فوق هام السحب ( الشعر الشعبي) على متن القوافي

‏لا يفجعك الفراق الا بديت اطرّي المنكاف
‏ترى ربي خلقك لحالك وخالقني لحالي

‏ليه اكترث للشمس لاهفّت ورا المشراف
‏وهي لا هفت اول ما يقفي عني ظلالي

.....

‏يا عيـون اللـي مـن ظلاله مذيّر
‏ما يدانـي لمحة العين البصيره

‏من قوانـيص الضبا قدهو مطيّر
‏شايفٍ شحن البنادق بالذخيره

‏فيك من عنقه ومبسمه الصغيّر
‏والعيـون الناعسات المستديره

.....

‏على النقا نبقى ولو عاقنا عوق
‏ويبقى الوفا منا و فينا و إلينا

‏ووجيهنا بيضا و هاماتنا فوق
‏وإن ضاقت الدنيا ما ضاقت علينا

.....

‏ما يصبر على الوقت غير رجّال
وما يسرج العنقا غير خيالها

ما كل من قال للمرجله فعّال
ولا كل من طلب المعالي نالها

.....

اشلون تهجرني وأنا مالي على الهجر أحتمال
‏وشلون تهملني وأنا مانيب أطيق أهمالها

‏وشلون تقطعني بسيف البعد قطّاع الوصال
‏وأنا لو أقطع عرق قلبي ما قطعت وصالها

‏وشلون ما تشتاق ما ترحم ما تذكر ما تسال
‏وشلون ما تطلق يدين كبلت باغلالها

.....

ابي سجّهٍ يسلا بها القلب لا غنيت
لعل الجروح تطيب والهم ينزالي

.....

أنا أغليك من بد الخلايق ولا أدري ليش
‏ومن حبك أعطيتك على القلب ملكيّة

‏عطيتك وأنا عمري تعدى سنين الطيش
‏ولا خذت من عندك ضمانات بنكيّة

‏أمدك غلا من قلب صادق ومدك ويش
‏ سوى كيّة منك على الضلع مركيّة

.....

من عرفك وما قضى عمره طروب ومسفهلي
‏من لقاك وما لقى الدنيـا مثل وجهك جميله

‏منت بالظبي الجفول ومنت بالظبي المفلي
‏الظبـا مـا تسجن العاشق ولا تخلي سبيله

.....

‏مغتني بالله لامن عطا يغني عطاه
‏كل مده من طرف بحر جوده وافيه
‏
‏والنفوس اليا استعزت تعلمها الغناه
‏مكسب الإنسان فالوقت ستر وعافيه

.....

‏يا غاية القلب هاك القلب دون الوصاه
‏جميلك ف جيتك وايامنا فانيه

‏يوم استوت عندي وراح الامل فالحياه
‏جيتي وشفت الحياه بنظرةٍ ثانيه

.....