اخترنا لكم

يازمن العجائب وش بقـا ماظهـر
كـل ماقلت هانت جد علم جديد

ان حكينا ندمنا وان سكتنا قهـر
بين قلب عطيب وبين خـل عنيد

.....

‏لاتوعد بشي واحسـاسك مهو قده
‏تـرى المشـاعر ثمـينـه والـوفا نـادر

‏لاتجـازي اللي عطاك الود بالصـده
‏ماكل قـلب على حفـظ الغـلا قـادر

.....

‏ما كل مستشفى علاجه يداويك
‏ولا كل دكتورٍ يداوي جروحك

‏جرحك علاجه يووم خلّك يناديك
‏هـذا علاج القلب وعلاج روحك

.....

بعض البشر لا غاب نفقد جنابه
لو ما سألنا عنه غـالي ومقبول

وبعض البشر لاغاب قلنا غيابه
أفضل وليته دايم الدوم مشغول

.....

عمر البحر مالتفت للي رماه بحصاة
يبقى هدوءه لنا عبرة وموجه خطر

لاتترك الهم يفقدك الفرح بالحياة
مابعد طول الجفاف الا هطول المطر

.....

‏احيان مالي مزاج اكتب ولا حاجه
‏وأحيان قبل اكتب الأبيات تكتبني

‏وأحيان ما اطيق كل الخلق وأزعاجه
‏وأحيان حتى ضجيج الناس يعجبني

.....

‏الشــك مـــايدخل قلــــوب الـــواثقين
اهل العقــل والعــرف وابعاد النــظر

والصبـــر خصله طيبــــه للصـــابرين
اللـــي لجيت اوصف معانيهم بحــر

لاصار هادي شفت فيه المــبحرين
وان هاج ما للـــي علــى موجه مفر

.....

كن صافـــي النيه وتوكل على الله
من كيد عدوانك يصونك ويحميك

ارفع مقامك عــن علوم المذله
وربك على طيبة نواياك يعطيك

واللي يثير الـــشك والكره خله
ارسم علــــى بيض النوايا مباديك

.....

‏خلك مثل نجم ٍ تعلى عن القاع
كلاً يشوفك بس ما ياصلونك

وخلك على كلمة نعم دوم طماع
افعل وغصب عنهم يمجدونك

عدوان عينك ترتخي لك وتنصاع
من زود طيبك فوق ما يلحقونك

تحرق بهم بالطيب ولكل لك طاع
من طيب راسك كلهم يسمعونك

واسلم وسلم وحفظ العلم بالساع
أن كان تبغي العز ثبت اركونك

.....

وفيك من وضحى يمارى بها بين الحلال
‏من غلاها راعي الابل ماهوب يسوقها

‏لابغوها اهل الملاين مرخين الريال
‏حبها في قلوب اهلها موقف سوقها

.....