ديوان قصائد لشعراء المملكة العربية السعودية (متجدد)☘️☘️

كلمة حب مشروعه كلمة حب مشروعه


تحيّاتي وأشواقي تصلّك يارشيقة قد
مادام ان الزّياره من ولاة الأمر ممنوعه

انا حاولت اجي لك وآتسلّل من قصور الود
وحاولت اتصل لكن خطوط الحب مقطوعه

ابا ارفع لك رساله من هنا والشّوق ماله حد
ابا اكتبها على الصّفحه وفيها الوان مزروعه

لعلّك لا قريتيها تواسيني واشوف الرّد
وتحيي قلبي الميّت بكلمة حب مشروعه

أنا تايه بلا صوتك وعايش بين جزر ومد
جمعت حروف حب وجات بعد الجهد مجموعه

تقول انتي وحشتيني وحشتيني بجد بجد !
تقول اسمك حروفه في سويدا القلب مطبوعه

انا احبّك برغم البعد رغم الهجر رغم الصّد
تعالي طمّني قلبي تعالي هدئي روعه

طفح كيل الغرام اخرس.. نطق فجأه وباح السّد
وجاع الحب ياعيني ويكسر خاطري جوعه

يا أجمل من سكن فيني ياعود ازرق ياريحة ند
ياباقة ورد فوّاحه ياست الحسن ياروعه

يا أطيب قلب في الدّنيا ياأحلى عين وانعم خد
يا أعذب من قراح الما يا ترنيمه يامقطوعه

يا أحلامي يا آمالي ياعمر وكنز ما ينعد
ياكلمة عشق رنّانه ونغمة حب مسموعه

ياتيّارات تدفعني لأقصى حب واقوى شد
يا تغريبه وتأسرني وسجن امشي على طوعه

ياجذّابه ياكذّابه يالعّابه أحبك جد
رساله حامله عنوان ( كلمة حب مشروعه )


علي سعد ظافر الشمراني

يخرب بيتك يخرب بيتك


قصدك تعذّبني وهذا الظّاهر
ياليتني في يوم ماحبّيتك

دنّست ياشيخ المقام الطّاهر
كرّهتني في الحب يخرب بيتك

ومادمت متجنّي وسيفك شاهر
اغسل يدك.. لوصحت مالبّيتك

وان كان حبّك في خفوقي قاهر
انا رياح القهر لوهبّيتك

ساهر من اخر ماالتقينا ساهر
لي حق يامغرور لو شبّيتك

سحبتني عنوه جمال وباهر
ماعشتك الا بعد ما طبّيتك

ياحلو لوحبّيت كنت تجاهر
تبّت يداك وحقي ان تبّيتك

ماشفت ورد الحب فيني زاهر
ماشفتني في داخلي خبّيتك

ناوي تعذّبني وهذا الظّاهر
ماني "علي" لو كان ماربّيتك

وشفيك دنّست المقام الطّاهر
وخربت بيت الحب يخرب بيتك


علي سعد ظافر الشمراني

شهري بيتين بدع ورد وارجو المشاركه من الجميع

البدع

كل ما جيت باصل بابهم للباب وصّد ..... الله اكبر عليه ان كان ما يلطف لحالي

الرد

ليش يانور عيني تبتدي بالهجر والصد .... صرت عايش مع كل البشر كنّي لحالي

رائعة من روائع الشاعر علي
مساءكم ورد جوري ودهن عود كمبودي


دلوعة بلقرن ضيفة علي بلاد شمران من بلاد بلقرن

رائعة من روائع الشاعر علي وأتركها تتحدث عن نفسها

الغائب اللي مشتهي تكليمه
مضى عليّ الوقت ما كلّمني

سلّمت .. وأرقب ردّه وتسليمه
وابطأ.. واظنّه للجفا سلّمني

ياديم يامخزون بأحلى غيمه
ليت اللقاء أمر وحضر وأرغمني

من عام والأشواق في تحريمه
لاكن عسى للوصل ما يحرمني

هو طيب عمر الشوق مع تنعيمه
ليت الصدود المفتعل يرحمني

هند أرغمت كسرى على تحجيمه
تحجيم تُرجم.. بس ما ترجمني

والحيره اللي كانت إسم وقيمه
زالت وأنا لازلت كلّ .. وضمني

فقير لله .. وأغتنيت بخيمه
مع ناقةٍ مجهم ولم تجهمني

والقاسي اللي سمّ روحي ضيمه
صبري عليه أخاف لا يهضمني

أحبّه .. وروحي لروحه شيمه
والشام لو هُشّم فلا هشّمني

هو حبّي اللي مشتهي تكليمه
حتّى لو أقفا الوقت ما كلمني

شبيه الطفل

كل عام وانتم بخير ... وعساكم من عوّاده

مشاركتي واتمنى من الله ان تنال الرضا..

اذا منّا تقابلنا عشيّه..
انا وانتي وحول ابها البهيّه

اسلم من بعيد اخشى وليّك..
واشوفك ماتردين التحيّه

تجاهل او تعالي او تغلّي..
او تخافين لانصبح قضيّه

انا وانتي قضيه منذ مبطي..
وقاضيها يبي يقضي عليّه

ومادام الحب خصمي فالله اقوى..
انا في الحب ماعندي حميّه

اذا حبيت شخص انهد حيلي..
وعانقت الحروف الأبجديّه

وعانقت القصايد كل ابوها..
وجددت العصور الجاهليّه

قريت في الكتب لين اتعبتني..
سوالف قيس ليلى العامريّه

وانا ذلحين قيس ابن الملوّح..
ويمكني تعديته شويّه

رسايل شوق واطروق وقصايد..
ولاينقصني الا الهاشميّه

من الافراط ملتني حروفي..
وتاهت مفرداتي في يديّه

شبيه الطفل ف اول ابتدائي..
وانا عندي شهاده جامعيّه

ارتب كل فكره واتّبعثر..
على التعبير مالي مقدريّه

حروفي ورد والدم ترتوي به..
وكسر صدك اغلى مزهريّه

ثلاث اشهور وانا اكتب قصيده..
قويه بين خلق الله قويّه

حرام الي تسوين ارحميني..
انا لي قلب ماتلقين زيّه

ابن شداد لو عاصر زماني..
حلف بالله مايعشف بنيّه

واقر اني على العرش امتربع..
وعرش الحب للحاكم بليّه

ابااشرح كل كلمه وافهميها..
من جروحي هنا منتي بريّه

لوتجيبين سجاده ومصحف..
واشوفك طهر والأديان حيّه

تبعتي قاعدة كل العذارى ..
دخيلك حاسبي ماهي بهيّه

حراميه تظنيني حرامي..
وانا مظلوم وامشي بالسجيّه

تعالي واقري اخر ماكتبته..
عليها اسمي ومجهولة هويّه

لعلك تنصفيني ياغناتي..
اذا شفتي معاناتي جليّه

وتدرين اني احبك حقيقي..
اذا كنتي على خبري وفيّه

واذا منك قريتيها ارسلي لي ..
وردي ان كانت الخطر نقيّه

تراني باتحرى هالرساله..
وامانه منك راعي الله فيّه

علي سعد ظافر الشمراني

الشوق والتوديع....مصافحتي الأولى

الشوق والتوديع



على ذكر السفر واهل السفر والشوق والتّوديع
حزمت اغراضي وودعت غاليني وخلاني

مدام ان الليالي تشتري في هالبشر وتبيع
عسى الله لايرد اللي شرا غيري وخلاني

تخاف اضيع قول انك علي خايف تخاف اضيع
اجل والله ماغير الضياع اشفق وسلاني

انا سافرت عنك وما خرقت الدين والتّشريع
وجاي تقولي مخطي وشيطاني تبلاني

نعم مخطي لان اصلي ذهب مايقبل التّطبيع
نعم مخطي لان الجوهر المكنون حلاني

نعم مخطي لاني مارضيت اصادق التّوقيع
نعم مخطي لاني مارضيت اغالط انساني

تقول اطيع شورك لا ورب البيت صعب اطيع
انا مخلوق في الدنيا عشان اذوق واعاني

مادامي صح ماتفرق معاي اسطورة التّلويع
مادامي صح والله مابتامرني وتنهاني

انا حر وطموحي فوق مايحلم به التّبّيع
نعم باموت لكن مابجي للقبر وحداني

واذا منت بمصدقني تعال احضر في التّشييع
قسم بالله ماتقدر تعد جموع خلاني


علي سعد ظافر الشمراني

صيف وسحابه


ياصاحبي دام الخطا ماله اعذار
روّح ولا تسدل عليّ الكآبه

يرضيك اشوف الهم وآعيش في نار
وانت آخر المشوار صيف وسحابه

تيّار واسبح دايما ضد تيّار
واعمار ضاعت في الورق والكتابه

ملّيت انا من سطوة السّارق المار
تعبت وانت تجيد دور العصابه

الله ولا حبّن يوردني العار
والله ولا عشقن توالت حرابه

والله ولا زفّ الغرابيل بالطّار
غابه وانا ماعيش في وسط غابه

الى متى تخطي على قلبي البار؟
والى متى تذعن وتسمع عتابه؟

قم نفترق ونقول للعالم اقدار
ويوم القضا كلّن يوفّى حسابه

والحب خل الحب مال الغلا كار
لا تظلمه وتهين حضرة جنابه

بينك وبينه ياهوى الرّوح مشوار
تشبه علاقة عكرمه بالصّحابه

النّار في قربك وفي بعدك استار
والنّاي منك ارحم وصوت الربابه

خلّ الشّقا يغسل ذنوبي ولو جار
خلّ الأمل يسمع هواي انتحابه

يمكن اذا ابعدنا لقينا الف تذكار
أخير من قصر(ن) يعوّد خرابه

مادام جرحك في الهوى ماله اعذار
ارحل ولا تسدل عليّ الكآبه

أحسن ولا تبكيني القمريّه


وحدي انا ومخدّتي واحزاني
واحلامي المغروره المنسيّه

ارتّب افكار القصيد الفاني
واكتب على مستقبلي مرثيّه

واشكي غرابيلي على ديّاني
واقول وحدك عالم(ن) بالنيّه

اعطيت واجد والزمن ما اعطاني
وقدّمت ماتقدر عليه ايديّه

يارب عيّا يعتدل ميزاني
يارب فرّح نفسي المبليّه

واصبحت الحّن هم بعد الثّاني
الين بان النّور في الصّبحيّه

سمعتني امّي يوم اجر الحاني
جتني تقول اسمع .. وتصرخ فيّه

لا تشتكي ما يشتكي شمراني
لو تنطبق جدّه على الشّرقيّه

قلت ابشري بي يالغلا الربّاني
بس انّي اشكي همّي لموليّه

تدرين حظّي طاح بين اخواني
والملهمه راحت فـ شربة ميّه

يمّه لعنت البارحه شيطاني
وقريت لي كل آية(ن) قدسيّه

بس التّعب والله ماخلاّني
والين ماجيتي وناره حيّه

من وين ايمّم وجهتي يلقاني
ومن كل ركن يقول ياللّه حيّه

الغربله ماودّها تنساني
والسالفه من عام هيّه هيّه

يمّه انا ما ابغى تهيض اشجاني
واصبح حديث السّاحه الشّعبيّه

اموت ما احد يدري بعنواني
احسن .. ولا تبكيني القمريّه



علي سعد ظافر الشمراني

افكار مسودّه
اعزائي اصافحكم بعد طول غياب وأتمنى ان تكونوا بأسعد حال...واقدم هذه القصيده بين أيديكم..



ياليتني طفل وافعالي بلا حسبه
وابكي ليا من جرحني شخص وآودّه

واقدر ليا من زعلت آكسّر الّلعبه
وانام واصحى بدون افكار مسودّه

الكارثه يابشر والصّعبه الصّعبه
لوعشت طيّب ولااحدن مد لك يدّه

والجرح والموت والتّلويع والرّهبه
تحب لك شخص ويجازيك بالصّدّه

افكار متجمّعه وهموم منصبّه
ياعمّنا الحزن لاتبطي بنا المدّه

قلبي ملك بس خانه للأسف شعبه
والحب مافيه جيش وحرب للرّدّه

يعني خسرت الرهان ورب هالكعبه
لازم يساير خفوقي عيشة الشّدّه

شعبة قساوه وانا ملزم بهالشّعبه
مجبور هالقلب حصّل كل شي ضدّّه

اذا تمرّدت يوم وزادت النّسبه
عذري معي كل شي متجاوزن حدّه

الطيب في وقتنا وش فايدة كسبه
كرت احترق والتّجنّي بايحن سدّه

ان صار قلبي حجر مااظنّها صعبه
اشوف كل القلوب احجار من مدّه



علي سعد ظافر الشمراني

عيشي حياتك .. !
شكلك جرحتيني ومن جرحك نويت ابعد واروح
عيشي حياتك مثل ماكنتي بدوني عايشه

والحب لا صار آخر المشوار مصدر للجروح
ما ني بمتحمّل جراحاته ولا بلايشه

تعبت اشيّد لك مداين عشق وابني لك صروح
ملّيت من صب المشاعر في مشاعر طايشه

طمحت اكون العاشق الصّب وتعدّيت الطّموح
الين صارت معظم افكاري غرام وشايشه

ياقلبي الطيب تعال انعيك واسكت لا تبوح
في مأتمك كل المشاعر لو تبيها جايشه

أمّا كذا ولا كذا ولا كذا كيف النزوح
لازم نجامل وضعنا ونسايره ونعايشه

يابنت يا سكر يا كل الحب يالوجه الصّبوح
انا دخلت الحب مااعرف غدره وخشايشه

ماجيت مثلك دارس الدنيا ولا افهم بالشروح
ابيض ولا ادري وين بيبانه ولا درايشه

جيت بجموح ورحت من عندك وانا خالي جموح
متكبد آلآم الغرام وظلمه وغشايشه

وين الوضوح بذمتك وبذمتك وين الوضوح؟
الصدق في قلب السما وابعد ولاني نايشه

عشان انا ما ابغى اكرهك با لملم اشيائي واروح
عيشي حياتك مثل ماكنتي بدوني عايشه


علي سعد ظافر الشمراني