فوق هام السحب ( الشعر الشعبي) على متن القوافي

انشهد أن الحيا يسرق قلوب الرجال
‏مثل الزهر طلعه الاول خفيف وندي

‏اجحد ليا شفت منسوب الحيا لايزال
‏واقول ماشفت ويشوف الغشيم بعدي

‏الطف من الحلم واحلا من نسيج الخيال
‏واطهر من المدلهمْ اللي يصب بردي

‏عذراً تقول انها يوم اعتراها الجفال
‏ورعٍ يبا يهج لكن مايعرف يعدي
‏
......

‏أحرص على الكلمة ، والمنطق الزين
أكسب رضا نفسك ولاتجرح النـاس

بعض الكلام أثقل ، من الهم والدين
يقطع غصون الود والغصن حساس


......

تدري وش الي غير الناس يفلان
‏شرع المصالح وانعدام الصراحه

‏صرنا نجامل بالخطاء كل غلطان
‏لين اكثر الغلطات صارت مباحه

‏نمدح كلام فلان وفعول علان
‏ وفلان نجرح بالتجاهل نجاحه


......

ناسٍ لهم عند العرب قابلية
وناسٍ مجالسهم بها ضيقة البال

ناسٍ مقابلهم كما الصيدليه
تشفي وجع من يشتكي جورالاهوال

اللي لهم بالطيب روحه وجيه
احرص عليهم صدق ياطيب الفال

ولايخدعك ضحك الوجيه الرديه
اللي تبيعك باول السوم بريال

......

‏لنا مواجيـب وعـلينا مواجيـب
ياللي تجـيـب العلم تقدر توديه

حنا نجازي راعي الطيب بالطيب
وراع الردى على الردى مانجازيه

لأنا مانعرف للردى والردى عيب
هـذي مباديــنـا وكل ومـبـاديـه


......

ياعظيمه وانتي الاشياء الجديده والقديمه
وانتي اللي لو تصد الارض ماصديت عنها
ٰ
وانتي اشجع الانتصارات وملذات الهزيمه
وانتي اللي وين مالقّيت قلبي قال عَنها
ٰ
وانتي اعجوبة زمان الشاعر اللي هلّ ديمه
وارتوت جدب القصايد لين صح الله بدنها


......

ليت النوايا مالها ستر و لباس
تظهر من صدور المخاليق جردى

اللي تظنه غير عن كل هالناس
بكره تشوفه مثل هالناس واردى


......

حنّا فقدنا منهو أغلى من الروح
لكن عشنا عقبهم غصب عنّا

هذي هي الدنيا مسرات وجروح
محد يحقق كل ماهو تمنّا


......

تهب الذكريات ويصبح الصبر الجميل حطام
ودمع الفقد يجري ما نوى طرفي على وَقفه

فراقك ما يهّووونه الزمن لو مّر ميـة عام
فراقك جرح مع زُود السنين يزود في نَزفه


......

لعنبو بعض الغنادير لو أنها نصوف
أتصبر مير لا شفتها باااح الصبر

كل ماشفت النحر والعواتق والردوف
راحت الدنيا ظلامٍ ورحنا في خبر


......