ بالخير مبعد عن الياس

وأجاهد الحظ الردي بالقراده

لو صابني جور الليالي والإتعاس

وأعلنت للأقدار كل السياده

أشيل من قلب الشقا كل وسواس

وأقول من صدمات قلبي إفاده

اصبر وكم شاكي الليالي من الناس

ولو صار سهر الليل للعين عاده

وليا عصى قلبي سلمت أنت يا رأس

خله عسى قلب الشقا للإباده

خله يعايش غربةٍ باسم الإحساس

منه على حاله وهذا مراده


سليمان المانع

اعجاب


صدقيني أي كلمه تنطقيها


تعتبر في ذاتها معجم غرام
وأي نظره من عيونك ترسليها


ما يترجمها على أوراقي كلام
وأي بسمه في شفاهك ترسميها


منتهى أمن المولع والسلام
وكان ما نظرات عيني تفهميها


يصبح اسم البوح في شرعي حرام

سليمان المانع

فلا أخضع


لا......ياعلي ماهمني مستواها

ولانيب من يعشق سراب المشاهير

صحيح يسرح خاطري في حلاها

اللي غلب سحر حكته الاساطير

وصحيح انا طير مداري هواها

واصل الربيع بملبسه يغري الطير

وصحيح انا شاعر خذاني هواها

ومن طابع الشاعر يحب الغنادير

كله صحيح الا اني اطرد وراها

لو هي قدر وانا رهين المقادير

والله فلا اخضع لو ملكني غلاها

وان طوعتني مابقا بالبشر خير


سليمان المانع

تضحك


تضحك وينبت في كفوفي نواوير

تغضي وتسقيهن سوالف سفرها

انا انبهرت بجد، لااسمع ولا اشير

ومن شاف ماشافت عيوني عذرها

ذا شي غير الناس ياهل الهوى غير

حسن الوحدة لوتعرت سترها

خلاص يادرب الهواوي معاذير

هذي هي اللي كنت يوم انتظرها

طشن بنات افكارها طشت اعاصير

وجتني ينثر ريح شعري شعرها

وقفت مثل ظبي سمع رمي ومذير

تجمع من كفوف المتاهة ذعرها

جنون والله ماتخيلته يصير

ينحر قهر كل الحواجز نحرها

فيها براءة فوق كل المعايير

الكون كله لو بغا ماختصرها


سليمان المانع

أبعاد


من لبّس عيونه ظلام المدينه؟

وهو الفضول بنظرته مالها أبعاد

يغوص بأوراق السنين الحزينه

وميعاد يولد كل مامات ميعاد

بعثر على درب الاماني سنينه

تضحك عليه بلاد ويلوذ ببلاد

ليا ظمت ذكراه ..يمطر حنينه

وتغرق ملامحهم ولاينقص عناد

وين الامل..وين السعادة ووينه؟

يقوده الوقت الرمادي وينقاد

تلطخت في دم شعره يدينه

وصار الزمن شاهد وقاضي وجلاّد

قابل بشين العمر من دون زينه

وهو الذي في ماضي الوقت زهّاد

اعشوشب ظلال المدينه بعينه

علمه بشمسه تسع والباقي مهاد

يلمس على الخلوه بقايا سنينه

ويدلي على بير الهواجيس ورّاد

تنسل من ضلوعه أغاني دفينه

تقرا بعيونه..شايبٍ يندب أمجاد

يحق النظر يرفع بعزّه جبينه

ويشوف بكره مثقلاله بميلاد

ترجع لوجهه ..طلته ياسمينه

وترقص على صدره مشاهير وأجياد

يفتح عيونه ماتحدّه مدينه

يرسم من الاول لنظراته..أبعاد


سليمان المانع

يا واليتني


من قال ماضيك يا اغلاهن مهو غالي


من قدر يكذب وقال بخاطري غبتي
انتي تعرفين لاهبت على بالي


ذكراك للشرق طارت بي وغربتي
الدرب أوله مزح لكنه بلا تالي


ولا خفتي الله من القسوة ولا تبتي
يا واليتني يا علّك مالك الوالي


كأنك اللي بزود البعد قربتي
حلو الشعر مر لكن بك غدا حالي


كم ذاب لك وصف ذوبهن ولا ذبتي
مديت شوقي وشفت الصد يثنالي


والنفس تجزع وانا صادق وكذبتي
يا بنت ياللي تظن ان الولد سالي


لو مر بك ربع ما مر الولد شبتي

سليمان المانع

سينا وبيروت


حياتنا جنح الصدى ترفض الصوت

وهو غصنها المفرد وهي جمع ورقا

نهرب لها تهرب بنا.. نطلع تفوت

الموت الأصدق لا والأقوى والأنقا

نعيش وأحلا أقمارنا تشربه حوت

ونضرب على نحاس القصايد لغرقا

عن عنكبوت أحلامنا ننسج: سكوت

طلع ذهب.. يا فضة الحكي فرقا

نذبح بيوت بدمها نبني بيوت

من وين نرقا الدرب وين نرقا؟

عاري جهلنا شغلته يلعن التوت

وهذا الورق لا أشبع ولا أمتع ولا أسقا

كيف أفتخر؟! وأنا أشعر الشعر عكروت!

يَدوّرْ بنا كل الفضايح.. ويلقا

خجلا قصايدنا تهزَّعْ لهارَوت

وترقص لسحره في نواعيس عنقا

مبطي نسينا جرح سينا وبيروت

يعني وبعنا حيف حيفا بطرقا

يا أخي لو إن آخر قصيده هي: الموت

كم شاعرٍ يرحل؟.. وكم شعر يبقا


سليمان المانع

السعودية


ياتاج راسي .. ياعمري .. يالسعوديه

ياجنة الشوق .. جنني هوى رياضك ..!

احيان احسك .. بطهرك ام صوفيه

واحيان احسك غزال .. وتذبح الحاظك

عوجا واهلها .. بسيوف العز محميه

يخسر عدوك ولا له حلم بحياضك

دام ابو متعب ..!! ميلها شماليه

والعدل حكمه تشوف دول مركاضك

يادار مكه .. وطيبه ياصحابيه

صحراا نبيه وصحبة ربنا عاض

روح العروبه ونبض عروقها الحيه

تاريخها صار وتربى على فياضك

ياتاج راسي ..! ياراسي ..! يالسعوديه

سماك فنان .. ويجنن هوى رياضك ..!!


سليمان المانع